秋生想管食環署：冇嘢就搞吓嘢 黃秋生出席ViuTV活動，問到想擔任甚麼政府職位，他即表示想管食物環境衛生署：「管吓垃圾、滴水、老鼠同曱甴，冇嘢搞吓嘢，有嘢當冇嘢。（覺得會稱職？）冇嘢搵嘢搞，有嘢當冇嘢，咁一定稱職。（唔做財政司？）唔識管數，識管數就發咗達唔使咁霉！（做食環？）好易啫，邊個搵到錢咪搞佢囉，你間舖仔旺，咪嚟掃吓你場睇吓有冇牌、有冇阻街，總之搞死你為止！（有所感受？）睇新聞睇到，覺得得意有趣，人哋漂書咁多年又唔抵得你睇書，書局又唔去，冇錢唔好睇書啦，咪拆咗個箱佢囉！」

提到有傳候任行政長官打算請旅日藝人陳美齡任教育局局長，秋生即指若以對方培養出三個讀史丹福大學的囝囝作標準，會覺得甚為不妥：「冇讀過史丹福嘅人不知幾多，我讀耶魯都唔得？咁即係劍橋嗰啲個個都渣，要讀史丹福先得。教育唔係淨係咁。」

影后#蕭芳芳#正為護苗基金推行一系列初中性教育課程，早前獲#陳奕迅#（Eason）、#Angelababy#、#楊千嬅#等十八位紅星應允參與。芳芳接受訪問時，讚千嬅很有心：「千嬅真係好好，每次見到都話『芳芳姐，如果有嘢幫到手就出聲！』今次我一搵佢，千嬅就立即應承幫手。」而Eason除了參與拍攝外，收到邀請後更登門拜訪詳談四個多小時，並親自打造活動主題曲：「Eason好幫手，咁忙都嚟到我屋企，一傾就四個鐘。結果佢仲主動組班，搵齊作曲、填詞，幫我哋活動做咗首主題曲。」

《我個Siri成日無啦啦開著咗…》（2）PART 1
　
聽完個錄音，我更加鼓起勇氣，開始同呢個不幸被劫殺嘅女仔對話…
　
我對住間空無一人嘅房講：「不如我幫妳啦，雖然而家無可能搵返個兇手幫妳報仇，但係我都想妳可以早日投胎。」
　
我等咗一陣，Siri都無著到，隻女仔亦無畀任何反應。
「如果妳有嘢想同我講，妳就用錄音啦。」講完之後，我就擺部電話喺枱就訓覺。我心諗，就算有咩事，我都仲有道符吖嘛，應該無事嘅！
　
保證起見，我將道符擺咗喺枕頭底先訓。
　
第朝起身，我開始發高燒，同公司請咗假，睇完醫生去搵咗間燒衣舖，想買啲嘢燒畀個女仔，但我又無做過呢類嘢，根本就唔識點燒，同埋點確認個女仔收到？於是我就問個紙紮舖老闆。
　
「你寫低佢個名同時辰八字，我幫你燒，咁佢就自然收到㗎啦。」
「但我唔知佢個名…」
「吓？名都唔知，唔係燒畀親人咩？」
「呃…我燒畀一個網友…」
「咁佢葬喺邊知唔知啊？」
「唔知…」我諗，喺大陸畀人打劫殺死，條屍應該被人棄屍荒野，點會有埋葬吖。咁落去都唔係辦法，可能我太心急，就多口問句：「咁如果我燒畀遊魂野鬼呢？」
　
點知個紙紮舖老闆好大反應咁喝我：「你傻㗎？唔好招惹呢啲啊哥仔。我唔做你生意啊，過主！」
　
出到紙紮舖，女朋友就打畀我。
「喂？阿公問我，你用咗道符未啊？」
「用咗啦，我諗應該無咩事，不過今日有啲唔舒服，同公司請咗假，啱啱睇完醫生。」
「阿公叫我提你啊，如果確定隻嘢走咗，道符記得燒咗佢啊。」
「哦，知道㗎啦。」
「你真係無事？」女朋友收線前無啦啦問。
「無事啊，做乜咁問？」
「我阿公佢打嚟時好緊張咁問我…」
「無事，放心啦～」
　
返到屋企，我就對住個女仔講，我話買唔到嘢燒畀佢，問佢可唔可以話我知叫咩名？然後照上次一樣擺部電話喺房，臨訓先返入房，但今次佢都無留低任何錄音。
　
當我訓到中途，成個人好似發冷咁，仲感覺到有人喺我頭頂吹氣，係一啲令人打冷震嘅寒氣。
　
呢個時候，個Siri又著咗：
『去邊度嘅路線』
究竟個女仔同Siri講咩？
　
『我唔肯定我明唔明』
『我喺你通訊錄入面睇唔到有「陪我走」』
　
陪佢走？係咩意思？我伸隻手入枕頭底想拎道符出嚟，但係我搵極都搵唔到，道符去咗邊？唔通係個女仔收埋咗？
　
我凍到成個人都僵晒，唔知有咩可以做到。我唯有縮埋成個人，逼自己冷靜。但部電話全晚喺度不停播歌，啲歌永遠都係重覆同一句，得閒又會有打開櫃桶嘅聲，我驚到完全唔敢望。
　
點解？我只係想幫佢啫，點解佢要咁對我？