"གཞི་ཡི་གནས་ཚུལ་བདེན་གཉིས་དོན་ཤེས་པས།།
བདེན་བཞི་འཁོར་བ་འཇུག་ལྡོག་ཇི་བཞིན་ངེས།།
ཚད་མས་དྲངས་པའི་སྐྱབས་གསུམ་དད་པ་བརྟན།།
ཐར་ལམ་རྩ་བ་ཚུགས་པར་བྱིན་གྱིས་རློབས།།"

༄༅། །ཟླ་བའི་མདོ་བཞུགས་སོ།།
༄༅། །རྒྱ་གར་སྐད་དུ། ཙནྡྲ་སཱུ་ཏྲ། བོད་སྐད་དུ། ཟླ་བའི་མདོ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཙམ་པ་ཅན་ན་འགྲོ་བ་པོའི་རྫིང་བུའི་འགྲམ་ན་བཞུགས་ཏེ། དེའི་ཚེ་ལྷ་མ་ཡིན་གྱི་དབང་པོ་སྒྲ་གཅན་གྱིས་ཟླ་བའི་དཀྱིལ་འཁོར་ཐམས་ཅད་འོད་ཀྱིས་བཀབ་པར་གྱུར་ཏོ། །དེ་ནས་ཟླ་བའི་དཀྱིལ་འཁོར་ན་གནས་པའི་ལྷ་གང་ཡིན་པ་དེ་སྐྲག་ཅིང་དངངས་ལ་མི་དགའ་བར་གྱུར་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ལྷ་དེས་དེའི་ཚེ་ཚིགས་སུ་བཅད་དེ་གསོལ་པ། ཀུན་ལས་རྣམ་པར་རབ་གྲོལ་བའི། །སངས་རྒྱས་དཔའ་བོ་ཁྱོད་ཕྱག་འཚལ། །གནོད་པ་དག་དང་ཕྲད་གྱུར་པ། །བདག་གི་སྐྱབས་ནི་མཛད་པར་གསོལ། །འཇིག་རྟེན་དགྲ་བཅོམ་བདེ་གཤེགས་ལ། ། ཟླ་བ་སྐྱབས་སུ་མཆི་ལགས་ཀྱིས། །སངས་རྒྱས་འཇིག་རྟེན་ཐུགས་བརྩེ་རྣམས། །ཟླ་བ་ཐར་མཛོད་སྒྲ་གཅན་ལས། །བཅོམ་ལྡན་འདས་ཀྱིས་བཀའ་སྩལ་པ། །སྒྲ་གཅན་ཟླ་བ་མུན་སེལ་བ། །ནམ་མཁའ་དག་ལ་འོད་བྱེད་ཅིང་། །ལམ་མེར་འདུག་ལ་དཀར་བ་དང་། རྣམ་པར་དག་པའི་འོད་ལྡན་པ། །བར་སྣང་དག་ལ་མ་བཟུང་བར། །སྐྱེ་དགུའི་སྒྲོན་དེ་མྱུར་དུ་ཐོང་། །དེ་ནས་རིངས་བཞིན་སྒྲ་གཅན་དེ། །ལུས་ཀྱང་རྔུལ་ཅིང་སྐྲག་གྱུར་ལ། །ནད་པ་བཞིན་དུ་བརྟད་པ་ཡིས། །ཟླ་བ་རྣམ་པར་གཏོང་བར་བྱེད། །དེ་ནས་རྣམ་པར་སྣང་བྱེད་ཀྱི་བུ་ཆེན་པོས་ལྷ་མ་ཡིན་གྱི་དབང་པོ་སྒྲ་གཅན་རིངས་པ་བས་ཀྱང་རིངས་པར་ཟླ་བའི་དཀྱིལ་འཁོར་བཏང་བ་མཐོང་ངོ་། །མཐོང་ནས་ཀྱང་དེའི་ཚེ་ཚིགས་སུ་བཅད་དེ་སྨྲས་པ། ཅི་ཡི་ཕྱིར་ན་སྒྲ་གཅན་ཁྱོད། །ལུས་ཀྱང་རྔུལ་ཅིང་སྐྲག་གྱུར་ལ། །ནད་པ་བཞིན་དུ་བརྟད་པ་ཡིས། །རིངས་པར་ཟླ་བ་གཏོང་བར་བྱེད། །སྒྲ་གཅན་གྱིས་སྨྲས་པ། སངས་རྒྱས་ཚིགས་བཅད་འདི་བརྗོད་པས། །གལ་ཏེ་ཟླ་བ་མ་བཏང་ན། །བདག་གི་མགོ་བོ་ཚལ་བདུན་འགས། །གསོན་ཡང་བདེ་བར་མི་འགྱུར་རོ། །རྣམ་པར་སྣང་བྱེད་ཀྱི་བུ་ཆེན་པོས་སྨྲས་པ། ཀྱེ་མ་བདེན་པ་གཟིགས་པ་ཡི། །སངས་རྒྱས་རྣམས་ནི་འབྱུང་བ་རྨད། །དེ་དག་གིས་ནི་ཚིགས་སུ་བཅད། །བརྗོད་ན་སྒྲ་གཅན་ཟླ་བ་གཏོང་། །ཟླ་བའི་མདོ་རྫོགས་སོ།། །།

རྨོངས་དད་ནི་ཚད་བརྒལ་སྔོན་ཐོན་གྱི་ཚན་རིག་ཅིག་རེད།
ནུས་རྡུལ་སྲུང་སྐར་མཁའ་ལ་འཕགས་པ་དེས་མི་སོ་སོའི་འཚོ་གནས་ལ་དོན་སྙིང་གང་ཞིག་ལྡན་ནམ།
ཀྲུས་ཆིང་ཧྲི་ཡིས་བརྩམས།
འཇམ་དབྱངས་བློ་གྲོས་ཀྱིས་སྒྱུར།
ནུས་རྡུལ་ཤུགས་རིགས་ཀྱི་ཡ་མཚན་ཆེ་བའི་སྣང་ཚུལ་ཚུལ།
ནུས་རྡུལ་ཤུགས་རིག་དེ་ནི་རང་བྱུང་ཚན་རིག་ལོ་རྒྱུས་ཀྱི་ཐོག་གི་ཚོད་ལྟས་ར་སྤྲོད་བྱས་པ་ཐམས་ཅད་ཀྱི་ནང་གི་ཆེས་གནད་ལ་ཐིག་པའི་རིག་གཞུང་ཞིག་རེད། འོན་ཀྱང་ནུས་རྡུལ་གྱི་ལྟ་བ་དེ་གོ་བ་ལོན་ཐུབ་མཁན་ཞིག་མེད། དེའི་དོན་གོ་ཐུབ་པའི་མི་ཞིག་ཡོད་མ་རེད་ཅེས་བཤད་པའི་དོན་ནི། ང་ཚོ་ལྟ་བུ་རིམ་པ་འདི་ཉིད་ལ་གནས་པའི་མིས་དེའི་དོན་དེ་རྟོགས་ཐུབ་པ་མ་ཡིན་ཞེས་པའི་དོན་གཏན་ནས་མ་ཡིན་པར། ཐ་ན་ནུས་རྡུལ་ཤུགས་རིག་གི་སྲོལ་གཏོད་པ་པོ་དེ་དག་གིས་ཀྱང་གོ་ཐུབ་ཡོད་མ་རེད་ཅེས་པའི་དོན་ཡིན་ནོ།།
དེ་ལྟ་ན་ནུས་རྡུལ་ཤུགས་རིགས་ཀྱི་ཆེས་གོ་དཀའ་བའི་གནས་དེ་གང་ཞིག་ཡིན་ཞེ་ན། ཐོག་མར་ནུས་རྡུལ་ཤུགས་རིག་གི་ནང་གི་ཆེས་གོ་དཀའ་བའི་གནས་དེ་མི་རྣམས་ལ་གསལ་བཤད་ཅིག་བྱེད་རྒྱུ་ཡིན་ལ། ཆེས་གོ་དཀའ་བའི་གནས་དེ་དངོས་གནས་སྒྲུབ་བྱེད་ཡང་དག་གིས་ར་སྤྲོད་བྱས་ཟིན་པ་རེད། དེ་ཡང་རྣམ་ཤེས་དེ་དངོས་པོའི་འཇིག་རྟེན་འདི་ལས་ཐ་དད་དུ་ཕྱེ་མི་རུང་བའི་དོན་དེ་ཉིད་ཡིན། དེ་གཉིས་ཐ་དད་པ་མེད་པའི་ཚུལ་ལ་དེ་རྟོགས་ན་ད་གཟོད་ནུས་རྡུལ་ཤུགས་རིག་གི་དོན་ལ་གོ་བ་ཅུང་ཟད་རེ་ཆགས་ཐུབ་པ་རེད།