祈祷大恩上师
ཡོན་ཏན་ཀུན་ལྡན་བླ་མ་ལ། །
རྟག་ཏུ་གཡོ་སྒྱུ་མེད་པ་ཡིས། །
མཆོད་པ་ཆུང་ངུ་བྱས་གྱུར་ཀྱང་། །
ཚེ་འདིར་ཚེ་རིང་ནད་མེད་ཅིང་། །
ལོངས་སྤྱོད་ཕུན་ཚོགས་ཡིད་དུ་འོང་། །
ཕྱི་མར་ཐར་པའི་བདག་པོར་འགྱུར། །

ཡེ་ཤེས་འཕྲ་རྒྱུད་ཅེས་པ་ལས།

ཕ་ཡུལ་མ་སྡོད་བུ་ལོན་སྐྱེད་མ་སྤེལ་་་་་་ལོང་བའི་མིག་བཞིན་མི་མཐོང་ཡུལ་དུ་གྱིས་་་་་འགལ་རྐྱེན་བྱེད་པའི་བུད་མེད་རྩར་མ་བསྟེན་་་་་་་ཉིན་པར་མང་གསེབ་བག་མེད་ཆང་མ་འཐུང་་་་་སྤྱོད་ལམ་ཤུགས་འགོག་ཐ་མལ་གསེབ་མ་སྡོད། རི་དྭགས་བཞིན་དུ་རི་སུལ་བཙན་སར་སྡོད་་་་་ཞྭ་འཕྱེའི་མི་བཞིན་འགྲོ་འདུག་ཉུང་དུ་གྱིས་་་་ལྐུགས་པའི་ཁ་བཞིན་སྨྲ་བ་ཉུང་ངུ་གྱིས་་་་་་་་་པདྨ་བཀའ་ཐང་།

གུང་ཐང་གི་སྤྲང་པོ།

མ་མྱང་ཚ་ཡི་བུ་སྡུག་གཅིག་ཆོག །
ཕ་བཀའ་བརྒྱུད་ཀྱི་གྲུབ་བརྒྱའི་སྤྱི་མེས། །
བུ་བདག་ཅག་གི་གཙུག་ནོར་དམ་པ། །
རྗེ་གུང་ཐང་གི་མི་ལ་དྲན་ནོ། །

ཡབ་དྲིན་ཆེན་གྱི་བྱམས་བརྩེ་དབང་།།
གཉེན་མཛའ་བཤེས་ཚོ་དགྲ་རུ་ལོག་སྟེ།།
ཡུལ་སྐྱ་རྔ་རྩྭའི་གྲོང་འདབས་ཤིག་ན།།
བུ་བདག་མེད་ནི་ཐོས་པ་དགའ་བ།།

རྒྱབ་གོས་མེད་ཀྱི་མི་རྐྱང་སྔོ་ཧྲེང་།།
ཁ་ཟས་མེད་ཀྱི་སྤྲང་པོ་ཀེར་ལངས།།
གནས་ངེས་མེད་ཀྱི་ས་མཐའི་འཁྱམ་པོ།།
དུས་དེ་རིང་ནི་ཁྱེད་རང་དྲན་འོང་།།

ཕྱིར་ལྡོག་མེད་ཀྱི་མོས་གུས་རྣལ་མ།།
སྲོག་ཕངས་མེད་ཀྱི་དཀའ་སྤྱད་སྙིང་རུས།།
སྐྱོན་ཀུན་བྲལ་གྱི་སྣོད་ལྡན་སློབ་མ།།
ཕ་ལོ་ཙཱ་ཡི་སྲས་ཀྱི་ཐུ་བོ།།

ཡུལ་འདོད་ཡོན་ལ་ཆགས་པ་རྩ་བྲལ།།
གཞི་ཆོས་བརྒྱད་ལ་རེ་བ་ཀུན་ཟད།
གནས་འཁོར་བ་ལ་ཞེན་པ་གཏིང་ལོག།
རྗེ་མི་ལ་ཁྱོད་ཆོས་པའི་ཆོས་པ།།

ལུས་གཏུམ་མོ་ཡི་མེ་དྲོད་ཐུལ་ལེ།།
ངག་ཚངས་དབྱངས་ཀྱི་མགུར་གླུ་སྙན་ནེ།།
ཐུགས་ཏིང་འཛིན་གྱི་རེ་ཁྭ་ལྷམ་མེར།།
རྗེ་མི་ལ་ཁྱོད་གང་དུ་བཞུགས་ཡོད།།

ཆོས་ཕྱག་ཆེན་གྱི་གསེར་གྱི་ཀོང་བུ།།
ལམ་ཆོས་དྲུག་གི་མར་ཁུས་བཀང་བའི།།
དཔལ་གྲུབ་བརྒྱ་ཡི་གཙུག་གི་ནོར་བུ།།
རྗེ་མི་ལ་ཁྱོད་མི་དྲན་སུ་དྲན།།

ཕྱི་ལུས་པོ་ནི་མི་མིན་འདྲེ་མིན།།
ནང་ཐུགས་ཀ་ནི་སངས་རྒྱས་གསོན་པོ།།
གསུང་མགུར་དབྱངས་ནི་རྒྱ་གླིང་སངས་སངས།།
རྗེ་མི་ལ་ཁྱོད་སྙིང་ནས་དྲན་སོང་།།

བདག་གཞན་གཅེས་ཀྱི་ཐེག་ཆེན་སེམས་བསྐྱེད།།
མཐའ་ཀུན་བྲལ་གྱི་དབུ་མའི་ལྟ་བ།།
གཤིས་བདེན་གྲུབ་ཀྱི་ཕྱག་ཆེན་གནས་ལུགས།།
རྩ་རོ་རྐྱང་གི་སྲུབས་དུ་འཐིམ་ཡོད།།

རྩ་འཇག་མ་ཡི་རྩེ་ནས་བཞེངས་ཏེ།།
རྭ་གོག་པོ་ཡི་ཁོག་ཏུ་འགྱིང་ནས།།
ཆོས་ཕྱག་ཆེན་གྱི་ཉམས་མགུར་འཐེན་པའི།།
མི་རྩལ་ཆེན་དེ་གུང་ཐང་སྤྲང་པོ།།

ཁྱི་ཤ་བ་ལ་མི་སྐད་འཕྲིད་མི།།
མ་མཁའ་འགྲོ་ལ་གྲོགས་སུ་བསྟེན་མི།།
འདྲེ་ཤ་ཟ་ལ་ཆོས་འཁོར་སྐོར་མི།།
བུ་མཐུ་ཆེན་ཁྱོད་དེ་རིང་དྲན་སོང་།།

མཆོག་ཚེ་གཅིག་ལ་གྲུབ་པའི་རྣལ་འབྱོར།།
ཆོས་སྒྲུབ་བརྒྱུད་ཀྱི་ཉིན་བྱེད་སྣང་བ།།
རྗེ་གྲུབ་རིགས་ཀྱི་ཁྱུ་མཆོག་དམ་པ།།
ཡིད་མོས་གུས་ཀྱི་གདུང་དབྱངས་གསན་མཛོད།།

འཁོར་སེམས་པ་ཡི་ས་ཆེན་བརྡལ་ཅིང་།།
གནས་གཡའ་བྲག་ལ་རས་པས་ཁྱབ་མྱོང་།།
ཕ་བཀའ་བརྒྱུད་ཀྱིས་ས་ཆེན་བརྒལ་བ།།
མགོན་རྗེ་བཙུན་གྱི་མཛད་རྗེས་དྲན་སོང་།།

ལམ་རིམ་གཉིས་ཀྱི་ཐེམ་སྐས་བརྒྱུད་དེ།།
དཔལ་གྲུབ་པ་ཡི་ས་མཐོར་གཤེགས་པའི།།
ཀྱེ་ངེས་དོན་གྱི་གྲུབ་པའི་དབང་པོ།།
ཡིད་དད་འདུན་གྱི་མཁའ་རུ་བྱོན་ཤོག།