ང་ཡི་འབྲོག་ཁྱིམ།

རི་བོ་དང་སྤྲིན་དཀར་འདྲིས་པའི་ཡང་རྩེ།
ཆུ་མིག་དང་རྒྱ་མཚོ་སྦྲེལ་བའི་མཐོ་སྒང་།
སྦྲ་ནག་ལགས།

ང་ཡི་འབྲོག་ཁྱིམ།

ཁྱེད་ནི།

བཙན་པོ་རྒྱུད་ཀྱིས་འུ་ཚོ་ལ་གནང་བའི་ཆེས་བཟང་བའི་ལེགས་སྐྱེས་ཞིག་གམ།

ཁྱེད་ནི།

ཕ་མེས་ཡང་མེས་དག་གིས་ཤུལ་བཞག་གི་ཁྱིམ་གཞིས་དྲོན་མོ་ཞིག་ཀྱང་ཡིན།

མ་དང་སྲིང་མོ་ཡི་བརྩེ་བ་ཆེན་པོའི་འཚོ་གནས་ཟབ་མོ།
ཕ་དང་ཨ་ཁུ་ཡི་ཞེ་ཆགས་འཁྲི་སའི་རིགས་ཞེན་གཙང་མ།
དུས་རབས་འཕེལ་འགྱུར་གྱི་ཁྲོད་ནས།
མི་རིགས་གང་ཞིག་གི་ལོ་རྒྱུས་དང་རིགས་གནས།
ཉིན་མོའི་སྐར་རམ།

གནམ་གྱི་འཇའ་ལྟར་ཡལ་ནའང་།
ཁྱེད་ནི།

འགྱུར་བ་མེད་པའི་དམ་ཚིག་གི་རྡོ་རིང་ཞིག་གམ།
ཡང་ན།

རང་ཚུགས་ཆེ་བའི་གནའ་རབས་ཀྱི་བགྲེས་པོ་ཞིག་དང་གཉིས་སུ་མེད།

ནགས་རི་དང་།

གངས་རི།
རྫ་རི་དང་།

སྤང་རི།
ཁྱོན་ཡངས་པའི་རྩྭ་ཐང་དང་།

གཡའ་དག་པའི་ནམ་མཁའ།
ཁྱེད་ཀྱི་མཛེས་སྡུག་དང་བརྗིད་ཉམས་རེ་རེ་ནི།
གནམ་གྱི་ལྷ་མོ་ལྟར།
མཐོང་བ་ཙམ་གྱིས་ཡིད་སེམས་འཕྲོག་འགྲོ་ཞིང་།
ཞིམ་མངར་ལྡན་པའི་ཆང་དཀར་ལྟར།
སྣུམ་པ་ཙམ་གྱིས་དབང་མེད་བཟི་ནས་འགྲོ

སྦྲ་ནག་ལགས།

ང་ཡི་འབྲོག་ཁྱིམ།
རི་མོ་བའི་པིར་རྩེ་ནས་ཐོན་མ་ཐུབ་པའི་མཛེས་སྡུག་གསོན་པོ།
གཏན་དུ་བཀླགས་མི་ཚར་བའི་ལོ་རྒྱུས་ཀྱི་གླེང་བམ་མཐུག་པོ།
རེ་བའི་ཞིང་ཁམས།

དད་པའི་ཕ་ས།
སྦྲ་ནག་ལགས།

ང་ཡི་འབྲོག་ཁྱིམ།

༢༠༢༢/༨/༦ཟིན་བྲིས།

མ་ཁེ་སུ།

གནས་སྐོར་སྐྱིད་པོ་བྱུང་སོང་། ལམ་བར་ནས་ལོ་རྒྱུས་མང་པོར་རྒྱུས་ལོན་ཡག་པོ་བྱུང་སོང་། ཚེ་འདིར་དཀའ་ཡང་མ་མཐའ་ཡང་སྐྱེ་ཕྱི་མར་མཁས་པ་རེད་ཤག་ཤག་རེད་འདུག །

སྤྱིར་ཡ་རབས་ཀུན་སྤྱོད་དང་ཚུལ་མཐུན་སློབ་སྦྱོང་གི་རྣམ་པ་མང་པོ་ཞིག་ཆུང་ནས་ཆེ་ཡི་ཁ་ལྟ་བྱས་ནས་འཚར་ལོངས་འགྲོ་བཞིན་ཡོད་པས་ནམ་རྒྱུན་ན་གཞོན་ཚོར་མིག་དཔེ་དང་རྒྱབ་སྐྱོར་གྱི་ཆེད་ས་གནས་དེ་ཀའི་རྒན་པ་ཚོས་ཀྱང་དཔེ་ཀློག་དང་སློབ་སྦྱོང་། ཡ་རབས་ཚུལ་མཐུན་གྱི་སྤྱོད་པ་བྱེད་རྒྱུ་ཧ་ཅང་གལ་ཆེན་པོ་རེད། [微笑][合十][玫瑰][强]