རིགས་ཀྱི་ཨེམ་ཆི། 

                   རྩོམ་པ་པོ།          ཟླ་བ་གཞོན་ནུ། ༼ ཧུང་ཡོན། ༽ 

ངོས་ཀྱི་ཡུའུ་ཞེས་གླེང་ནས་ཐུགས་ཀྱིས་གཅེས་གཅེས་གནང་ཞིང་། །
རིགས་ཀྱི་ཀ་ཆེན་བཞི་ཞེས་རིགས་ལ་ཡང་ཡང་གསུངས་དུས། །
འདི་ཕྱིའི་ལམ་ལ་གཟས་པའི་ཞལ་གདམས་མང་མང་མཛད་པའི། །
སྣང་བ་འོད་པོ་ཆེ་ཁྱོད་གངས་ཀྱི་ཉི་གཞོན་ཞིག་ཡིན། ། 

བྱམས་པའི་བརྩེ་བ་གླེང་ནས་འཚེ་མེད་ཞི་ལམ་བསྐྲུན་ཅིང་། །
མར་གྱུར་འགྲོ་བའི་གནས་ཞེས་བསིལ་ཆར་ཡང་ཡང་འཇོ་དུས། །
ཕྱོགས་ཀུན་བདེ་བའི་གནས་སུ་ཐབས་བརྒྱ་ཇུས་སྟོང་མཛད་པའི། ། 
རིགས་ཀྱི་སྲུང་མ་ཁྱོད་རང་སེམས་ཀྱི་ཞི་བའི་ལྷ་ཡིན། །

ང་ཡི་བོད་ཅེས་གླེང་ནས་རྒྱལ་ཁམས་ཀུན་ལ་བསྐོར་ནས། ། 
དབྱངས་གསལ་ཉི་ཟླ་ཟུང་ཞེས་ཞབས་རྗེས་ཡོངས་ལ་བཞག་དུས། ། 
གངས་ཀྱི་གཡུ་རལ་ཅན་ཁྱོད་རིགས་ཀྱི་གོ་ཆ་ཞིག་རེད། ། 
སེམས་ཀྱི་སེམས་དཔའ་ཆེན་མོ་སེམས་ཀྱི་གུས་ཤིང་འདུད་དོ། །

༢༠༢༡/༡༡/༢༦ ཉིན། མཁས་ཆེན་དམ་པ། མཁན་པོ་ཚུལ་ཁྲིམས་བློ་གྲོས་མཆོག་གི་བཀའ་དྲིན་དྲན་ཏེ་བྲིས་པའོ།། 

ཉི་མ་ལྷ་ས།
མེས་པོ་སྲོང་བཙན་གྱིས་ཁྱེད་ཀྱི་དབུ་འཕང་བཏེགས་པ་ནས་བཟུང་།
ཁྱེད་ཀྱིས་ལོ་ངོ་བརྒྱ་ཕྲག་དུ་མར་ང་ཚོས་དབུ་འཕང་བཏེགས་ཏེ་འོངས།
ཀླུང་རྟ་རྒུད་པའི་དུས་ཚོད་འདི་རུ་བསླེབས་ཟིན་དུས།
ངོ་ཚོས་ཀྱང་ཁྱེད་ཀྱི་དབུ་འཕང་ཐེངས་ཤིག་འདེགས་པར་འདོད་མོད།
ཡོད་ཚད་འདི་འདྲའི་རང་དབང་ལ་མི་འོང་བ་ཞིག་རེད།
ང་ཡི་ཉི་མ་ལྷ་ས། ང་ཚོའི་ཉི་མ་ལྷ་ས།
ཁྱེད་ལ་ཡུལ་དབུས་ཞེས་འབོད་ཐེངས་རེར།
ལོ་རྒྱུས་ཀྱི་རྦ་རླབས་བྲང་ཁོག་ཏུ་ལྡང་འོངས།
ཁྱེད་ལ་ལྷ་ལྡན་ཞེས་འབོད་ཐེངས་རེར།
ཕ་མེས་ཀྱི་གཟི་བྱིན་འགྲམ་ངོས་སུ་ཕོག་འོངས།

༢༠༢༢-༩-༡༦

རང་ཉིད་ལ་བསྐུལ་བའི་གཏམ་མ་ལོའི་ཐལ་ལྕག
༡༽
ནང་བར་འཇུག་པའི་ཐར་ལམ་སྒོ་མོ་ཆེ།།
བསླུ་མེད་གཏན་གྱི་སྐྱབས་མཆོག་དབང་གི་རྒྱལ།།
རང་གཞན་འཇིགས་པ་ཀུན་ལས་སྐྱོབ་པའི་ཕྱིར།།
ཁྱད་པར་བཞི་ལྡན་ངང་ནས་སྐྱབས་སུ་བསྟེན།།
༢༽
དམ་ཆོས་རྣལ་མ་སྒྲུབ་པའི་ས་བོན་མཆོག།
བློ་ལྡོག་རྣམ་བཞིའི་ཉམས་ལེན་མ་ནོར་བ།།
ངེས་འབྱུང་ལམ་གྱི་རྩ་བ་སྐྱེ་བའི་ཕྱིར།།
ཁ་དང་ལག་ལེན་མཐུན་པའི་སྒྲུབ་པ་གྱིས།།
༣༽
ཡོན་ཏན་ཀུན་གྱི་གཞི་རྟེན་ཚུལ་ཁྲིམས་ཉིད།།
དམ་ཆོས་འདུལ་བའི་ལག་ལེན་མ་ནོར་བ།།
སྲོག་གི་ཕྱིར་དུ་དམ་བཅའ་མི་འདོར་བར།།
དཔྲལ་བའི་མིག་འབྲས་བཞིན་དུ་སྲུང་བར་གྱིས།།
༤༽
བླ་མ་སངས་རྒྱས་དངོས་མཐོང་དད་པའི་སྦུབས།།
ལུས་ངག་ཡིད་ཀྱི་བསམ་སྦྱོར་ཚུལ་བཞིན་བསྟེན།།
ལེགས་ཚོགས་དངོས་གྲུབ་མ་ལུས་འབྱུང་བའི་ཕྱིར།།
མདོ་སྔགས་བདུད་རྩིའི་གདམ་པ་རྒྱ་ཆེར་གསོན།།
༥༽
མདོར་ན་མཁས་བླུན་མང་པོས་བསྟོད་སྨད་ཀྱང་།
ཚེ་འདིའི་བསྟོད་བཀུར་རྗེས་སུ་མི་བསྙེག་པར།།
མཆོག་གསུམ་ལས་འབྲས་དཔང་བཙུག་བྱ་བ་ཀུན།།
རང་ཉིད་མི་བསླུ་འཆི་ཆོས་གཤའ་མ་གྱིས།།
༦༽
གཟུགས་མཛེས་སྟོབས་འབྱོར་ཇི་ལྟར་ལྡན་ན་ཡང་།།
མཛེས་པའི་ལུས་པོ་དུལ་རྡོའི་སྟེང་དུ་ལུས།།
བསགས་པའི་ནོར་རྫས་གཞན་གྱིས་ལག་ཏུ་སྤྱོད།།
གཤིན་ལམ་སྐྱ་མོར་རང་ཉིད་གཅིག་པུར་འགྲོ།།
༧༽
བཟང་རྫུའི་ཆེད་དུ་ཚུལ་འཆོས་བྱེད་པ་དང་།།
དགྲ་འདུལ་གཉེན་སྐྱོང་ཚེ་འདིའི་བྱ་བཞག་ཀུན།།
རྒྱུ་འབྲས་མ་སྲུང་ཉེས་པ་འབྱུང་བའི་ལས།།
རང་ཉིད་གཅིག་པུས་མྱོང་བ་ཀྱེ་མ་ཧོ།།
༨༽
ལས་ཉོན་གཞན་དབང་གྱུར་པའི་བུ་ཆུང་ཁྱོད།།
མི་ཚེ་ཐུང་ཐུང་རྨི་ལམ་ཐུན་གཅིག་ལ།།
ཚད་ཐིག་རིང་བོ་བདེན་འཛིན་འདོམ་གྱིས་གཞལ།།
འཁོར་བ་སྡུག་བསྔལ་རྒྱ་མཚོའི་དཀྱིལ་དུ་ལུས།།
༩༽
རང་གིས་མི་དགེའི་རྒྱུ་ཚོགས་སྒྲུབ་པ་ཡིས།
ངན་སོང་འཕེན་མཁན་རང་ཉིད་ཁོ་ནར་འགྱུར།།
དགེ་བའི་རྒྱུ་ཚོགས་རང་གིས་སྒྲུབ་གྱུར་ན།།
ཐར་ལམ་བགྲོད་པའི་མགོན་ཡང་རང་ཉིད་གྱུར།།

༢༠༡༨/༡༡/༡༢/བསམ་བཟང་གིས།