༄༅།།ཀཿཐོག་རྨོག་རྩ་རིན་པོ་ཆེ་འཇིགས་བྲལ་ཕྱོགས་ལས་རྣམ་རྒྱལ་གྱི་མྱུར་འབྱོན་ཐུགས་དམ་བསྐུལ་བའི་གསོལ་འདེབས་བཞུགས།

།ཨོཾ་སྭ་སྟི།
རབ་འབྱམས་ཕྱོགས་བཅུའི་ཞིང་ན་བཞུགས་པ་ཡི། །
སངས་རྒྱས་ཆོས་དང་འཕགས་པའི་ཚོགས་རྣམས་དང་། །
རྩ་གསུམ་ཆོས་སྲུང་རྒྱ་མཚོའི་ཚོགས་རྣམས་ཀྱིས། །
ཐུགས་དམ་རྗེས་སུ་བསྐུལ་ཞིང་མྱུར་འགྲུབ་མཛོད། །

རྒྱལ་བསྟན་སྤྱི་དང་ཁྱད་པར་སྔ་འགྱུར་བའི། །
བསྟན་འཛིན་ཀཿཐོག་རྨོག་རྩ་རིན་པོ་ཆེ། །
འཇིགས་བྲལ་ཕྱོགས་ལས་རྣམ་པར་རྒྱལ་བ་ཁྱོད། །
ཐུགས་དམ་རྗེས་སུ་བསྐུལ་ལོ་དབྱིངས་ནས་བཞེངས། །

མགོན་ཁྱོད་ཞི་བའི་དབྱིངས་སུ་མ་བཞུགས་པར། །
གདུལ་བྱའི་དོན་ལས་དགོངས་པ་མི་གཡེལ་བར། །
རྨད་བྱུང་ཐུགས་བསྐྱེད་ངོ་མཚར་ལྟས་དང་བཅས། །
སྤྲུལ་པའི་ཉིན་བྱེད་མྱུར་དུ་འཆར་བར་མཛོད། །

མི་ཤེས་མུན་པར་འཕྱན་པའི་སེམས་ཅན་དང་། །
བསྟན་པའི་མངའ་ཐང་རྒུད་པའི་སྨག་རུམ་འདི། །
ཐུགས་བསྐྱེད་ཉིན་བྱེད་དབང་པོའི་སྣང་བ་ཡིས། །
དབུགས་འབྱིན་མཆོག་གི་སྤྲུལ་སྐུ་སྣང་མཛད་གསོལ། །

སྐྱབས་གནས་རྒྱལ་བ་རྒྱ་མཚོའི་བྱིན་མཐུ་དང་། །
སྔོན་གྱི་ཐུགས་བསྐྱེད་སྨོན་ལམ་ཟབ་མོའི་མཐུས། །
བདག་ཅག་དད་ལྡན་སློབ་མས་གསོལ་བཏབ་བཞིན། །
སྤྲུལ་གཞིའི་ཟློས་གར་མྱུར་དུ་འཆར་གྱུར་ཅིག །

ཅེས་པ་འདིའང་གང་དེའི་ཉེ་གནས་རྣམས་ཀྱིས་བསྟུད་མར་བསྐུལ་བ་བཞིན་རྫོང་སར་འཇམ་དབྱངས་མཁྱེན་བརྩེ་ཐུབ་བསྟན་ཆོས་ཀྱི་རྒྱ་མཚོས་རབ་བྱུང་བཅུ་བདུན་པའི་ཆུ་སྟག་ཟླ་བ་༧ པའི་ཚེས༢༧ ཉིན་སྨོན་པ་དོན་དང་ལྡན་པར་གྱུར་ཅིག། །།

༄༅། །ཀ་ཕྲེང་རྫོགས་ལྡན་གསར་བའི་སྙན་གླུ།

དྷཱིཿ ཚ། རྨོག་རུ་སངས་རྒྱས་རྒྱ་མཚོ།
ཀ༵་ཏན་ངང་དཀར་བྱིན་རླབས་ཀུན་ཆགས་དག་ལྡན་མཛེས་སྡུག་སེམས་ངོས་སུ།།
ཁ༵་སེམས་ཀུན་མཐུན་མི་ཕྱེད་ཚིག་ཕྲེང་བློ་ལྡན་གཞོན་ནུའི་མགུལ་རྒྱན་གྱིས།།
ག༵་ལེར་སྤྲོ་སྐྱིད་རྫོགས་ལྡན་དུས་གསར་སྙན་པའི་དྲུག་འགྱུར་བང་རྩལ་ཉིད།།
ང༵་རོའི་ཟིལ་གནོན་ཤུགས་དང་སྒྲོག་པས་ས་ཆེན་ཁམས་ལ་ཤིས་པས་བཀླུབས།།
ཅ༵་ག་དག་པོའི་གངས་ལྗོངས་སྐད་ཡིག་སྡེབ་ལེགས་སྨྱུག་རྩལ་ཁྲོད་དུ་བསྟར།།
ཆ༵་ཤས་ལས་གྲུབ་ཚིག་གི་ཚོགས་པས་དུས་གསར་དཔྱིད་ཀྱི་ལང་ཚོ་སྤུད།།
ཇ༵་ཐུད་མར་གསུམ་འཚོ་བའི་མཐུན་རྐྱེན་འབད་མེད་འདུ་བའི་དུས་གསར་འདི།།
ཉ༵་གང་ཟླ་བའི་ལང་ཚོའི་དཔལ་བཞིན་ཡངས་པོའི་འཇིག་རྟེན་ཁམས་ལ་ཁྱབ།།
ཏ༵་ཀུ་ཐོགས་པའི་རྒན་པའི་ཚོགས་ཀྱང་མཁོས་ཕབ་བག་ཡངས་ཁམས་ལ་རྩེན།།
ཐ༵་ཤལ་སྙིགས་མའི་རང་འཚང་རྒོད་ཀྱང་རྫོགས་ལྡན་དུས་ཀྱི་ཡོ་ལང་རྒྱས།།
ད༵་ལྟའི་ཚན་རྩལ་འགྲོས་མགྱོགས་ཤུགས་ཀྱིས་རྒྱལ་ཁམས་ལྟད་མོ་ཅིག་ཅར་མཐོང་།།
ན༵་ཚོད་སྨིན་པའི་གཞོན་ནུའི་ཚོགས་ཀྱང་སྤྲོ་དགའི་དཔལ་ལ་གཅིག་ཏུ་འདུ།།
པ༵་ར་མི་ཏའི་བསུང་ཞིམ་བཅུད་ཀྱིས་དབང་ལྡན་ལྕེ་སོགས་རབ་མྱོས་ནས།།
ཕ༵་སྐད་སྨྲ་བའི་ལྕེ་རྐན་རྒོད་པོས་སྲོལ་རྒྱུན་རིག་གཞུང་ཆེར་བསྔགས་པ།།
བ༵་ཀུ་ལ་བཞིན་མཛེས་པའི་ཉམས་ཀྱིས་གཞན་རིགས་འགྲམ་ཆུ་ལྡང་བ་འདིས།།
མ༵་འོངས་རྣམ་དག་གངས་ལྗོངས་ཡུལ་གྱི་ཆོས་རིག་འཕེལ་བའི་རྟགས་མཚན་ལགས།།
ཙ༵་ག་ཙིག་གེའི་ནོར་འཁྲུལ་བྱུང་ཡང་སུས་ཀྱང་སྐྱོན་གཞིར་མ་བཟུང་བར།།
ཚ༵་གྲང་ལ་སོགས་དཀའ་བ་བསད་ནས་སྡུག་རུས་ཆེན་པོས་དང་བླངས་ན།།
ཛ༵་དྲག་དུས་ཀྱི་མི་མཐུན་རྒུད་པའི་རྩ་བ་ཐམས་ཅད་སུན་འཕྱུང་ནས།།
ཝ༵་ཅན་གཡོ་སྒྱུའི་ངན་ངོན་སྤྱོད་པ་འདི་དང་གཏན་དུ་གྱེས་པར་སླ།།
ཞ༵་ཐུལ་བཟུང་ནས་རང་གི་ལུགས་ཀྱིས་ཆོས་རིག་རྣམ་དཔྱོད་འཚོལ་འདི་རེམ།།
ཟ༵་འོག་གོས་ཀྱི་འཛོལ་མེད་རི་མོས་དུས་བཞིའི་གཟི་དཔལ་རྒྱས་གྱུར་ཅིང་།།
འ༵་འུར་བྱེད་པའི་ཕུང་ཀྲོལ་ལས་ཀྱི་སྒྲོག་ངན་ཚིག་ཀྱལ་སྤོངས་ཐབས་སུ།།
ཡ༵་ཡའི་ཚིག་འཇམ་ལགས་སོ་སྐད་ཀྱིས་ཕྱི་སྤྱོད་ཀུན་ཏུ་མཛེས་པའང་ལེགས།།
ར༵་མ་ལུག་གི་ཕྱི་ནང་གཉིས་ཀས་རང་གཞན་ཀུན་པོ་ཐལ་བརླགས་ན།།
ལ༵་ལུང་ཀུན་དུ་རྒུད་པའི་རང་བཞིན་འཇིག་རྟེན་ཡོངས་ལ་ཁྱབ་གྱུར་བས།།
ཤ༵་རྗེན་སྨྲ་བའི་བདེན་གསུངས་ལུང་རིགས་དབྱར་སྐྱེས་དྲུག་འགྱུར་སྙན་དབྱངས་འདིས།།
ས༵་བདག་ཀླུ་གཉན་འཁོར་ཚོགས་ཀུན་གྱིས་ཕྱྭ་གཡང་ཤིས་པའི་ཚོགས་ཞུས་ནས།།
ཧ༵་ལམ་ཆོད་པའི་གོ་ལ་ཟླུམ་པོར་ཞི་འཇགས་ལྷོད་པོའི་བདེ་བསྩལ་ཏེ།།
ཨ༵་ཡིག་ཡིག་འབྲུའི་མཆོག་གི་དངོས་གྲུབ་འཛམ་གླིང་ཁམས་ལ་ཁྱབ་པར་ཤོག།། https://t.cn/A65zl6jv

༄༅། །ཧྲཱིཿ ཚངས་པའི་ཡིད་ཀྱི་སྲས་མོ་ནི། །རོལ་བའི་མཚོ་ཆེན་ལས་བྱུང་བ། །ཟླ་ལྟར་དཀར་བའི་ཞལ་མངའ་མ། །དབྱངས་ཅན་ལྷ་མོར་ཕྱག་འཚལ་བསྟོད། །རིག་བྱེད་གསང་ཚིག་འཛད་མེད་གཏེར། །དེ་བཞིན་གཤེགས་གསུང་ཆོས་ཕུང་ཆེ། །འཆི་མེད་ལམ་ཡང་མཐར་ཁྱབ་བྱེད། །དབྱངས་ཀྱི་ལྷ་མོར་གུས་པས་འདུད། །ཏམ་བུ་ར་ལ་འཁྱུད་བྱས་ཏེ། །སོར་རྩེས་དལ་གྱིས་བསྒྲེངས་བ་ཡིས། །འཇིག་རྟེན་འདས་དང་མ་འདས་ཀུན། །ཡིད་ཀྱི་བརྟན་པ་འཕྲོག་ལ་འདུད། །ངེས་དོན་ཤེས་རབ་ཕ་རོལ་ཕྱིན། །རྣམ་པ་ལྷ་མོའི་གཟུགས་སུ་བསྒྱུར། །ངོ་མཚར་སྒྱུ་འཕྲུལ་བསམ་མི་ཁྱབ། །ས་བཅུ་དབང་ཕྱུག་ཆེན་མོར་འདུད། །དེ་བཞིན་གཤེགས་ཀུན་རྗེས་ཆགས་ཀྱིས། །ཡེ་ཤེས་སྤྱན་གྱིས་ཟུར་མདའ་གཡོ། །སྙོམས་ཞུགས་བདེ་ཆེན་མཆོད་སྤྲིན་བསྟོད། །དགྱེས་ཡུམ་ཆེན་མོར་གུས་པས་འདུད། །བློ་ལྡན་གང་གི་མགྲིན་སྙིང་ལ། །ཞུགས་པ་དེ་ཡི་མོད་ཉིད་དུ། །སྨྲ་བའི་དབང་ཕྱུག་ཆེན་པོར་བསྒྱུར། །བློ་གྲོས་མཆོག་སྩོལ་མ་ལ་འདུད། །དེ་ལྟར་བསྟོད་པའི་བྱིན་རླབས་ཀྱིས། །བདག་ཡིད་དད་པའི་འོ་མཚོར་རུ། །བཞུགས་ནས་མཁྱེན་གཉིས་ཡེ་ཤེས་ཀྱི། །སྣང་བ་ཆེན་པོ་སྩལ་དུ་གསོལ། །
ཨོཾ་པི་ཙུ་པི་ཙུ་པྲ་ཛྙཱ་ཝརྡྷ་ནི། ཛྭ་ལ་ཛྭ་ལ་མེ་དྷི་ཝརྡྷ་ནི། དྷི་རི་དྷི་རི་བུདྡྷི་ཝརྡྷ་ནི་སྭཱ་ཧཱ། ། ཞེས་བཟླས་བློ་གྲོས་འཕེལ་བ་བྱེད། །
ཅེས་པའང་རྗེ་དབོན་བསམ་གཏན་སྤྲུལ་སྐུ་རིན་པོ་ཆེས་རྟེན་བཅས་གསུང་གིས་བསྐུལ་ངོར་འཇམ་དབྱངས་ཆོས་ཀྱི་བློ་གྲོས་ནས་དཔལ་སྤུངས་ཡིད་དགའ་ཆོས་འཛིན་དབྱངས་ཅན་གྲུབ་པའི་དགའ་ཚལ་དུ་བྲིས་པ་དགེ་ལེགས་འཕེལ།