སྣང་བའི་གངས་ཆར།

ཉིན་དེའི་ཐོ་རངས། འཕྲིན་ཕྲན་རྒྱབ་ལོག་བསྔོགས་མེད་ན། ངས་རིན་ཐང་ལྟ་ཚུལ་གྲངས་མེད་ཅིག་དུར་སྦས་བྱའམ།

ཡང་ན།

ཞེ་འདང་རི་མོ་ཅན་གྱི་ཡིག་ཚོགས་སྤུངས་དོན་ཁྱོན་ནས་མེད།

ཉིན་དེའི་ཞོགས་པར།

ཤ་ཁྲག་རུས་གསུམ་ཡོམ་ཡོམ་སྒུལ་བའི་གླུ་གཞས་དེ་ཉན་མེད་གྱུར་ན། ཞེ་ཐོགས་པའི་དབྱངས་རྟ་གཉོམ་པོར་སེམས་པ་བརླན་ཐབས་ཡེ་ནས་ཟད་དོ།།

ཉིན་དེའི་གུང་ལ།

དུངས་བརྫོད་སྙན་རྩོམ་རིང་མོ་ཡིག་བཏགས་བྱས་མེད་ན། ཁྱེད་རང་རྦད་དེ་ཉིན་དེར་བརྗེད་འདུག

ཆགས་སྡང་གསོས་སུ་འདེབས་པའི་སྐྱེ་མཆེད་ཕྱི་ནང་དུ།

ངས་ཏག་ཏག་དོན་དམ་པར་ཁྱོད་རང་སྦས་སྐུང་བྱས་འདུག

ཉིན་དེའི་ཕྱི་དྲོར།

བསམ་གཞིག་གྲངས་མེད་ཀྱི་སྒོ་མོ་ཕྱེས་མེད་ན།

ཡང་བསྐྱར་ཁྱོད་རང་འཚོལ་སྲིད་དམ།

ང་རང་དངོས་གནས་ཁོ་ཆད་སོང་།

ཉིན་དེའི་དཔྱིད་ཀར།

དབྱངས་གསལ་སོ་བཞིའི་གྲུ་ཁ་དེ་ནས། ལས་དབང་གིས་ངོ་ཤེས་སུ་བསྒྱུར་མེད་ན།

ཞེན་ཆགས་ཀྱིས་བྱིལ་བྱིལ་བྱ་དོན་ཡེ་ནས་མེད་དོ།།

ཉིན་དེའི་དབྱར་ཁར།

འཇིག་རྟེན་སྣང་བའི་བག་ཆགས་ཀུན་གཞིའི་ཁམས་སུ་བགོས་མེད་ན།

སྣང་བའི་ཉིན་སྲིབ་ཏུ་ཞེ་འདང་སྨུག་སྤྲིན་འཕྱུར་དོན་གཏན་ནས་མེད་དོ།།

ཉིན་དེའི་སྟོན་ཁར།

ངེད་གཉིས་ངོ་ཐུག་མེད་ན། བརྩེ་འདང་གིས་བསླུ་བྲིད་ཐེབས་དོན་ག་ན་ཡོད། དེ་བས་ཀྱང་གལ་ཆེ་བ་ཞིག་ལ་བློས་གཏོང་མང་པོའི་ས་ལམ་བསྐྲུན་དོན་ཁྱོན་ནས་མེད།

ཉིན་དེའི་དགུན་ཁར། ཁ་བ་ཟིམ་ཟིམ་དང་གྲང་རླུང་འུར་འུར་ཁྲོད་ཆ་མེད་ནས་ཆ་ཡོད་ལྟར་གྱུར་དོན་ཅི། མ་ཟད་ཁམས་དང་མོས་བློའི་བར་ནས་ས་དྲན་རྡོ་དྲན་ཅིའི་ཕྱིར་འབྱུང་།

ཉིན་དེའི་འཇིག་རྟེན་ནས།

ཐ་སྙད་ཁ་ཤས་ཁྲོད་ནས་ཕན་ཚུན་ངོ་ཤེས་མེད་ན།

ལོ་ཟླ་མུ་མཐུད་དེ་ཞེ་འདང་ཁོ་ནས་རེ་སྒུག་བྱ་དོན་གང་ན་ཡོད།

ཉིན་དེའི་ཁྱོད།

ཁུ་སིམ་མེར་གནས་པའི་རི་གྲོང་དེ་ནས།
ཁྱོད་རང་ངོ་ཤེས་མེད་ན།

ཁོ་བོའི་འཇིག་རྟེན་དུ་ཁྱོད་རང་གི་
ས་ཚིགས་གཏན་ནས་ཡོད་མི་སྲིད།

རྨི་ལམ་ཇོ་བོས། https://t.cn/R2WxDXj

ཡུམ་གསལ་བྱེད་སུམ་ཅུ་དང་ཡབ་དབྱངས་བཞི་ལ་གུས་ཤིང་ཀློག་འབྲི་མི་བྱེད་པའི་བོད་པ་དག་ནི། ཇི་ཙམ་ཁ་ཡིས་སྙན་མོ་བཤད་ཀྱང་བོད་མའི་རྣལ་མར་འགྱུར་དཀའ་བས། རྒན་དར་གཞོན་གསུམ་གྱིས་འདི་ལ་ཐུགས་གཟབ་པར་ཞུ། ཅིའི་ཕྱིར་ཞེ་ན། ཆོས་སྲིད་གཉིས་སམ་ཡོན་ཏན་ཀུན་འདི་རྣམས་ལས་མགོ་བརྩམས་ཏེ་མཐར་ཕྱིན་པར་མཛད་དགོས་ལ། མ་ཟད་ཆོས་སྲིད་གཉིས་དང་མཐུན་པའང་ཡིན་ཏེ། སྲིད་འཛིན་ཞིས་ཅན་ཕན་གྱིས་བོད་ཀྱི་ཞིང་ཆེན་དག་གི་ལས་བྱེད་པ་རྣམས་ལ་བོད་ཡིག་དང་བོད་སྐད་སྦྱོང་ཞིང་དར་སྤེལ་གཏང་དགོས་པར་གསུངས་པས་སོ།།

བལྟས་ན་སྐྱིད་སྐྱིད་འདྲ་བའི་འཇིག་རྟེན་གྱི་ཕུན་ཚོགས། །
ཐོབ་ན་རང་རང་སྐབས་ཀྱི་སྡུག་བསྔལ་རེ་འདུག་པས། །
འཕྲལ་སྣང་བདེ་བའི་གནས་སྐབས་རྨི་ལམ་ཙམ་སོང་རྗེས། །
ཅིས་ཀྱང་རང་སེམས་སྐྱོ་བའི་རྐྱེན་སྣང་རེ་འདུག་གོ །

དགེ་འདུན་ཆོས་འཕེལ་གྱིས་གསུངས། https://t.cn/RJvXTKC