ང་ཡི་རྣམ་ཤེས་དཀར་ནག

རྫི་རླུང་།

ཁྱེད་ནི་དགུང་ལ་གསལ་བའི་ཟླ་བ་མ།།
བརྩེ་བ་སྟོང་གི་སྣེ་ལ་དུས་ལྟར་སྤུད།།
ང་ཡི་སེམས་ནས་ཤོར་བའི་སྙན་ངག་ཅིག།
འཁོར་བའི་དཔྱིས་སུ་ཁ་རླངས་ཐུལ་ལེ་བྲོད།།

ཁྱོད་ནི་མེ་ཏོག་མོད་པོའི་མུ་མཐའ་ན།།
བརྩེ་བའི་སྨུག་པ་འཐིབས་པའི་ར་བ་ཞིག།
ང་ཡི་སེམས་ནས་ཤོར་བའི་སྙན་ངག་ཅིག།
ཟོལ་མེད་བརྩེ་བ་ཁྱོད་ལ་ཕྱོགས་ཚུལ་ཡིན།།

ཁྱོད་ནི་གནམ་ལ་རྩེན་བའི་ཁྲུང་ཁྲུང་ཞིག།
ཐག་རིང་རི་བོ་བཤིག་སྟེ་རྒྱང་དུ་བྱེར།།
ང་ཡི་སེམས་ནས་ཤོར་བའི་སྙན་ངག་ཅིག།
གངས་རིའི་སྡིངས་ལས་སྒྲུགས་ཏེ་ཁྱེད་ལ་བསྐུར།།

ཁྱོད་ནི་བྲག་ལ་བཏབ་པའི་ལྕགས་ཕུར་ཞིག།
ལུས་དང་སེམས་པ་གཉིས་ཀ་མགུ་ནས་ཡོད།།
ང་ཡི་སེམས་ནས་ཤོར་བའི་སྙན་ངག་ཅིག།
སྙིང་ཁ་སྤྱང་ཀིས་སྦར་པའི་ན་ཟུག་ཡིན།།

ཁྱོད་ནི་ཨ་གསར་ཆེ་བའི་སྐྱ་མི་ཞིག།
བདག་གི་འཇིག་རྟེན་མནར་གཅོད་མ་བཟོ་རོགས།།
ང་ཡི་སེམས་ནས་ཤོར་བའི་སྙན་ངག་ཅིག།
བརྩེ་བའི་མིག་ཆུ་བསྲེས་པའི་ཟིལ་ཐིགས་ཡིན།།

ཁྱོད་ནི་རྒྱ་མཚོའི་ངོས་ཀྱི་སྐར་མ་ཞིག།
ནམ་ཀའི་ཀློང་དུ་ཉལ་བའི་སྨིན་དྲུག་ཞིག།
མཚན་མོ་རྒྱ་མཚོའི་ཁྲོད་ཀྱི་གྲུ་ཁར་ཞུགས།།
སྙན་ངག་མེ་ཏོག་བསྐོར་བའི་རྩྭ་ཐང་ཡིན༎

རྨི་ལམ་རེ་རེ་
སྤྲིན་དཀར་གྱི་གཟུགས་སུ་བརྫུས་ཏེ་
མུ་མེད་པའི་མཁའ་དབྱིངས་སུ་སྐྱོད་དུས་
ངས་མཚར་སྡུག་ཡོད་ཚད་
གངས་ཀྱི་སྣེ་མོར་བཏགས་ཏེ་རྒྱང་རིང་དུ་བཏང་
སྙིང་ཉེ་བའི་མི་
རྒྱུས་མེད་ཀྱི་རི་གྲོང་འགྲིམ་དུས་
ཚོད་ཚོད་མེད་པར་ང་རང་དྲན་སྲིད་དམ།

ཟླ་འོད་ཀྱིས་རི་གྲོང་ཁེབས་དུས་
ཁྱོད་ཀྱིས་ཁུ་སིམ་མེར་མེ་ཏོག་དང་སྡོང་ལོ་ལ་ཅེར་བཞིན་
གང་ཞིག་ལ་བསམ་གཞིག་བྱེད་དུས་
ངའང་རླུང་བུ་ཞིག་ཏུ་སྤྲུལ་ཏེ་
འཇམ་ཐེང་ངེར་ཁྱོའི་ཉེ་ཟུར་དུ་བཅའ་ནས་
ཁྱོད་ཀྱི་ངོ་གདོང་ལ་བྱིལ་བྱིལ་བྱས་པར་ཚོར་རམ།

ཡིད་ཀྱི་མཚོ་མོ་རླུང་གིས་སྐྱོམ་སྐྱོམ་བྱས།།
གདུང་བ་མ་བཟོད་རྦ་ཀློང་དྲག་ཏུ་འཕྱོ།།
ཁོ་ཧྥེ་བཏུང་ཀྱང་སྐྱོ་བ་མ་སེལ་བས།།
ལྷིངས་འཇགས་ཞི་བའི་རེ་འདོད་གཏམ་ལ་བཅངས།།
__སྟོང་འོད་ཆུང་གིས།