༄།རྣམ་ཤེས།

མྱི་ཕྲུག
ཐོགས་མེད་ལས་ཀྱི་ཁྲིད་པའི་རྣམ་ཤེས་གཉོམ་པོ།།
ཚུགས་ཀ་རང་གི་ས་ན་ལྷོད་ཀྱིས་ཞིག་དུས།།
བྱེ་ཐང་རྡོག་པས་མཇལ་བའི་ད་འུའི་སྐྱོ་ཉམས།།
ཟློག་མེད་ཐོད་དུ་བབས་པ་དབང་ཐང་ཆེ་སོང་།།

རེ་བ་ནམ་མཁའི་ཁ་ཞེང་ཇི་ཙམ་ཆེ་ཡང་།།
སྟོང་པ་འཇའ་ཡི་ཡུམ་ལ་འཁྱུད་དང་ཅི་ཁྱད།།
བདེ་རེག་སེམས་ཀྱིས་གཞིབ་པའི་སྐལ་བ་དབེན་ཀྱང་།།
ད་དུང་དམ་དུ་འཛིན་པ་རྟོག་པའི་གཤིས་རེད།།

ངལ་བའི་གཉིད་ལ་ཡུར་བ་མི་ཚེ་ནོམ་ཆེན།།
ཉིན་བསམ་མཚན་ལ་རྨིས་པའི་རྨི་ལམ་བུ་མོས།།
ནོམ་ཉུག་སྙིམ་པའི་མཐིལ་གྱི་གཞོན་ཤ་རྗེན་པ།།
ཇི་འདྲའི་སྙིང་དུ་སྡུག་ཀྱང་ཟློས་གར་ཐེང་གཅིག།

ཡིན་རྟེན་བློ་ལ་འཆའ་བའི་སྨྱོན་མ་ཁྱུ་གཅིག།
སྲིད་པའི་གདང་ལ་འདོགས་བྱེད་ཐག་པ་ཁྲ་བོ།།
ངེས་མེད་ཤེད་ཀྱིས་གཡོ་བ་རྟོག་པའི་སྤྱང་མོས།།
ལུས་ཕུང་ཤིས་ཕྲུག་འདྲ་བོ་སྡིག་ལ་བསྒྲེས་སོང་།།

འཛིན་པའི་འགོང་པོ་ཐུལ་བའི་རྣལ་འབྱོར་རྟོགས་པས།།
ཡོད་ཚད་བཅོས་མ་ཡིན་པའི་གསང་བ་རྟོལ་ཚེ།།
འདུ་ཤེས་འཇུག་པ་ཕྲ་རགས་རྫུན་ཁུང་བརྡིབས་ཏེ།།
བདེན་མེད་རྩིས་གདབ་བོར་བར་ཧད་དེ་རྒྱལ་འདུག།

༄༅། །ངག་དབང་སྒྱུ་འཕྲུལ་ལྷ་རིགས་འཁོན་གྱི་གདུང་།།
འགྲོ་ཀུན་དགེ་མཛད་ཐེག་ཆེན་མདོ་སྔགས་ལམ།།
ཕན་བདེ་དཔལ་དུ་འབར་བའི་འཕྲིན་ལས་ཅན།།
བསམ་འཕེལ་དབང་གི་རྒྱལ་པོ་ཞབས་བརྟན་གསོལ།།

༄༅། ། གངས་ཅན་བོད་པ་གང་འགྲོ་བཀྲ་རེ་ཤིས། ། གངས་ཅན་བོད་པ་གར་སླེབས་དོན་རེ་གྲུབ། ། ཚེ་རིང་ནད་མེད་བདེ་བའི་བཀྲ་རེ་ཤིས། ། བསམ་དོན་ཡིད་བཞིན་འགྲུབ་པའི་བཀྲ་རེ་ཤིས། ། སྟོབས་འབྱོར་མངའ་ཐང་རྒྱས་པའི་བཀྲ་རེ་ཤིས། ། བདེ་སྐྱིད་དཔལ་ལ་རོལ་བའི་བཀྲ་རེ་ཤིས། ། འབྲོག་ལ་དཀར་བཞི་འཕེལ་བའི་སྨོན་ལམ་འདེབས། ། ཞིང་ལ་འབྲུ་དྲུག་འཕེལ་བའི་སྨོན་ལམ་འདེབས།