༄༅། །ཏཱ་ལས་བླ་མ་སྐུ་ཕྲེང་ལྔ་བ་རྒྱལ་བ་བློ་བཟང་རྒྱ་མཚོ་མཆོག་ནི།

རབ་བྱུང་བཅུ་བའི་མེ་སྦྲུལ་ལོར(སྤྱི་ལོ༡༦༡༧)ཡར་ལུང་འཕྱོངས་རྒྱས་འཕྱིང་བ་སྟག་རྩེའི་ཡུལ་དུ་ཡབ་བདུད་འདུལ་རབ་བརྟན་དང་ཡུམ་ཀུན་དགའ་ལྷ་རྩེ་གཉིས་ཀྱི་སྲས་སུ་སྐུ་འཁྲུངས། དགུང་ལོ་དྲུག་པ་ཤིང་བྱི་ལོར་འབྲས་སྤུངས་སུ་སྤྱན་དྲངས། ཤིང་གླང(སྤྱི་ལོ༡༦༢༥)ལ་པཎ་ཆེན་སྐུ་ཕྲེང་བཞི་བ་བློ་བཟང་ཆོས་རྒྱན་ལས་དགེ་ཚུལ་གྱི་སྡོམ་པ་བཞེས། རབ་བྱུང་བཅུ་གཅིག་པའི་མེ་གླང་ལོར་ཡང་རྗེ་འདི་ཉིད་ལས་བསྙེན་རྫོགས་བཞེས། དེ་ནས་འབྲས་སྤུངས་དང་སེ་རའི་ཁྲིར་ཕེབས།

གུ་ཤྲི་ཆོས་རྒྱལ་གྱིས་ཀརྨ་རྒྱལ་རབས་ཕམ་པར་བརྒྱབ་ནས་དབུས་གཙང་ལ་དབང་བསྒྱུར་སྐབས། རྒྱལ་དབང་ལྔ་བ་ཆེན་པོ་ལ་གུས་ཤིང་རྒྱབ་སྐྱོར་བྱས་འོག

ལྷ་སའི་དགའ་ལྡན་ཕོ་བྲང་གི་སྲིད་དབང་གསར་དུ་བཙུགས། སྡེ་སྲིད་སངས་རྒྱས་རྒྱ་མཚོས་ལྔ་བ་ཆེན་པོའི་བཀའ་ལྟར་པོ་ཏ་ལ་གསར་དུ་བཞེངས།

དེ་ནས་བཟུང་རྒྱལ་བ་སྐུ་ཕྲེང་རིམ་བྱོན་པོ་ཏ་ལར་བཞུགས།

ལྕགས་ཡོས་ལོར(སྤྱི་ལོ༡༦༥༡)ཆིང་རྒྱལ་རབས་ཀྱི་གོང་མ་ཤུན་ཙིས་བླ་མ་ཆ་ཀྭར་དང་ཤེས་རབ་གཉིས་རྒྱལ་བར་སྤྱན་འདྲེན་དུ་མངགས་པ་བཞིན་ཏཱ་ལའི་བླ་མ་པེ་ཅིན་དུ་ཕེབས།

གོང་མས་རྒྱལ་བ་ལ་ཡིག་རིགས་བཞི་ལྡན་གྱི་གསེར་གྱི་འཇའ་ས་དང་ཐམ་ཀ་ཕུལ།

རྒྱུ་ནོར་ཕུན་སུམ་ཚོགས་པ་ལེགས་སྐྱེས་སུ་ཕུལ།

ཤིང་རྟ་ལོར(སྤྱི་ལོ༡༦༥༤)ཕྱིར་ལྷ་སར་ཕྱག་ཕེབས། དེ་ནས་ལྔ་བ་ཆེན་པོས་གཙང་དབུས་སུ་དགེ་འདུན་གྱི་སྡེ་དགའ་ལྡན་ཆོས་འཁོར་གླིང་སོགས་དགོན་སྡེ་ཆེ་ཕྲ་བཅུ་གསུམ་བཞེངས།

དགེ་ལྡན་པའི་ལུགས་ཀྱི་གླིང་བཅུ་གསུམ་ཞེས་པ་དེ་ནས་བྱུང་།

སྐུ་ཚེ་སྨད་དུ་སྲིད་དོན་ཕྲ་རགས་ཐམས་ཅད་སྡེ་སྲིད་ལ་གཏད་ནས་ཉིད་ཀྱིས་འཆད་རྩོད་རྩོམ་གསུམ་ཁོ་ནས་རྒྱལ་བསྟན་སྤེལ་བར་མཛད།

གསུང་རྩོམ་གྱི་སྐོར་ལ༼བྱང་ཆུབ་ལམ་རིམ་པའི་ཁྲིད་ཡིག༽ སོགས་གསུང་རབ་ཀྱི་སྐོར་དང༼དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས༽སོགས་ལོ་རྒྱུས་ཀྱི་སྐོར་བསྡོམ་པས་པོ་ཏི་སོ་བརྒྱད་ཙམ་བཞུགས།

དགུང་ལོ་རེ་དྲུག་པ་རབ་བྱུང་བཅུ་གཅིག་པའི་ཆུ་ཁྱི་ལོ(སྤྱི་ལོ༡༦༨༢)ལ་གཟུགས་སྐུའི་བཀོད་པ་བསྡུས་སོ། །

ཞེས་བུ་ཆུང་གིས་ཡི་གེར་ཕབ་པར་དགེའོ།

ཕྱག་འཚལ་བའི་ཕན་ཡོན།
འཇམ་མགོན་ས་པཎ་གྱིས་མཛད།།
༄༅། ། ན་མོ་གུ་རུ་བྷྱཿན་མོ་བུངྔྷ་ཡ། ན་མོ་ངྷརྨཱ་ཡ། ན་མཿསངྒྷཡ།
བདག་གིས་མཆོག་གསུམ་དམ་པར་ཕྱག་འཚལ་ནས། །
བདག་ཅག་འགྲོ་ཀུན་སྡིག་སྒྲིབ་འདག་པར་ཤོག །
ལག་གཉིས་མཉམ་པར་ཐལ་མོ་སྦྱར་བ་ཡིས། །
ཐབས་དང་ཤེས་རབ་ཟུང་འཇུག་འཐོབ་པར་ཤོག །
ཐལ་མོ་སྤྱི་བོའི་གཙུག་ཏུ་སྦྱར་བ་ཡིས། །
ཞིང་མཆོག་བདེ་བ་ཅན་དུ་སྐྱེ་བར་ཤོག །
ཐལ་མོ་སྨིན་མཚམས་དཔྲལ་བར་སྦྱར་བ་ཡིས། །
ལུས་ཀྱི་སྡིག་སྒྲིབ་ཐམས་ཅད་འདག་པར་ཤོག །
ཐལ་མོ་མགྲིན་པའི་ཐད་དུ་སྦྱར་བ་ཡིས། །
ངག་གི་སྡིག་སྒྲིབ་ཐམས་ཅད་འདག་པར་ཤོག། །
ཐལ་མོ་སྙིང་གི་ཐད་དུ་སྦྱར་བ་ཡིས། །
ཡིད་ཀྱི་སྡིག་སྒྲིབ་ཐམས་ཅད་འདག་པར་ཤོག །
ཐལ་མོ་སྦྱར་བ་སོ་སོར་ཕྱེ་བ་ཡིས། །
གཟུགས་སྐུ་གཉིས་ཀྱིས་འགྲོ་དོན་བྱེད་པར་ཤོག །
རྐང་གཉིས་པུས་མོ་ས་ལ་བཙུགས་པ་ཡིས། །
འཁོར་བ་ངན་སོང་གནས་ལས་ཐར་བར་ཤོག །
ལག་གཉིས་སོར་བཅུ་ས་ལ་བཙུགས་པ་ཡིས། །
ས་བཅུ་ལམ་ལྔ་རིམ་གྱིས་བགྲོད་པར་ཤོག །
མགོ་བོའི་དཔྲལ་བ་ས་ལ་བཙུག་པ་ཡིས། །
བཅུ་གཅིག་ཀུན་ཏུ་འོད་ཀྱི་ས་འཐོབ་ཤོག །
ཡན་ལག་བཞི་བོ་བརྐྱངས་བསྐུམས་བྱས་པ་ཡིས། །
འཕྲིན་ལས་རྣམ་བཞི་ལྷུན་གྱིས་འགྲུབ་པར་ཤོག །
རྩ་རྒྱུས་ཐམས་ཅད་བརྐྱངས་བསྐུམས་བྱས་པ་ཡིས། །
རྩ་མདུད་ཐམས་ཅད་མ་ལུས་དགྲོལ་བར་ཤོག །
སྒལ་ཚིགས་དབུ་མ་དགྱེ་སྒུར་བྱས་པ་ཡིས། །
རླུང་རྣམས་མ་ལུས་དབུ་མར་ཚུད་པར་ཤོག །
ས་ལ་ཐུག་ནས་ཡར་ལ་ལྡིང་བ་ཡིས། །
འཁོར་བར་མི་གནས་ཐར་ལམ་འཐོབ་པར་ཤོག །
བདག་གིས་བརྐྱངས་ཕྱག་ཕུལ་བའི་དགེ་བའི་མཐུས། །
གནས་སྐབས་ཚེ་རིང་ནད་མེད་ཕུན་སུམ་ཚོགས། །
འཆི་ཚེ་བདེ་བ་ཅན་དུ་སྐྱེས་ནས་ཀྱང་། །
རྫོགས་པའི་སངས་རྒྱས་གོ་འཕང་འཐོབ་པར་ཤོག །
དགེ་འདིས་དུས་གསུམ་ཕྱོགས་བཅུའི་སངས་རྒྱས་དང་། །
བློ་ཆེན་རྒྱལ་སྲས་སེམས་དཔའ་ཐམས་ཅད་ཀྱིས། །
མཛད་པ་སྨོན་ལམ་རླབས་ཆེན་ཇི་སྙེད་པ། །
མཐའ་དག་བདག་ཉིད་གཅིག་པུས་འགྲུབ་གྱུར་ཅིག །

སརྦ་མངྒ་ལཾ། །

西康佐钦大圆满寺猴年猴月初十，万僧会供大法会。༄༅།།སྔ་འགྱུར་གྲུབ་དབང་རྒྱལ་བ་རྫོགས་ཆེན་དགོན་དུ་དབང་ཆེན་སྤྲེལ་ལོ་སྤྲེལ་ཟླའི་ཚེས་བཅུའི་ཚོགས་མཆོད་ཆེན་མོའི་སྐབས་སུ།