དབེན་པའི་རི་ལ་ཨི་འགྲོ

བསྐྱེད་རྫོགས་རིམ་པའི་གོམ་པ་མེད་ཀྱང་། །
ལྟ་བ་རྫོགས་ཆེན་སྒོམ་པ་མེད་ཀྱང་། །
སྔོན་བྱོན་དམ་པའི་གསུངས་རབ་ཁུར་ཏེ། །
གྲོགས་པོ་དབེན་པའི་རི་ལ་ཨི་འགྲོ། །

འཇིག་རྟེན་ཆོས་བརྒྱད་དག་དང་བྲལ་ཏེ། །
ཟིང་ཟིང་འུར་འུར་འདི་དང་བྲལ་ཏེ། །
ཕ་རྒན་དམ་པའི་སྙིང་པོ་ཁུར་ཏེ། །
རི་ཁྲོད་དབེན་པའི་རི་ལ་ཨི་འགྲོ། །

ཕ་ཡུལ་རིང་མོ་རྒྱབ་ཏུ་བསྐྱུར་ཏེ། །
ཉེ་འབྲེལ་ཆགས་སྡང་མདུན་དུ་གཡུགས་ནས།
བརྒྱུད་པའི་བླ་མའི་གསེར་ཆོས་ཁུར་ཏེ། །
ཀ་ཡེ་དབེན་པའི་རི་ལ་ཨི་འགྲོ། །

རྩམ་ཁུག་ཏ་ལེན་ཕྲག་པར་ཁུར་ཏེ། །
འབྲི་མར་སེར་པོའི་སྣུམ་པོ་མེད་ཀྱང་། །
མི་ཕམ་ཆེན་པོའི་སྙིང་ནོར་ཁུར་ཏེ། །
མཐོན་པོ་དབེན་པའི་རི་ལ་ཨི་འགྲོ། །

ལྟ་སྒོམ་སྤྱོད་གསུམ་གང་ཡང་མེད་ཀྱང་། །
དད་འདུན་སེམས་ཀྱི་མདུན་མ་ཁྱེར་ཏེ། །
བདེ་ཆེན་ཞིང་གི་སྒོམ་ཐང་ཁུར་ནས། །
མཆེད་པོ་དབེན་པའི་རི་ལ་ཨི་འགྲོ། །

རི་རྐྱང་ཤ་བ་ཡུ་མོ་འགྲོགས་ཏེ། །
རྫ་ཆུ་བསིལ་མའི་ཤག་སྒྲ་འགྲོགས་ཏེ། །
བཀྲ་ལམ་བཞད་པའི་མེ་ཏོག་དང་བཅས། །
དབེན་ཞིང་གནས་པའི་རི་ལ་ཨི་འགྲོ། །

ཤིང་འབྲུག ༣. ༢༤ཉིན་པདྨ་རཱ་གས།

2024. 5. 2

འཁོར་བའི་རྒྱ་རུ་ཚུད་དེ་སྒྲོག་གིས་དམ་དུ་བཅིངས་ནའང་རྨི་ལམ་དེ་མངོན་འདོད་ཀྱི་འདུན་པ་ཉམས་མ་མྱོང་ལ། དུས་ཚོད་འཁོར་བསྐྱོད་ཀྱི་ཀློང་ནས་སེམས་ཀྱི་རྨི་ལམ་ཇེ་གསལ་ནས་ཇེ་གསལ་དུ་འགྱུར་བཞིན་འདུག

སྨོན་ལམ།祈祷

ལུས་ལ་ན་ཚ་མེད་པར་ཤོག

愿你身体没有疾病

སེམས་ལ་སྡུག་བསྔལ་མེད་པར་ཤོག

心里没有痛苦

ལུས་སེམས་བདེ་སྐྱིད་ཡོང་བར་ཤོག

身心都能安康

ཅི་བསམ་ལྷུན་གྱིས་འགྲུབ་པར་ཤོག

心想都能事成