དལ་རྟེན་གྱི་ཆུན་པོ།

རྣམ་དག་ཞི་བའི་བདག་གཞན་བརྩེ། །
གང་ཡང་སྦྱོར་བའི་ལས་དག་ནི། །
ཕན་བདེ་བསྐྲུན་པའི་སྤྱོད་པ་གཅེས། །
སྙིང་བོ་དབྱར་གྱི་ལྗོན་བཞིན་བསྐྱེད། །

དག་པ་ལྷ་ཡི་སྐུ་བཞི་ལ། །
ཉེ་བར་བཅར་བའི་སྐྱེ་བུ་རྣམས། །
ངང་བཟང་མཛེས་པའི་ནམ་མཁའ་བཞིན། །
ཡོད་ཏན་བདུད་རྩིའི་འབབ་ཆུ་རྡོལ། །

ཐ་མལ་སོ་སྐྱེས་ཨག་གསར་རྒོད། །
མ་དག་མཚར་སྣང་སྤྱི་བོར་བཏེགས། །
རྣམ་གཡེང་སྤྲིན་གྱི་རྒྱ་མཚོ་འཁྱིལ། །
ལོག་པའི་དུག་ཆུ་སོམ་མེད་རྔུབས། །

ད་ནི་ཟིན་མེད་ཡིད་ཀྱི་སྒོར། །
འཆོས་པའི་གླེགས་བམ་བཀོལ་བྱས་དེ། །
བསོད་ནམས་མེ་རྟགས་ཙམ་རེ་ཡང་། །
ཡིད་ཀྱི་ཐུགས་ལ་ཨེ་འཚེར་གོམས། །     

ཚངས་དབང་དགེ་འདུན་བསྟན་པ་སོགས་ཀྱིས་འདི་ནི་སྟོན་པ་དངོས་ཀྱི་པར་རེད་ཅེས་ཁྱབ་བསྒྲགས་བྱས་ནས། ཨེ་ཤུ་མ་ཤི་ཀའི་པར་འདི་བོད་པ་མང་པོ་ཞིག་གིས་མཆོད་ཁང་དུ་བཞག་མྱོང་བ་མ་ཟད། ཟི་ལིང་གི་རྩ་མ་ཚང་ཞིག་གིས་སྙན་རྩོམ་ཞིག་ཀྱང་བྲིས་ཡོད་པར་བཤད།
     ཁོ་ཚོའི་བསམ་བློ་གཏོང་ཚུལ་ཁྱད་མཚར་རེད། འདི་སྟོན་པ་ཡིན་པའི་དཔང་རྟགས་ཅི་འདུག། ཚངས་དབང་སོགས་ཀྱིས་བླུན་བཤད་ལས་གཞན་ཅི་ཡང་མི་འདུག་མོད། ཁྱོད་ཚོས་འདི་སངས་རྒྱས་ཀྱི་སྐུ་ཡིན་པའི་སྒྲུབ་བྱེད་གཅིག་ཁྱེར་ཤོག་དང་། ངས་འདི་ཨེ་ཤུའི་མ་ཤི་ཀའི་སྐུ་ཡིན་པའི་སྒྲུབ་བྱེད་བརྒྱ་ཁྱེར་ཡོང་། མ་རེད་དམ།
       བོང་རྫིས་སྟོན་པའི་སྐུ་མིན་པའི་སྒྲུབ་བྱེད་འགོད་པ།
     ཁྱེད་ཅག་གིས་འདོད་པའི་མཁས་པ་ཚོས་འདི་འདྲའི་རྨོངས་གཏམ་བཤད་ནས་ལོག་ལམ་དུ་ཁྲིད་པ་ཡིན་ཀྱང་། འགན་ཁུར་ཅི་ཡང་དགོས་པ་མ་རེད། ངས་སྔོན་ནས་བཤད་ཡོད། ང་ཚོས་རིག་ཁྲམ་པ་ཚོ་ཚར་མ་བཅད་ན་རིག་གཞུང་རྣལ་མ་དང་། དྲང་མོ། བདེན་པ་དང་རིགས་པ་གཙོ་བོ་བཟུང་བའི་ཤེས་རིག་ཅིག་དར་མི་སྲིད།
    སྤྱིར་བཏང་ཚངས་དབང་དགེ་འདུན་བསྟན་པ་ངའི་གྲོགས་པོ་ཡིན། ཡིནའང་དགེ་ཆོས་ཀྱི་སྐོར་ནས་བཟུང་། སྐད་ཆ་དྲང་མོར་བཤད་མ་སོང་། དེ་མ་རེད་ཅེས་གསལ་བོར་བཤད་པ་ཡིན་མོད། ད་དུང་ཁས་ལེན་བྱས་མ་སོང་། སེམས་ཕམ་དང་། བློ་འགྱོད་ཡོད།
      ད་དུང་གོ་བ་ལ། དེ་དུས་ཟི་ལིང་གི་རྐྱལ་སྟོང་འགའ་ཡིས་འདི་སངས་རྒྱས་ཡིན་ཟེར་ནས། སྐྲ་འདི་འདྲ་བཞག་པར་བཤད། ག་ལེར་བཤད་འོང་། ཧ་ཧ་ཧ
     ཚངས་དབང་དགེ་འདུན་པ་བསྟན་པ་སོགས་ཀྱིས། ཨེ་ཤུའི་སྐུ་འདི་དབྱིན་ཇིའི་རྒྱལ་ཁབ་གྱི་འགྲེམས་སྟོན་ཁང་ན་འདུག་ཟེར། འགྲེམས་སྟོན་ཁང་གི་མི་ཚོས་དེ་འདྲ་ཡོད་པ་ཕར་ཞོག། གོ་ཡང་མ་མྱོང་ཟེར། རི་མོ་འདིའི་འབྲི་ལུགས་སོགས་ལ་བལྟས་ན་རྙིང་བ་ཞིག་ཀྱང་མ་རེད་ཟེར། དེ་ན་རི་མོ་གང་ནས་བྱུང་བ་རེད་དམ།
     འདི་སྟོན་པའི་སྐུ་མིན་པ་རི་མོའི་ལོ་རྒྱུས་ཅུང་ཟད་ཤེས་པ་དག་གིས་བལྟས་པ་ཙམ་གྱིས་ཤེས། ལོ་ངོ་ཉིས་སྟོང་གོང་གི་འདི་འདྲའི་རི་མོ་ཞིག་འཛམ་གླིང་གང་དུའང་ཡོད་པ་མ་རེད།   
                                       2019/06/01

བོད་ཀྱི་གཡང་ཟོག་གཡག་གི་རང་བཞིན་བརྗོད་པ།

དོར་ཞི་གདོང་དྲུག་སྙེམས་བློ།

སྟག་གཟིག་དོམ་དྲེད་སྙིང་རྩ་འདར་བྱེད་པའི།།
རྭ་ཟུང་མཚོན་ཆ་མཁའ་ལ་གདེངས་པ་ཁྱོད།།
རང་གི་མཛའ་བོར་ཞེ་རྒྱུད་བལ་ལས་འཇམ།།
བྱིས་པ་བུད་མེད་རྣམས་ཀྱང་རྒྱབ་ཏུ་འཁུར།།

ཁ་ནས་གཞན་ཕན་ཆོས་སྐད་མི་སྨྲ་ཡང་།།
རང་གི་ཤ་ཚིལ་ནང་ཁྲོལ་ཀོ་རྩིད་དང་།།
ཐ་ན་ལྕི་བ་བཏང་བ་ཡན་ཆད་ཀྱིས།།
གཞན་ལ་ཕན་པ་འབའ་ཞིག་ཁྱོད་ཀྱིས་སྒྲུབ།།

བོང་བུས་ཁུར་ཆེན་འདེགས་པར་མ་བཟོད་པར།།
ཨ་རབ་ཚོང་པའི་རྗེས་སུ་འབྲངས་ནས་སོང་།།
གཉའ་བར་རི་དེའུ་ཙམ་ཞིག་བཀལ་ན་ཡང་།།
མི་འདོད་འཁུན་སྒྲ་ཙམ་ཡང་ཁྱོད་ལ་མེད།

ཅང་ཤེས་རྟ་བོ་གསེར་སྒ་ཐོབ་པའི་ཕྱིར།།
སྟོང་འཁུན་རྒྱལ་བོའི་འཕོང་གི་ཆིབས་རྟ་བྱས།།
ཁྱོད་ཀྱིས་རྔ་རྩིད་མཛེས་སྡུག་ལན་བུ་ཡང་།།
གཞན་དག་འཚོ་བའི་རྟེན་དུ་ཕངས་མེད་སྦྱིན།

ནོར་སྐྱོང་རྣམས་ནི་རུས་པ་འཆའ་བའི་ཕྱིར།།
ཧོར་སེར་དམག་གི་ཤ་ཁྱི་གཏུམ་པོ་བྱས།།
ཁྱོད་ནི་རི་རྩྭ་ཁམ་གང་མ་རྙེད་པར།།
མུག་ཤིར་གྱུར་ཀྱང་བདག་པོར་འབྲལ་མི་བྱེད།།

སེང་གེ་གངས་ཀྱི་གྲང་ངར་མ་བཟོད་པར།།
ཧྥེ་གླིང་ནགས་ཚལ་སྟུག་པོའི་གསེབ་ཏུ་བྲོས།།
ཁྱོད་ནི་ཐོག་མ་མེད་ནས་ད་ལྟའི་བར།།
སྐྱེས་ཡུལ་མཐོ་སྒང་བློ་ཡིས་བཏང་བ་མེད།།

བྱུ་རུའི་སྡོང་བོ་འཁུར་བའི་ཤ་བོ་དང་།།
གསེར་གྱི་རྐྱལ་བ་ཐོགས་པའི་གླ་བ་དང་།།
ཤེས་རབ་རལ་གྲི་སྒྲེང་བའི་རི་བོང་རྣམས།།
རང་བདེ་ཁོ་ནར་འབད་པས་ཁྱོད་བས་དམན།།

ཤ་ཚིལ་མཐོང་ཚེ་འོང་བའི་ཐང་དཀར་རྒོད།།
མེ་ཏོག་ལྡན་དུས་གླུ་ལེན་གཞན་གསོས་བུ།།
མཚན་མོའི་སྨག་ལ་དགའ་བའི་འུག་པ་རྣམས།།
གཤོག་ཟུང་ལྡན་ཡང་ཁྱོད་ཀྱི་དོ་ཟླ་མིན།

དྲེལ་ལྟར་རང་མིར་ཕྲ་ཁ་ཚད་པ་མེད།།
ལུག་ལྟར་དགྲ་ལ་གཉོམ་ཁུར་གླེན་རྟགས་མེད།།
ཕག་ལྟར་ཁྱིམ་གྱི་གྱང་རྟིང་སློག་པ་མེད།།
ལོའུ་ལྟར་ནང་རྐུན་བྱེད་པའི་སྤྱོད་ངན་མེད།།

གཞན་ལ་ཕན་བཏགས་ཕན་ལན་རེ་བ་མེད།།
རྩྭ་ཆུ་ཁྱུ་དང་མཉམ་སྤྱོད་སྒེར་སེམས་མེད།
རླུང་དང་ཁ་བ་ཆར་ཆུར་སྐྲག་པ་མེད།།
ལྟོགས་གྲང་བཀོལ་སྤྱོད་སྡུག་བསྔལ་མི་ཁྱགས་མེད།།

མིག་རྩ་དམར་ཡང་གཞན་འབྱོར་འཕྲོག་འདོད་མིན།།
ཁྲོ་གཉེར་བསྡུས་ཀྱང་གཉེན་ལ་སྡང་བ་མིན།།
རྭ་ཁ་རྣོ་ཡང་ནང་ལ་གཟས་པ་མིན།།
ངུར་སྒྲ་སྒྲོགས་ཀྱང་ལྟས་ངན་གཏོང་འདོད་མིན།།

དར་ཟབ་གོས་དང་གསེར་དངུལ་རིན་ཆེན་རྒྱན།།
མ་བགོས་ལུས་ཀུན་སྤུ་ཡིས་ཁེབས་ན་ཡང་།།
བསྔགས་འོས་ཡོན་ཏན་སྤྱོད་བཟང་རིན་ཆེན་རྒྱན།།
མི་ཡི་བསླབ་བྱར་གྲུབ་འདི་མི་མཛེས་སམ།།
 
ཞེས་པ་འདི་ནི1986ལོའི་ཟླ7པའི་ཚེས1ཉིན་ལ་ནུབ་བྱང་མི་རིགས་སློབ་གྲྭ་ཆེན་མོ་ནས་བྲིས་ཏེ་ལོ་དེའི《ཟླ་ཟེར》དུ་བཀོད