སྤྲང་འཁྱམས་ཚུལ་བྲིས་ལས་བཤུས། རྒྱང་རིང་ལྷ་

首页发布

སྤྲང་འཁྱམས་ཚུལ་བྲིས་ལས་བཤུས།

རྒྱང་རིང་ལྷ་རྫིང་སྔོན་མོའི་ཉེ་འདབས་ཤིག་ཏུ།།
ལྟོ་ཁྲག་འཕོས་བའི་ཡུལ་ལུང་རྗེས་ཤུལ་དྲན་ན།།
གསར་སྐྱེས་མེ་ཏོག་རྐང་གཉིས་གཞོན་ནུ་དེ་ཡིས།།
རྩེད་རྭའི་ནང་གི་སྤྲོ་ཉམས་མཚར་སྡུག་དྲན་སོང་།།

སྔོན་བསགས་ལས་ཀྱི་རྣམ་སྨིན་དགེ་བའི་འབྲས་བུ།།
གོམ་ཁ་སྤོ་བའི་ཤེས་བྱ་རེག་ཙམ་ཤེས་རྗེས།།
མདོ་སྨད་ཆོས་ཁུངས་ཀུན་མཁྱེན་གདན་ས་ཉིད་དུ།།
ཐོག་མར་མཇལ་བའི་སྐལ་བ་བཟང་བོ་འཆར་སོང་།།

ཆུང་ངུའི་དུས་ནས་ལུས་སྦྱིན་ཕ་མས་དྲུང་དུ།།
ཕྱུགས་རིགས་གསོ་སྤེལ་ཞིང་པའི་ཤེས་བྱ་ཕྲན་བུ།།
དང་དུ་བླངས་པའི་བྱིས་དུས་སྦྱངས་འབྲས་དྲན་ན།།
ངུ་མ་དགོད་ཀྱི་འཚོ་བའི་མཛེས་སྡུག་བཀྲ་བ།།

དེང་དུས་སྐྱེས་པོ་ཀུན་དང་མཚུངས་པའི་ཁག་གཅིག།
ཞོ་འཐུང་རྣམས་ཀྱིས་སྦྱང་བར་བྱ་བའི་སློབ་ཁྲིད།།
འགྲོ་ཁུལ་བྱས་ཀྱང་ཡིད་དུ་ཅི་ཡང་མེད་པ།།
རྣ་བའི་ཐོས་ཀྱང་སེམས་སྒོ་འབྱེད་མེད་ཁྱད་ཆོས།།

ལྡོག་ཏུ་མེད་པའི་ལས་དབང་རྒྱལ་མོའི་བཀའ་དེ།།
ནམ་མཁའི་ཐོག་མདའ་བཞིན་ཏུ་དབང་མེད་འཆར་དུས།།
ཕ་མ་ཕུ་ནུ་ཉེ་འབྲེལ་ཡོངས་སུ་རྫོགས་པ།།
སྐྱུར་ཅིང་ས་མཐར་འགྲིམ་པ་སྔོན་བསགས་འབྲས་རེད།།

ཆོས་སྒོ་ཞུགས་ཏེ་མཚན་ལྡན་བླ་མའི་དྲུང་དུ།།
རབ་ཏུ་བྱུང་ཞིང་དམ་ཆོས་མང་དུ་ཐོས་པ།།
སྤྲང་མཁྱམས་བདག་གི་ཉུལ་བའི་ཚུལ་དེ་དང་པོ།།
བཀྲ་ཤིས་མེ་ཏོག་དཀར་པོ་འདི་ནས་ཐོར་སོང་།།

གནས་ཀྱི་བླ་མ་ཡང་དག་དགེ་བའི་བཤེས་གཉེན།།
མཇལ་ཅིང་མ་རིག་དྲི་ངན་བྱུགས་པའི་ང་ལ།།
བརྩེ་བ་སྙིང་རྗེའི་ཆེན་པོས་རྗེས་སུ་བཟུང་ཏེ།།
འཁྲུལ་བྲལ་ཡང་དག་ལམ་ལ་འགོད་པ་འདི་དགེའོ།།

མི་རིགས་ཤིག་གི་སྲོག་རྩ་གཅོད་བྱེད་ཀྱི་མཚོན་ཆ་གསུམ།
གཅིག ལོ་རྒྱས་ལ་འཁྱོག་བཤད།
གཉིས། རིག་གཞུང་ལ་ངན་སྨད།
གསུམ། སྐད་ཡིག་རྩ་མེད་ལ་གཏོང་བ།
༢༠༢༡ལོའི་ཟླ་༤ཚེས་༨ཉིན་མཁས་དབང་ཚུལ་ཁྲིམས་བློ་གྲོས་མཆོག་ནས།

གལ་ཏེ་ཁྱེད་ཀྱིས་དོན་དག་གང་དང་གང་འཕྲད་རུང་། མདུན་ནས་གཞན་གྱིས་སྣེ་འཁྲིད་བྱེད་པར་རེ་བ་དང་། རྒྱབ་ནས་གཞན་གྱིས་སྐུལ་འདེད་གཏོང་བར་སྒུག་བསྡད་ཚེ། ཁྱེད་ཀྱི་ལས་དབང་ནི་ཕག་པ་འདི་་དང་གཅིག་མཚུངས་སུ་འགྱུར་སྲིད།[泪]