༼སེམས་ཀྱི་གཏིང་རུམ་ནས་ཞི་འཇགས་སུ་མ་སོང་བའི་ཆུ་ཕྲན་གྱི་རླབས་སྒྲ།༽

—— སྔར་འདྲིས་ཀྱི་མི་ཞིག་ལ་གུས་ཕུལ།

དེ་རིང་ང་ཡོད་སའི་གླིང་འདིར་རླུང་བུ་ཡང་མོ་ཞིག་གིས་འཆར་ཡན་ལྟ་བུའི་ལོ་མ་དེ་དག་ཡང་ཡང་དེད་ལ། སེམས་ཀྱི་ཚད་མེད་པའི་མཛེས་སྡུག་ཡོད་ཚད་ཀྱི་བསྡུས་གཟུགས་ཏེ། དབྱར་ཁ་ལྟ་བུའི་དུས་ཚོད་དེ་ཡང་རིམ་གྱི་བརྒལ་ཏེ། བརྩེ་བ་དང་རྨི་ལམ་ཉམས་པའི་སྟོན་ལྗོངས་སྐྱ་བོ་ཞིག་ལས་ཅི་ཡང་མ་མཐོང་། དུས་ཚོད་རིང་པོ་ཞིག་ལ་བརྩེ་བ་མཉམ་གཤིབ་ཀྱིས་དཀའ་སྡུག་རིང་དུ་སྤྱད་པའི་གྲོགས་པོ་ཁྱེད་བློ་ངོ་ལ་ཤར་ཚེ། ད་ལྟའི་མདུན་ལྗོངས་ཀྱི་གནས་བབས་འདི་ནི་ང་ལ་མཚོན་ན་རེ་ཐག་དང་ཁ་དོག་ཅི་ཡང་མེད་པའི་རྨི་ལམ་ཞིག་དང་ཅི་ལ་མི་མཚུངས། ཕ་གའི་ཤིང་སྡོང་གི་ཡལ་གའི་རྩེ་མོ་ལས་མཐོང་བའི་བྱ་བྱེའུ་རྩེད་འཇོ་ལས། ཁྱེད་དང་འུ་གཉིས་ཀྱི་ནར་སོན་གྱི་ལོ་ཟླ་དེ་དག་ཡིད་ལ་དབང་མེད་དུ་འཁོར་འོང་ལ། བློ་རྟབ་རྟབ་པོར་ཁྱེད་ནི་ངའི་གམ་ན་ང་ལ་དྲན་ཚུལ་མང་པོ་ཞིག་ཆུ་མིག་བརྡོལ་བ་ལྟར་ལབ་ཡང་། དཔྱད་པ་ཞིབ་མོར་བཏང་ནས་དྲན་པའི་གཞུ་མོ་ནང་དུ་བཀུགས་ཚེ། ང་ལ་མཛའ་བ་ལྷག་ཏུ་རྒོད་པའི་ཁྱེད་ཀྱིས་ང་ལ་བསྐྱུར་ཡོད་པ་ནི་འདས་སོང་གི་ལོ་རྒྱུས་ཁོ་ན་ཡིན་པ་རྟོགས་དུས། གཞི་ནས་སྐྱོ་གདུང་གི་སྨུག་པ་ཞིག་གིས་སེམས་ཀྱི་རི་བོ་ལ་ཁད་ཀྱིས་དཀྲིས་ཡོང་། ད་ལྟའི་ཁྱེད་ནི་ལང་ཚོ་དང་བཀྲག་མདངས་ངོམ་པའི་གསར་སྐྱེས་གཞོན་ནུ་ཞིག་ཡིན་པ་ལས་གཞན། བརྩེ་བ་དང་དུང་བ་ཡི་ཕྱུག་པའི་བརྩེ་དུང་རྒྱལ་སྲས་ཞིག་ཡིན་པའི་ངེས་པ་ཡང་མི་སྟེར་པ་ག་ལ་ཡོད། ཡང་ན། ཁྱེད་རང་འཇིག་རྟེན་འདི་ལ་ཞེན་པ་ལོག་སྲིད་ནའང་ཐང་མོད། གང་ལྟར་ང་ལ་མཚོན་ན་ཡིད་དཔྱོད་ཁོ་ནས་ཁྱེད་ཀྱི་འཚོ་བའི་རྨི་ལམ་ལ་བསམ་བློ་གཏོང་སྲིད། འདས་སོང་གི་རྨི་ལམ་མང་པོ་ཞིག་ནི་ད་ལྟའི་འཆར་ཡན་དང་བསྡུས་བརྗོད་ཀྱི་ཀློང་ནས་རེ་ཞིག་བག་འཁུམ་པར་གྱུར། བཟློག་མེད་དུས་ཀྱི་རྟ་ཕོ་ནི་གཙང་བོ་བཞིན་མི་སྡོད་སྔོན་དུ་བརྒྱུགས་ཀྱང་། ང་དང་ཁྱོད་ཀྱི་བྱིས་དུས་ཀྱི་ལོ་ཟླ་ནི་ལྷད་མེད་ཀྱང་དྭངས་ཤིང་གཙང་ལ་བརྩེ་བ་དང་ཡིད་ཆེས་ཀྱིས་ཁེངས་པས། དེ་དུས་ཀྱི་རྨི་ལམ་ནི་སྟོན་ཟླ་བརྒྱད་པའི་ཟླ་བའི་མཛེས་པ་བཞིན་ཡིད་ཀྱི་གཙང་ངོགས་ན་མཛེས་པར་ལྷམ་ཡོད། སྔོན་ཆད་ཀྱི་ཁྱེད་ནི་གཞན་གྱི་མིག་ནང་ནས་སྤོ་ཐུང་ཐུང་ཅན་ཞིག་ཡིན་ནའང་། ངའི་མཐོང་སྣང་དུ་གྱུར་བའི་ཁྱེད་ནི་གུ་ཡངས་དང་བློ་སྤོབས་ཆེ་བ། དཀྱེལ་ཡངས་ལ་དཔྱོད་ཤེས་ཆེ་བ། བློ་དང་རིག་པ་དང་མྱུར་གསལ་ལྡན་པ་ཞིག་ཡིན་པ་ནི། ཁྱེད་དང་འདྲེས་ལོབས་སུ་གྱུར་ནས་ལོ་ཁ་ཤས་སོང་རྗེས་ངམ་ངམ་ཤུགས་ཀྱིས་རྟོགས། རང་དང་ཆ་རྒྱུས་མེད་པའི་མི་ཞིག་བརྟག་པ་ལ། མི་མང་ཆེ་བ་ཞིག་ནི་ཡིད་དཔྱོད་ཁོ་ན་ཙམ་གྱིས། གང་ཟག་དེའི་ཆོས་དང་འཇིག་རྟེན་གཉིས་ཆར་ལ་མཐུན་མི་མཐུན་བསམ་བློ་བཏང་ནས་ལུས་སེམས་གཉིས་ཀྱི་སྤྱོད་པ་ཀུན་མཐུན་ཡིན་མིན་ཐག་གཅོད་བཞིན་ཡོད། ང་ཡང་དེ་བཞིན་ཡིན་ལ་ཁྱེད་ལ་ལྟ་ཚུལ་མི་ལེགས་པ་བཅང་མཁན་གྱི་གང་ཟག་དེ་ཚོ་ཡང་དེ་བཞིན་ནོ། མི་སུ་དང་སུ་ཞིག་ལ་མཛའ་གཅུགས་ཆེ་བའི་གྲོགས་པོ་ཞིག་ཡོད་དུས། སོ་སོར་བྲལ་བའི་དུས་ནི་ཕྱིར་དྲན་དང་སྐྱོ་གདུང་མོད་པོ་ཞིག་ལས་རང་ཉིད་ཀྱི་གྲོགས་པོ་དེའི་བསྡུས་གཟུགས་གསར་བསྐྲུན་བྱེད་པ་ཡིན། མཇུག་མཐར་ཁྱེད་ཀྱི་བྱ་བ་ལམ་འགྲོ་ཡོང་བའི་ཁ་གཡང་དང་བཅས། དབྱིངས་ནས།

སྙིང་ཉེ།

རྨ།

ཕྱི་ཡི་མཛེས་སྤྱོད་ལ་ཡག་འདུག་ངས་མི་གླེང་། །
ནང་སེམས་གཤིས་ག་རང་ཡག་ན་དེ་གའི་ཆོག།
འཇིག་རྟེན་མཛེས་མ་ཡི་དཔང་པོར་གྱུར་ན་ཡང་།།
ང་རང་ཁྱོད་རང་ལས་སུ་ཞིག་དགོས་མ་མཆིས།།

ཞག་དང་ལོ་ཟླ་ཡི་དྲན་པ་ངས་མི་གླེང་། །
ཞེ་འདྲེས་པགས་འདྲེས་ཞེས་བཤད་པ་ངས་མི་བཤད།།
གོ་ལ་ཟླུམ་པོ་འདི་ཆགས་འཇིགས་བྱུང་ཡང་རུང་།།
ཁྱོད་ཞེས་འབོད་པ་ཞིག་མེད་ན་ང་མི་ཆོག།

ང་མཛའ་ཁྱོད་མཛའ་ཡི་གླེང་མོར་ངས་མི་བཤད།།
ཞེ་འདང་ཤབ་ཤུབས་ཀྱི་གཏམ་རྒྱུད་ངའི་གླེང་།།
ཡ་ཆུང་དྲན་པ་འདི་རྟོགས་ཐབས་མེད་གྱུར་ཀྱང་། །
ཁྱོད་ཉིད་བརྗེད་པ་ཡི་དམ་བཅའ་ངས་མི་འཇོག།

དགའ་མའི་དུས་ཆེན་ལ་ཁྱོད་རང་དྲན་ཡོང་ཐལ། །
དགའ་སྐྱོ་ཟུང་འབྲེལ་ཉིན་ཁྱོད་ཉིད་དྲན་ཡོང་ཐལ། །
མི་ཚེའི་ཐབས་ག་འདི་ཆད་རུལ་མཐའ་བར་དུ།།
དྲན་གདུང་ལྦུ་ཆང་གིས་ཁྱོད་ཉིད་སྒུག་ནས་ཡོད།

རྙིལ།

ངོ་གཉིས་མས།
བརྩེ་བའི་དམུ་ཐག་ཆད་པའི་ཚེ་ཐོག་འདི་ནས། །
ཁ་ཐག་རིང་བའི་ཚུལ་གྱིས་བར་ཐག་འཛིན་སོང་། །
ཆུང་གྲོགས་སྙིང་ལ་རྗེ་བོ་བློ་ཁ་ལོག་སྟེ། །
འདུ་ཚོགས་སེམས་སྡིག་ལྕི་མོ་ང་ལ་བསྐྱུར་ནས། །
གོམ་པ་རྟབ་རྟབ་བརྫིས་ནས་གཞན་ཡུལ་བུད་སོང་། །

ན་ཚོད་ཆུང་བའི་དུས་ཀྱི་ཕྱིར་དྲན་མོག་མོག །
སྐར་ཁུང་ཁ་ལ་འགྲེང་ནས་ཞབས་བྲོ་རྩེད་ཀི །
འུ་གཉིས་བྱིས་པའི་སྐབས་ཀྱི་དུངས་སེམས་རིང་མོ། །
མ་འོངས་འཚོ་བའི་ཁྲོད་དུ་ཨེ་ཡོང་མི་ཤེས། །
ཡོང་རུང་ད་ལྟའི་བརྩེ་སེམས་ཡོད་མིན་མི་ཤེས། །

དེད་ཀྱིན་དེད་ཀྱིན་རྒས་པའི་གྲོང་ལ་འགྲོ་ཁུ། །
འཚོ་བཞིན་འཚོ་བཞིན་སྐྱེ་བ་འདི་ཉིད་རྫོགས་དུས། །
དུངས་བ་ཧ་ཅང་ཟབ་པའི་རི་ལུང་འདི་ནས། །
འུ་གཉིས་ཡང་བསྐྱར་འཕྲད་པའི་སྟབས་ཁ་ཨེ་འགྲིག །
སྟབས་ཁ་འགྲིག་རུང་དུངས་སེམས་ཡོད་མེད་མི་ཤེས། །