མེ་ཏོག་འཕྲེང་ཚོགས་སྡུག་གུའི་མགོ་ལྕོག་རྣམས།།
དལ་གྱིས་ལྡེམ་པའི་འཁྲི་ཤིང་འགྲམ་པ་ནས།།
བུང་བའི་ན་ཆུང་མྱོས་པའི་གླུ་ལེན་པས།།
ཡིད་རབ་བསྒྱུར་བའི་སྨན་ལྗོངས་ཉམས་སུ་བདེ།།

དུས་རབས་མི་འདྲ་བའི་ནང་བྱུང་བའི་སློབ་དཔོན་པདྨ་སམྦྷ་བའི་བྲིས་ཐང་མི་འདྲ་བ་འགའ། གཤམ་གྱི་པར་དག་ནི་དུས་རབས་བཅུ་བཞི་ནས་བཅུ་དགུའི་བར་བྱུང་བའི་ཐང་ག་རེད། གཞན་ནས་བརྒྱུད་སྤེལ་བྱས་པ་ལགས།

༼གནས་བརྟན་ཆེན་པོ་བཅུ་དྲུག༽
བཞུགས་གནས་དེ་དག་ཀྱང་གཙོ་བོ་སྨོས་པ་ཡིན་གྱི་སྤྱིར་ན་གདུལ་བྱའི་དོན་དུ་འཇིག་རྟེན་གྱི་ཁམས་བགྲང་བ་ལས་འདས་པར་འགྲོ་དོན་མཛད་ཅིང་། ཞིང་འདིར་ཡང་གང་དང་གང་ན་གདུལ་བྱ་ཡོད་པ་དེ་དང་དེར་དངོས་སུ་བྱོན་པ་དང་། སྤྲུལ་པ་སྣ་ཚོགས་པས་འགྲོ་དོན་མཛད་པ་དང་། རྒྱལ་བའི་བསྟན་པ་གནས་པ་འདུལ་ཁྲིམས་ཚུལ་བཞིན་དུ་བསྲུང་བའི་དགེ་འདུན་གྱི་སྡེ་ལ་རག་ལས་པར་དགོངས་ནས་གང་དང་གང་ན་དགེ་འདུན་གྱི་སྡེ་ཉམས་པ་དེ་དང་དེ་གསོ་བ་དང་། ཅུང་ཟད་གནས་པ་རྣམས་ཆེས་ཆེར་འཕེལ་བར་མཛད་པ་དང་། སོ་སོའི་སྐལ་བ་དང་འཚམས་པར་སྤྲུལ་བས་དགེ་འདུན་གྱི་སྡེ་སྐྱོང་བར་མཛད་དེ། གནས་བརྟན་ཆེན་པོ་ཡན་ལག་འབྱུང་གིས་བྱང་ཕྱོགས་གངས་རིའི་ལྗོངས་འདིར་དགེ་འདུན་གྱི་སྡེ་ཆེས་ཆེར་འཕེལ་བར་བྱ་བའི་ཕྱིར་དགེ་བའི་བཤེས་གཉེན་པོ་ཏོ་བ་ཆེན་པོའི་སྐུར་བསྟན་ནས་བཀའ་གདམས་ཀྱི་རྣམ་ཐར་གཙང་མས་གངས་རིའི་ལྗོངས་འདི་ཡོངས་སུ་ཁྱབ་པར་མཛད་པ་ལྟ་བུའོ། དེ་ལྟར་ཐུབ་པའི་བསྟན་པ་ལོ་ལྔ་སྟོང་གི་བར་དུ་གནས་པར་གསུངས་པ་ལྟར་དང་། དེའི་བར་དུ་གནས་བརྟན་བཅུ་དྲུག་གིས་བསྟན་པ་སྐྱོང་ལ། དེ་ནས་ཀྱང་བྱམས་མགོན་འཇིག་རྟེན་འདིར་འབྱོན་པའི་སྔ་ལྟས་མ་ཤར་གྱི་བར་དུ་བསྟན་པ་སྐྱོང་ཞིང་། ནམ་ཞིག་འཛམ་བུ་གླིང་པའི་མི་རྣམས་ཀྱི་ཚེ་ལོ་བདུན་བརྒྱ་པར་གྱུར་པ་ན། གནས་བརྟན་ཆེན་པོ་བཅུ་དྲུག་གིས་སའི་སྟེང་ནས་སངས་རྒྱས་ཤཱཀྱ་ཐུབ་པའི་བསྟན་པའི་ཆོས་ཀྱི་ཚོགས་ཇི་སྙེད་ཅིག་བཞུགས་པ་ཐམས་ཅད་གཅིག་ཏུ་བསྡུས་ནས་རིན་པོ་ཆེ་སྣ་བདུན་གྱི་མཆོད་རྟེན་བྱས་ཏེ་དེར་བཞུགས་པ་ལ་བསྐོར་བ་ལན་མང་དུ་བྱས་ནས་སྐྱིལ་ཀྲུང་བཅས་ཏེ་འདུག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ་ཞེས་བརྗོད་དེས་ཕྱག་བྱས་ནས་གནས་བརྟན་དེ་དག་ཀྱང་ལྷག་མེད་དུ་མྱ་ངན་ལས་འདའ་བར་གསུངས་སོ།། །།