࿑ འགྲོགས་འདོད་མེད་པའི་གཏམ་དག་སྨྲས་ན་ཡང་།།
འཛུམ་པའི་མིག་ལས་བརྩེ་བ་ལྷོད་གྱུར་པ།།
བུ་མོ་གཞོན་ནུའི་ཕྱག་སོར་དམར་བོ་འདི།།
སྐྱེས་བུ་སུ་ཡིས་གཏན་དུ་གཏོང་བར་ནུས།།

​

———————— སྂ་བྷཱེེ།

࿑ མདོ་སྨད་ཀྱི་ཆོས་གྲྭ་ཆེན་པོ་མཐོ་ལས་དགོན་གྱི་ཐེངས་གསུམ་པའི་བཀའ་བཅུ་དགེ་བཤེས་དམ་བཅའ་གཏོང་མཁན་དགེ་བཤེས་ 14 ཞུགས་ཡོད།
མཛད་རིམ་ཉིན་བདུན་རིང་དགེ་བཤེས་དག་ནས་གུས་འདུད་བཤད་པ་ཁྱབ་ཁྱབ་གཞུང་ལས་པ་ནས་ས་བཅད་འཕྲོས་དང་བཅས་སྐྱོར་བ་སྔོན་དུ་བཏང་ནས།
དངོས་གཞིར་སླེབས་པ་ན་རིགས་སློང་བ་བླ་མ་གཞུང་ལས་པ་གཙོས་རིམ་བཞིན་སྤྲུལ་སྐུ་དང་དགེ་བཤེས་བཏང་ཟིན་པ་རྣམས། བཀའ་རམས་སྐྱོར་དཔོན་དེ་ནས་སློབ་གཉེར་བ་དག་གིས་འཛིན་གྲྭའི་རིམ་པ་ལྟར་རྟགས་གསལ་ 140 ཉེ་བ་ཞིག་བཏང་བར།
དགེ་བཤེས་རྣམས་ཀྱིས་རེ་རེ་ནས་གཞུང་གི་གོ་བ་གཏིང་ཟབ་པ། གཞུང་གི་རིམ་པར་ངེས་ཆ་བརྟན་པ། རིགས་པའི་གཏད་སོ་བཅས་ཡོད་པའི་སྟེང་ནས་དམ་བཅའ་ཡག་པོ་བཞག་སོང།
མཇུག་ཏུ་ཉིན་རེ་བཞིན་བླ་མ་གཞུང་ལས་པ་ནས་ཚིག་གྲྭ་དང་གྲྭ་མང་ནས་རྒྱལ་བསྟན་རྒྱས་པའི་སྨོན་ལམ་སོགས་གསུང་ཞིང་ཐུགས་སྨོན་གང་ལེགས་གནང་བ་བཅས་དམ་བཅའི་མཛད་རིམ་ལེགས་པར་གྲུབ།
མཁན་རིན་པོ་ཆེ་ནས་དགེ་བཤེས་ཕྱག་འཁྱེར་བསྩལ་ཞིང་མ་འོངས་པའི་མཛད་འཕྲིན་སྐྱོང་ཚུལ་ཐད་རེ་བ་དང་སློབ་སྟོན་ཞིབ་རྒྱས་གནང་།
དགེན་ལྷ་རམས་པའམ་བླ་མ་གཞུང་ལས་པ་གཙོས་དགེ་བཤེས་རྣམས་ལ་ཉིན་འདི་དག་རིང་སྐུ་ཚེགས་ཧ་ཅང་ཆེ་སོང་།
ཁྱེད་རྣམས་ནས་མི་ཚེའི་རིན་ཐང་འདི་ལས་རྙེད་པས་དགའ་སྤྲོའི་རྣམ་པ་དང་དཀའ་བ་ཁྱད་དུ་བསད་པའི་སེམས་ཤུགས་དེས་རྗེས་རབས་པར་མིག་ལྟོས་ཡག་པོ་བསྐྲུན་སོང་།

ཚང་མ་ཐུགས་རྗེ་ཆེ།

2020/6/13 ཉིན་བསམ་གཞིག་པས།

࿑ དཔལ་ལྡན་བླ་མའི་ཐུགས་དགོངས་རྫོགས་པ་དང་། །
མཁའ་མཉམ་ཡོངས་ལ་བདེ་སྐྱིད་འབྱུང་བ་དང་། །
བདག་གཞན་མ་ལུས་ཚོགས་བསགས་སྒྲིབ་བྱང་ནས། །
མྱུར་དུ་སངས་རྒྱས་ས་ལ་འགོད་པར་ཤོག །