࿑ གུ་ཡངས་ཀྱི་འཁོར་ཡུག་ནས་ལྷིང་འཇགས་ཀྱི་སེམས་ཁམས་འཚོལ། རིག་གནས་ཀྱི་འགྲུལ་བཞུད་ཁྲོད་གླེགས་བམ་གྱི་ཞིང་ཁམས་ཉུལ། དེ་ནི་ཕ་མཐའ་ཡས་པའི་བདེ་སྐྱིད་ཀྱི་ལོངས་སྤྱོད་གཞན་ཞིག་གོ། །

࿑ “ནུབ་རིའི་ལ་ཁའི་རྩེ་ནས། །
ཟླ་བས་ཕྱིར་མིག་བལྟས་བྱུང་། །
ཐོ་རངས་ཤར་གྱི་སྐར་ཆེན། །
སྐྱུར་འདོད་མེད་པ་ལོས་ཡིན། །

ནམ་མཁའི་རྒྱུ་སྐར་ཁྲ་མོ། །
མི་བརྟན་སང་འགྱུར་གནང་འགྱུར། །
ང་ཡི་སྐར་མ་ཨ་བརྟན། །
ཅི་འདྲའི་གཏན་ཚིགས་ཆེ་བ། །”

༼རི་གསེབ་ཀྱི་མཐོང་ཐོས༽
࿑དེ་རིང་རྒོད་ཀྱི་ཁྱུ་ཚོགས་ཤིག་བར་སྣང་དུ་ལྡིང་སྐོར་རྒྱག་གིན་འདུག
གནའ་མི་དག་གི་ངག་རྒྱུན་ལ་དེ་ཚོ་ནི་སྤྱིར་བཏང་གི་བྱ་རྒོད་ཙམ་མ་ཡིན་པར་མཁའ་འགྲོ་མ་དག་གི་སྤྲུལ་བ་ཡིན་པར་བཤད།

དོན་དངོས་དེ་འདྲ་ཞིག་ཡིན་ནམ་ང་ཚོས་རང་ཉིད་ཀྱི་སྙིང་ཉེ་བའི་མི་དག་གི་ལུས་ཕུང་ལྷག་མེད་དུ་དེ་ཚོས་ཁ་ཟས་སུ་བརྟེན་པ་མ་བཟོད་པར་རང་ཉིད་ལ་སེམས་གསོ་བྱེད་སྟངས་ཤིག་རེད།
གང་ཡིན་ཆ་མ་འཚལ་ཡང་དེ་ཚོ་ནི་ཧ་ཅང་ཤ་ལ་རྔམ་ཞིང་ལྷག་ཏུ་མི་ཤ་ཟས་སུ་བརྟེན་རྒྱུར་ལྷན་སྐྱེས་སུ་དགའ་བོ་ཆགས་འདུག

དུར་ཁྲོད་དུ་མི་རོ་ཞིག་བོར་བའི་ཚེ་ན།

དེ་ཚོ་ནི་གང་ནས་ཐོན་པ་མ་ཤེས་པར་ལེ་དབར་ཁྲི་ཕྲག་གི་ལམ་ཐག་སྒྲོ་གཤོག་གིས་བཅད་དེ་སྐད་ཅིག་ཉིད་ལ་སླེབས་ཡོང་།
མི་རྣམས་ཀྱིས་དེ་ཚོ་ལ་མངོན་ཤེས་ཡོད་པར་བཤད།

མངོན་ཤེས་ཡིན་པར་མི་ཤེས་ཀྱང་ལས་ཀྱི་སྟོབས་ཀྱིས་ཤེས་བྱེད་ཅིག་ཡོད་པར་སྙམ། དེ་འདྲ་མིན་ན་རེ་ཟུང་སྟེས་དབང་གིས་ཕྲད་དུ་ཆུགས་ཀྱང་ནམ་རྒྱུན་དེ་འདྲའི་སྟེས་དབང་ཡོད་མི་སྲིད། བྱ་རྒོད་དག་ཤ་ལ་རོལ་སྐབས་སྒྲིག་ལམ་ནི་ཅུང་འཐུས་སྒོ་ཚང་བ་ཞིག་ཀྱང་ཡོད། ཁོ་ཚོ་ནི་ཧ་ཅང་མི་ཤར་རྔམ་སྟངས་ལ་བལྟས་ན་མི་རོ་ཧྲིལ་བོ་ཞིག་གིས་བྱ་རྒོད་བཅུ་གྲངས་ཤིག་གི་ལྟོ་བ་ལས་མི་འགྲང་བ་འདྲ། ཡིན་ན་ཡང་ཉིན་འགའི་སྔོན་དང་དེ་རིང་ལ་བལྟས་ན་ཕལ་ཆེར་བྱ་རྒོད་བརྒྱ་ཕྲག་ཅིག་ཡོད་པར་སྙམ།

ཁོ་ཚོས་ཡང་ནས་ཡང་དུ་བར་སྣང་ནས་ལྡིང་སྐོར་རྒྱག་པ་དང་རེས་འགའ་འགྱིང་ཉམས་ཀྱིས་རི་ངོས་སུའང་བབས་ཡོད་འདུག
ཁོ་ཚོས་མི་རྣམས་ལ་མཁའ་དབྱིངས་ནས་འཕུར་རྩལ་ངོམ་པ་རེད་དམ་ཡང་ན་ད་དུང་ཅི་ཞིག་གིས་ཡིད་མ་ཚིམས་པ་ལྟ་བུའི་འགྱིང་ཉམས་དེས།
ཁོ་ཚོར་མངོན་ཤེས་ཡོད་པས་ད་དུང་མི་བུ་རེ་ཟུང་གི་ལུས་པོ་དུར་ཁྲོད་དུ་སྐྱེལ་དགོས་ཚུལ་བསྟན་པ་རེད།

གང་ལྟར་ནམ་ཞིག་གི་ཚེ་བདག་ཀྱང་ཁོ་ཚོའི་ཁ་ཟས་སུ་འགྱུར་འགྲོ་བར་བསམ་ན་བདག་ནི་བྱ་རྒོད་ཀྱི་ཁྱུ་ཚོགས་དེ་ལ་ཅུང་ཟད་འཇིགས་སྣང་ཞིག་ཀྱང་སྐྱེས་སོང་། ༢༠༢༢\ ༡༡\ ༥\ ཉིན་རྨ་པྲཛྙཱ་ནས།