མི་ཚེ་ནི་སྡུག་བསྔལ་སྣ་ཚོགས་ཀྱིས་ཁེངས་པ་ཞིག་རེད།
    འོན་ཀྱང་བྱང་ཆུབ་ཀྱི་སེམས་ལ་བརྟེན་ནས།
   གྲོལ་མི་ཐུབ་པའི་སྡུག་བསྔལ་གཅིག་ཀྱང་མེད་པ་རེད།
人生充满了各种各样的痛苦
 但是没有一种痛苦
不能依靠菩提心来解除

དགའ་ལྡན་ནས་འཕོས་སྒྱུ་འཕྲུལ་ཡུམ་ཆེན་གྱི། །
​གླང་ཆེན་མཆེ་དྲུག་དང་ལྡན་ལྷུམས་སུ་ཞུགས། །
ངེས་པར་འབྱུང་ནས་ལོ་དྲུག་དཀའ་སྤྱོད་པས། །
བྱང་ཆུབ་ཤིང་འོག་མངོན་པར་འཚང་རྒྱ་བ། །
དེ་ནས་ཆོས་འཁོར་རིམ་པ་གསུམ་བསྐོར་པས། །
དམ་པའི་ཆོས་འོད་མུན་སེལ་སྟོང་གསུམ་བརྗིད། །
མཇུག་མཐའ་རྩ་མཆོག་གྲོང་དུ་མྱང་ངན་འདས། །
​ལྷ་མིའི་སྟོན་པ་ཁྱེད་ལ་ཕྱག་འཚལ་ལོ། །

སྟོན་པ་ཡང་དག་པར་རྫོགས་པའི་སངས་རྒྱས་དེ་ཉིད་ནས་འགྲོ་བའི་ཤེས་རྒྱུད་དུ་གཏོགས་པའི་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར།ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་རྣམས་དོན་ཧྲིལ་ཏེ་བསྒྲིལ་ན་རྗོད་བྱེད་སྡེ་སྣོད་གསུམ་དང་། བརྗོད་བྱ་བསླབ་པ་གསུམ་དུ་འདུ་ཞིང་། དེ་དག་ཀྱང་ཐེག་པ་ཆེ་ཆུང་གཉིས་སུ་གནས་པས། ཐེག་པ་ཆེན་པོ་ལ་ཡང་མདོ་དང་སྔགས་ཀྱི་ཐེག་པ་མཆོག་གཉིས་སུ་གྲངས་ངེས་པས། དེ་གཉིས་གང་གི་སྒོ་ནས་སངས་རྒྱས་ཀྱི་སར་བགྲོད་ཀྱང་ལམ་གྱི་གཞུང་ཤིང་ནི་བྱང་ཆུབ་ཀྱི་སེམས་རིན་པོ་ཆེ་ལས་གཞན་དུ་མ་མཆིས་པ་ནི། ཇོ་བོ་ཆེན་པོས་བླ་མ་གསེར་གླིང་པའི་མཚན་གསན་པ་ཙམ་གྱིས་ཕྱག་ཐལ་མོ་སྦྱར། སྤྱན་ཆབ་འདོན། ངའི་སེམས་བཟང་པོ་ཁྲིག་གཅིག་ཡོད་པ་འདི་ཁོང་གི་བཀའ་དྲིན་ཡིན་གསུངས་པ་དང་། ཉིན་གཅིག་ལ་སྐུའི་གམ་དུ་ལན་བརྒྱ་བཅར་ཀྱང་དེའི་བར་དུ་སེམས་བཟང་པོར་བྱུང་ངམ་ཤ་སྟག་གསུང་བ་ལས་མེད་པ་འདི་རང་ཅག་བློ་ལྡན་རྣམས་ཀྱི་གོ་རྒྱུའི་གནད་ཆེ་ཞིང་། ཉམས་ལེན་གྱི་གནད་མཐའ་དག་ཀྱང་འདིར་བསྡུས་པ་ཡིན་པས་འདི་དོན་ལ་ཉིན་དང་མཚན་དུ་ཡང་ནས་ཡང་དུ་སེམས་དགོས།ཞེས་གསུངས་སོ།།