【ད་ལོར་ཀན་སུའུ་ཞིང་ཆེན་གྱིས་ནགས་སྐྲུན་ལྗང་སྒྱུར་བྱེད་ཚད་མུའུ་ཁྲི260ཡན་ལ་བསླེབ་རྒྱུ་རེད།】ཟླ2པའི་ཚེས6ཉིན། གསར་འགོད་པས་མཚོ་སྔོན་ཞིང་ཆེན་ཡོངས་ཀྱི་ནགས་ལས་དང་རྩྭ་ཐང་བྱ་བའི་གྲོས་ཚོགས་སྟེང་ནས་རྒྱུས་ལོན་པ་ལྟར་ན། ད་ལོར་ཀན་སུའུ་ཞིང་ཆེན་གྱིས་ནགས་སྐྲུན་ལྗང་སྒྱུར་བྱེད་ཚད་མུའུ་ཁྲི260ཡན་ལ་བསླེབ་རྒྱུ་དང་། ཞན་འགྱུར་རྩྭ་ཐང་མུའུ་ཁྲི200ལེགས་བཅོས་བྱ་རྒྱུ། སྐྱེ་ཁམས་རྩ་འདེབས་མུའུ་ཁྲི200ལ་བསླེབ་རྒྱུ། བྱེ་འགྱུར་ས་ཞིང་ཕྱོགས་བསྡུས་བཅོས་སྐྱོང་བྱེད་ཚད་མུའུ་ཁྲི168ཡན་ལ་བསླེབ་པར་བརྩོན་ལེན་བྱ་རྒྱུ་རེད།

གྲོས་ཚོགས་སྟེང་། 2025ལོར་བསླེབ་དུས་ཞིང་ཆེན་ཡོངས་ཀྱི་ནགས་ཚུལ་གྱི་ཁྱབ་ཚད12%ལ་བསླེབ་རྒྱུ་ཡིན་པ་དང་། ནགས་ཚལ་གྱི་གསོག་ཉར་བྱེད་ཚད་སྨི་གྲུ་བཞི་ལྷམ་པ་དུང་ཕྱུར2.8ལ་བསླེབ་པ། རྩྭ་ཐང་གི་ཕྱོགས་བསྡུས་སྔོ་ཁེབས་ཁྱབ་ཚད53.5%ལ་བསླེབ་པ། བརླན་སའི་སྲུང་སྐྱོང་བྱེད་ཚད44.16%ལས་བརྒལ་བ། རྒྱལ་ཁབ་སྤྱི་གླིང་གཙོ་བྱས་པའི་རང་བྱུང་སྲུང་སྐྱོང་ཁུལ་གྱི་གཞི་ཁྱོན་དེ་རྒྱལ་ཁབ་མངའ་ཁོངས་ཀྱི་བསྡུར་ཚད་ལས20%ལས་བརྒལ་རྒྱུ་ཡིན་པར་བཏོན་ཡོད་པ་རེད། །

མཛོད་དགེ་རྫོང་མའེ་ཤེ་ཤང་བློ་རྒྱལ་ཆུ་མགོའི་ཆུ་ལ་ལོ་ཧྲིལ་བོར་དར་མི་ཆགས་པས། དེ་ནི་ངང་དཀར་ཁྱུ་ཚོགས་དགུན་སྒྲོལ་བྱེད་སའི་གནས་མཆོག་ཞིག་ཏུ་གྱུར་ཡོད་པ་དང་། ལོ་རེའི་ཟླ11པའི་ཟླ་མགོ་རུ་ངང་དཀར་ཁྱུ་ཚོགས་གནས་དེར་འཕུར་ཡོང་ནས་དགུན་སྒྲོལ་བྱེད་མགོ་བརྩམས།
ཉེ་བའི་ལོ་འགའི་རིང་། འབྲི་ཆུ་དང་རྨ་ཆུའི་སྟོད་རྒྱུད་ཀྱི་ཆུ་ཁུངས་དང་མཐོ་སྒང་གི་བརླན་སར་སྲུང་སྐྱོང་བྱས་ནས། ཕྱུགས་དོར་ནས་བརླན་སར་སྲུང་སྐྱོང་དང་བརླན་སའི་སྤྱི་གླིང་སོགས་ཀྱི་ལས་དོན་གཏིང་ཟབ་པའི་ངང་སྤེལ་བ་དང་བསྟུན། མཛོད་དགེའི་བརླན་སའི་ཁོར་ཡུག་ཕྱོགས་ཡོངས་ནས་ལེགས་བཅོས་བྱུང་ཞིང་། བརླན་སའི་རྒྱ་ཁྱོན་རྒྱུན་མཐུད་ངང་ཆེ་རུ་ཕྱིན་པས་དེ་ནི་ངང་དཀར་དང་ཁྲུང་ཁྲུང་སྐེ་ནག་སོགས་རྩ་ཆེའི་འདབ་ཆགས་རིགས་ཀྱི་དགུན་སྒྲོལ་ཞིང་ཁམས་སུ་གྱུར་ཡོད། བསྡོམས་རྩིས་རགས་ཙམ་བྱས་པ་ལྟར་ན། མཛོད་དགེ་རྫོང་དུ་བསྡོམས་པས་འདབ་ཆགས་རིགས162ཡོད་པ་དེས་སི་ཁྲོན་ཞིང་ཆེན་ཡོངས་ཀྱི་འདབ་ཆགས་རིགས་ཀྱི26%ཟིན་པ་དང་། རྒྱལ་ཡོངས་ཀྱིི་འདབ་ཆགས་རིགས་ཀྱི12.2%ཟིན། །

【ཡུལ་སྐོར་ལ་བརྟེན་ནས་སྐྱེ་ཁམས་ཀྱི་རིན་ཐང་མཚོན་པ།】2021ལོར། རང་ཞིང་གིས་ཁོ་རེ་ཡ་ལྷོ་མ་དང་ཨེ་ཅིབ། འབར་མ་སོགས་ཀྱི་རྒྱལ་ཁབ་ནས་དྲ་ངོས་སུ་ཀྲུང་གོར་ཉུལ་བ་སྟེ་མཚོ་སྔོན་ནས་ལམ་ལ་ཆས་པ་དང་སྤྲོ་སྐྱིད་ལོ་གསར་སོགས་ཀྱི་བྱ་འགུལ་སྤེལ་བར། 《རབ་མཛེས་མཚོ་སྔོན། སྐྱེ་ཁམས་ཡུལ་སྐོར》ཞེས་པའི་བརྙན་རིས་རྒྱལ་ཡོངས་ཀྱི་ཡུལ་སྐོར་སྤྱི་ཕན་བརྡ་ཁྱབ་ཀྱི་ཕུལ་བྱུང་བརྩམས་ཆོས་སུ་བདམས། སྨྱན་བྱད་སྣ་ཚོགས་ཀྱིས་ཆ་འཕྲིན་ཐེངས18617ལ་ཁྱབ་སྒྲོག་བྱས། “རབ་མཛེས་མཚོ་སྔོན། སྐྱེ་ཁམས་ཡུལ་སྐོར”གླེང་བའི་མི་གྲངས་དུང་ཕྱུར20ལས་བརྒལ། འཁྱུག་དབྱངས་དང་མགྱོགས་འཕྲིན་ལས་རབ་མཛེས་མཚོ་སྔོན་སྐྱེ་ཁམས་ཡུལ་སྐོར་གྱི་བརྙན་ཐུང་གཏོང་གྲངས་དུང་ཕྱུར་ཡན་དུ་བརྒལ། མཚོ་སྔོན་རིག་གནས་ཡུལ་སྐོར་དུས་ཆེན་སྤེལ་བ་དང་། མཚོ་སྔོན་ཞིང་ཆེན་གྱིས་རྒྱལ་སྤྱིའི་སྐྱེ་ཁམས་ཡུལ་སྐོར་བྱ་ཡུལ་བསྐྲུན་པའི་རིག་གནས་ཡུལ་སྐོར་གྱི་བསྒྲགས་གཏམ་སྤེལ་བ། “ཁེ་ལས་བརྒྱ་དང་ལས་གཞི་བརྒྱ”ཡི་གན་རྒྱ་འཇོག་པའི་བྱ་འགུལ་སྤེལ་ནས། ལས་གཞི123ལ་གན་རྒྱ་བཞག་པ་དེ་མ་དངུལ་སྒོར་དུང་ཕྱུར132.57དང་འབྲེལ་ཡོད།

ཉེ་བའི་ལོ་འགའི་རིང་ལ། “རབ་མཛེས་མཚོ་སྔོན”གྱི་ཚོང་རྟགས་ཀྱི་ཤུགས་རྐྱེན་ནུས་ཤུགས་བསྟུད་མར་ཇེ་ཆེར་བཏང་བ་དང་མཉམ་དུ། “སྐྱེ་ཁམས་ཀྱི་མཐོ་ས”དང“ཡུལ་སྐོར་གྱི་དག་ཞིང”“ཀྲུང་ཧྭའི་འབྱུང་ཁུངས”“གནས་མཆོག་མཚོ་སྔོན”སོགས་ཀྱི་ཚོང་རྟགས་ཕལ་པ་རྣམས་ཀྱང་མགྱོགས་པོར་འོས་སྦྱོར་བྱས། ཡུལ་སྐོར་ཐོན་ལས་འཕེལ་རྒྱས་སུ་སོང་བས་མཚོ་སྔོན་གྱི་མཛེས་པའང་སྔར་བས་མི་མང་པོ་ཞིག་གིས་ཤེས་པར་གྱུར། ཡུལ་སྐོར་གྱི་ལས་དོན་འཕེལ་རྒྱས་སུ་སོང་བས་མཚོ་སྔོན་གྱི་སྐྱེ་ཁམས་ལ་སྔར་བས་ཆེ་བའི་རིན་ཐང་མངོན།

མིང་དུ་གྲགས་པའི་ཚོང་རྟགས་ཀྱི་རྒྱབ་ངོས་ནི་རིག་གནས་ཡུལ་སྐོར་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་དང་ཕྱོགས་བསྡུས་ཕན་འབྲས་འབུར་དུ་ཐོན་པ་དེ་ཡིན། 2021ལོར། རང་ཞིང་དུA3རིམ་པ་ཡན་གྱི་ལྗོངས་ཁུལ32དང་། རྒྱལ་ཁབ་རིམ་པའི་གྲོང་གསེབ་ཡུལ་སྐོར་གཙོ་གནད་ཞང་དང་གྲོང་རྡལ3། གཙོ་གནད་སྡེ་བ5། ཞིང་ཆེན་རིམ་པའི་གྲོང་གསེབ་ཡུལ་སྐོར་གཙོ་གནད་སྡེ་བ45དང་གསར་བརྗེ་ཡུལ་སྐོར་གྱི་དཔེ་མཚོན་ལྗོངས་ཁུལ5། ཡུལ་སྐོར་གྱི་སྤྲོ་གསེང་སྲང་ཁུལ17། ཡུལ་ཁོངས་ཡོངས་ཀྱི་ཡུལ་སྐོར་དཔེ་སྟོན་ཁུལ4བཅས་འཕར། གྲོང་གསེབ་ཡུལ་སྐོར་གྱི་འཇོན་མི20ལ་རྒྱལ་ཁབ་ཀྱི་རྒྱབ་སྐྱོར་ཐོབ། Aརིམ་པའི་ལྗོངས་ཁུལ་དང་ཡུལ་སྐོར་སྤྲོ་གསེང་ཁུལ། གྲོང་གསེབ་ཡུལ་སྐོར། གསར་བརྗེ་ཡུལ་སྐོར་སོགས་ཐེག་བྱད་གཙོ་བོ་ཡིན་པའི་ཡུལ་སྐོར་ཐོན་རྫས་འདོན་སྤྲོད་བྱེད་པའི་མ་ལག་རིམ་བཞིན་ཆགས་པ་དང་། གསར་བརྗེ་ཡུལ་སྐོར་དང་གྲོང་གསེབ་ཡུལ་སྐོར། བསླབ་ཚན་ཡུལ་སྐོར། སིམ་འཛུལ་ཅན་གྱི་ཉམས་ལེན་སོགས་ཀྱི་ལས་རྣམ་གསར་པ་རྒྱུན་ཆད་མེད་པར་བྱུང་།

སྤྲོ་གསེང་ཐང་ཆེན་དང་དམངས་སྲོལ་ཡུལ་སྲོལ་ར་བ། ཆུ་ཐོག་གི་རྩེད་འཇོ་གྲུ་ཁ། སྒེར་འཁོར་ཡུལ་སྐོར་གྱི་སྒར་ས། བྱེ་ཐང་། གཉེན་གོས་གྱོན་པའི་པར་ལེན་རྟེན་གཞི། མེ་ཏོག་ཐང་ཆེན། རྨོ་འདེབས་ཉམས་ལེན་སོགས་མང་ལ། རྨ་ལྷོ་བོད་རིགས་རང་སྐྱོང་ཁུལ་གཅན་ཚ་རྫོང་བདེ་སྐྱིད་སྡེ་བ་རུ“ས་གནས་ཀྱི་ཟས་མཆོག་ཟ་བ་དང་བོད་ཀྱི་སྡོད་ཁང་དུ་སྡོད་པ། རྨ་ཆུའི་མཛེས་ཉམས་ལ་བལྟ་བ”བཅས་ཀྱི་ཡུལ་སྐོར་འཕེལ་སྟངས་རིམ་བཞིན་ཆགས་ནས། རང་ཡུལ་གྱི་མང་ཚོགས253གྱི་ལས་ཞུགས་གནད་དོན་ཐག་བཅད་དེ། མང་ཚོགས་རྣམས་ཉེ་འགྲམ་ནས་ལས་ཀར་ཚུད་དུ་བཅུག་ཅིང་བརྟན་བརླིང་སྒོས་ཡོང་སྒོ་འཕར་དུ་བཅུག

སྔོན་ཆད་ཤེས་མཁན་མེད་པའི་མཛེས་ལྗོངས་དེ་དག་ཞིང་ཆེན་ཕྱི་ནང་དུ་སྙན་གྲགས་རྒྱས་པའི་ཚོང་རྟགས་སུ་གྱུར་ཡོད་ལ། མཐོ་སྒང་གི་རུ་སྡེ་དག་སྙན་གྲགས་ཆེ་བའི་ཡུལ་སྐོར་བྱ་ཡུལ་དུ་གྱུར་ཏེ། བབ་ཆགས་ཀྱི་འབྲོག་མི་རྣམས་ཀྱིས་སེམས་ཞིབ་མོས་བསྲུངས་པའི་སྐྱེ་ཁམས་ཁོར་ཡུག་གིས་དཔལ་འབྱོར་གྱི་རིན་ཐང་མངོན་ནས། ཆུ་དྭངས་རི་སྔོ་ནི་དོན་དངོས་གནས་མང་ཚོགས་ཀྱི་གསེར་རི་དངུལ་རིར་གྱུར།

རྨ་ཆུའི་འགྲམ་ངོགས་ནས་ཙོང་ཆུའི་གྲོག་རོང་བར་དང་། གཙང་གསུམ་འབྱུང་ཡུལ་ནས་མུ་མཐའ་མེད་པའི་བྱེ་ཐང་བར་སྐྱེ་ཁམས་ཡུལ་སྐོར་རམ་ལྷག་པར་དུ་སྐྱེ་ཁམས་ཉམས་ལེན་སོགས་ཀྱི་གསར་དར་ཡུལ་སྐོར་ལས་རྣམ་མགྱོགས་མྱུར་གྱིས་འཕེལ་རྒྱས་སུ་ཕྱིན་ནས། མཚོ་སྔོན་གྱི་ཆུ་དྭངས་རི་སྔོ“རྒྱལ་སྤྱིའི་ཚད་ལྡན”དུ་གྱུར་པ་དང་། “དར་སྲོལ་གྱི་ཚད་ལྡན”ཕྱོགས་སུ་བསྐྱོད་ནས། “མཛེས་སྡུག”གི་སྐྱེ་ཁམས་ལས་སྔར་བས་ཕུན་སུམ་ཚོགས་པའི་དཔལ་འབྱོར་དང་སྤྱི་ཚོགས་ཀྱི་རིན་ཐང་མངོན། །