དེ་རིང་ཡང་སེམས་ཁམས་གློ་བུར་དུ་འཁྲུགས་སྟེ།  
དཔེ་ཆ་ཡང་ལྟ་འདོད་མེད་པར་གྱུར་བསམ་ཀྱིན་བསམ་ཀྱིན་མི་སེམས་ནི་
ཇི་འདྲའི་བློ་གཏད་མེད་ས་ཅིག་རེད་ཨང་འདོད་བྱུང་།
མི་ཚེ་སློབ་སྦྱོང་གིས་རྫོགས་མི་ཐུབ་མོད།
སློབ་སྦྱོང་དང་དཔེ་ཀློག་ལ་ཁ་མི་འབྲལ་བར་འཚོ་ཐུབ་ཚེ།
དེ་རིང་གི་དུས་ཚོད་ཙམ་ལ་སེར་སྣ་དེ་ཙམ་སྐྱེ་དགོས་དོན་མེད་མོད།  
ད་སྐབས་ཀྱི་གཞུང་མཚམས་ནི་ཅི་ཙམ་བལྟས་ན་བློ་ཁོག་ཏུ་
ཤོངས་དཀའ་ཅིག་ཡིན་པས་དེ་རིང་འདི་ལྟར་ཤོར་ཚེ།
སང་ཉིན་ཇི་ལྟར་འགྲོ་བ་ལ་ཡང་སེམས་ཁུར་ལྷག་མ་ཅིག་འདུག་གོ།

གོ་སྐབས་ཞེས་པ་དེ། འགྱུར་ལྡོག་གི་ཁྲོད་ན་ཡོད་པས། བྱ་བཞག་གསར་བ་ཞིག་གི་མགོ་རྩོམ་པ་དེ་ནི། གོ་སྐབས་བཟང་བོ་ཞིག་ལ་འཕྲད་པའི་སྔ་ལྟས་སུ་བཤད། དེ་ནི་བདེན་པ་འདྲ་སྟེ། སློབ་གཉེར་དང་། ལས་རིགས། བྱ་བཞག་གང་ལ་ཡང་འགྱུར་བ་ཏོག་ཙམ་ཡང་མེད་པར་ཆེས་སྤྱིར་བཏང་གི་བྱ་བའི་ཁྲོད་ནས་མི་ཚེ་ཟད་པ་ཡིན་ན། གོ་སྐབས་ལེགས་པོ་ཞིག་གིས་ཁྱེད་རང་གཏན་ནས་འཚོལ་མི་སྲིད་དེ། ཁྱོད་ལ་གཞན་དང་མ་འདྲ་བའི་འཇོན་ནུས་གང་ཡང་མེད་པའི་ཕྱིར་རོ།། གོ་སྐབས་དང་དོན་བཟང་མང་བོས་ཚུར་བཙལ་ནས་ཡོང་བ་དེ། མི་དེར་རླུང་རྟ་རྒྱུག་པ་དང་ལས་བསོད་བཟང་བའི་ལྟ་སྟངས་ཤིག་ཀྱང་མཆིས་མོད། དོན་ལ་མི་དེ་དག་ནི། གཞན་ལས་ལྷག་པའི་བྱ་བ་འདྲ་མིན་ལ་ཚོད་ལྟ་བྱེད་པར་དགའ་ཞིང་། ལས་རིགས་མང་བོའི་ཆ་ནས་སྣ་འཛོམས་ཀྱི་ཁྱད་ནུས་ལྡན་པས་ཡིན་པ་དེ་ཡང་གསལ་བར་གོ་ཐུབ་པས། རང་ལ་གཞན་ལ་ལྷག་པའི་རླུང་རྟ་རྒྱུག་འདོད་པ་དང་གོ་སྐབས་ལེགས་པོ་ཐོབ་འདོད་ན། རྩ་དོན་ནི། ཐོག་མར་ཁྱེད་རང་ལ་གཞན་དང་མ་འདྲ་བའི་གོ་སྐབས་འདྲ་མིན་དང་དུ་ལེན་ཐུབ་པའི་འཇོན་ནུས་ཁྱད་པར་བ་ཞིག་ཅིས་ཀྱང་འཛོམས་དགོས་པ་དེའོ།། ཨ་མའི་བུ་ལ་ཡོན་ཏན་ཡོད་ན། དགའ་ལྡན་ཁྲི་ལ་བདག་མེད་ཅེས་པ་དེས་ཀྱང་། དགའ་ལྡན་ཁྲི་བར་འདུག་པའི་སྐལ་བ་ལྡན་མིན་ཡང་རྩ་བ་ཁྱེད་རང་ལ་འཇོན་ནུས་ཡོད་མེད་ཀྱི་གནད་རང་ལ་ཐུག་འདུག་པ་གསལ་བོར་བསྟན་པ་ཡིན་པས། དེས་ཀྱང་གོ་སྐབས་ནི། འཇོན་ནུས་ཅན་ཁོ་ནར་དབང་བའི་རྩ་དོན་དེ། ཁ་གསལ་གཏིང་གསལ་ཏུ་བཏང་བ་མ་ཡིན་ནམ།

དུག་གསུམ་རླུང་དམར་ཚུབ་པ་མུན་པའི་ཁུང་།།
གསལ་མཛད་འོད་བརྒྱའི་མངའ་བདག་དགེ་བའི་བཤེས།།
འགྲོ་བའི་དོན་དང་བསྟན་པའི་རྒྱན་མཆོག་ཏུ།།
རྟག་ཏུ་བཞུགས་པར་གུས་པས་འདུད་དོ་ཀྱཻ།།

——གངས་མེ་འབར་གྱིས།