གལ་ཏེ་ཚན་རིག་གི་དགོས་མཁོ་སྐོང་པ་དང་། ཚན་རིག་དང་མཉམ་དུ་གནས་ཐུབ་པའི་ཆོས་ལུགས་ཤིག་ཡོད་ཚེ་དེ་ནི་སངས་རྒྱས་ཆོས་ལུགས་ཡིན་སྲིད།

－ཚན་རིག་མཁས་ཅན་ཨེན་སི་ཐན་གྱིས་གསུངས།
如果有一个能够应付现代科学需求，又能与科学相依共存的宗教，那必定是佛教。
－ 科学巨匠（爱因斯坦） https://t.cn/R2WxDvV

༧ བོད་རབ་རྒྱན་ལྕགས་མོ་གླངགི་ལོ་འདིར་ཨག་རྩེ་སྙིང་འབུམ་དགུང་གྲངས་བརྒྱ་སོན་པ་དང་ཁོང་གི་བུ་མོ་ལོ་བརྒྱད་ཅུ་ལོན་པ་ལ་བཀྲ་ཤིས་རྟེན་འབྲེལ་ཞུ།
ཨག་རྩེ་སྙིང་འབུམ་ནི་（གཅེས་མིང་ལ་ཨ་རྒྱ་མ་མ་ཟེར）རབ་བྱུང་བཅོ་ལྔ་བའི་ཆུ་ཕོ་ཁྱིའི་སྤྱི་ལོ་ 1922 ལོར་སྐྱེས། ཆུང་དུས་ནས་ཆོས་དང་བླ་མ་ལ་དད་པ་ཆེ་ཞིང་རང་ཚུགས་བརྟན་པ། རང་སྡེ་དང་ཡུལ་མི་ཀུན་ལ་བློ་སེམས་དཀར་བ་ཞིག་ཡིན། རང་ལོ་སུམ་ཅུའི་ནང་འཇའ་ལུས་པ་མཁན་ཆེན་ཚེ་དབང་རིག་འཛིན་གྱི་ཞབས་ལ་གཏུགས་ཏེ་རྩ་བའི་བླ་མར་བསྟེན་ནས་ཆོས་ཀྱི་བདུད་རྩི་ཐོབ། འཇའ་ལུས་པ་མཆོག་འབའ་ཡུལ་ཕྱོགས་ནས་ཨག་རྩེ་སྙིང་འབུམ་ཚང་གཅིག་པུ་མ་གཏོགས་སྦྲ་ནག་གི་ཁྱིམ་ཚང་ནང་དུ་བྱོན་མ་མྱོང་། ཁོ་རང་འཇའ་ལུས་པ་ཚང་ལ་དད་འདུན་ཤིན་ཏུ་ཆེ་ཞིང་རྒྱུན་དུ་གཙང་ཆབ་ཀྱིས་ལུས་བཀྲུ་བ་དང་འཐུང་བ་སོགས་བྱས་པའི་རྐྱེན་གྱིས་ད་ལྟ་སྤྱི་ལོ 2021 ལོར་ཁོ་རང་དགུང་གྲངས་བརྒྱ་ཐམ་པ་སོན་ཡོད་པ་དང་། ད་རུང་རྣམ་རིག་གསལ་ཞིང་ལུས་ཕུང་བདེ་ཐང་ཡིན་པར་མ་ཟད་འཇིག་རྟེན་གསར་རྙིང་གཉིས་ཀྱི་ཁ་བརྡ་མང་པོ་བཤད་རྒྱུ་ཡོད། ནམ་རྒྱུན་འཇའ་ལུས་པ་དང་བླ་མ་རིན་པོ་ཆེ་ཡིད་བཞིན་རྣམ་རྒྱལ་མཆོག་རྣམ་གཉིས་ལ་དད་འདུན་ཤིན་ཏུ་ཆེ་བ་ཞིག་ཡིན།
གཞན་ཡང་ཆོས་འབྲེལ་ཐོབ་པའི་བླ་མ་རྣམས་ནི། བླ་མ་རིན་པོ་ཆེ་ཡིད་བཞིན་རྣམ་རྒྱལ་མཆོག་དང་ཤེལ་ཕྲེང་ཚང་། རྡོ་གྲུབ་རྣམ་གསུམ། སྐུ་རྒྱ་ཚང་། མགོ་ལོག་གཙང་སྐོར་སྒང་བླ་མ། ལཱ་མོ་ཡོངས་འཛིན་ཚང་། ཨ་ལགས་སྨན་སོག་ཚང་། པཎ་ཆེན་རིན་པོ་ཆེ་ཆོས་ཀྱི་རྒྱལ་མཚན། གསེར་ལག་ཨ་ལགས་གཙང་བ་སོགས་བླ་མ་དགེ་བའི་བཤེས་གཉེན་མང་པོའི་ཞབས་པད་སྤྱི་བོའི་བཏེགས་ཏེ་སྙིང་ཐིག་སྔོན་འགྲོ་ཀུན་བཟང་བླ་མ་དང་རྩ་གསུམ་དབང་། བར་དོའི་དྲུག་ཁྲིད། ཐུགས་རྗེས་ཆེན་པོའི་དབང་། སྙིང་ཐིག་ཡ་བཞི་དུས་འཁོར་དབང་ཆེན་སོགས་ཀྱི་དབང་ལུང་གང་མང་གསན། ང་བརྒྱད་དུས་འགྱུར་ཀྱི་ཁྲོད་དུ་ཉེས་མིང་གི་ཞྭ་མོ་བསྐོན་ནས་མནར་གཅོད་ཚད་མེད་མྱངས། ནམ་ཡང་ཆོས་དང་བླ་མ་ལ་དད་པ་འགྱུར་མ་མྱོང་ལ་རང་ཚུགས་བརྟན་པོ་དེ་ཡང་བསྒུལ་མ་ནུས། ལོ་བཅུ་གཉིས་སྟེང་མཁན་ཆེན་ཞི་བ་མཚོའི་རྣམ་སྤྲུལ་སྐུ་རྒྱ་རིན་པོ་ཆེའི་མདུན་ནས་མ་ཎི་དུང་ཕྱུར་འདོན་པར་ཁས་ལེན་བྱས། ད་བར་དུ་མ་ཎི་དུང་ཕྱུར་བཅུ་གསུམ་དང་སིངྷི་དུང་ཕྱུར་གཉིས་སྒྲོལ་མ་བྱེ་བ་གཉིས་བཏོན་ཡོད་པ་དང་། ཨག་རྩེའི་ལོ་རྒྱུས་སྟེང་ད་སྔ་བྱུང་མ་མྱོང་བའི་ཆེས་ཚེ་ཐག་རིང་བའི་མི་སྣ་རླབས་ཆེན་ཞིག་ཡིན་ནོ།།

མི་ལོ་དུ་མའི་རྒྱལ་བའི་ཆོས་ཚུལ་ལ།།
ཐོས་བསམ་སྒོམ་པའི་བརྩོན་པ་ཕྲ་ན་ཡང་།།
མི་ཚེ་ཆོས་དང་འཕྲད་པའི་དོན་པོ་རུ།།
འདི་ལ་སེམས་པ་འཁྲེང་བ་ཐེངས་གཅིག་མིན།།

ཚྭ་རིག་རྩེན་གྱིས་