࿑བཀའ་བརྒྱུད་བསྟན་པའི་གསལ་བྱེད་སངས་རྒྱས་གཉན་པ་རིན་པོ་ཆེས་དགའ་ལྡན་ལྔ་མཆོད་ཉིན་རྗེ་ཙོང་ཁ་པ་རྗེས་དྲན་གྱི་ལྗགས་རྩོམ།
རྗེ་བླ་མ་ཆེན་པོ་བློ་བཟང་གྲགས་པའི་དཔལ་གྱི་ཞབས་ལ་སྒོ་གསུམ་གུས་པས་ཕྱག་འཚལ་ཞིང་སྐྱབས་སུ་མཆིའོ། ། བདག་གི་རྒྱུད་ལ་ཟབ་མོ་རྟེན་ཅིང་འབྲེལ་བར་འབྱུང་བ་བསྟན་པ་ཇི་བཞིན་རྟོགས་ནུས་པའི་ཤེས་རབ་ཕུན་སུམ་ཚོགས་པ་སྐྱེ་བར་བྱིན་གྱིས་བརླབ་ཏུ་གསོལ།
མ་ནོར་ལམ་མཆོག་ངེས་དོན་དབུ་མའི་གནད།།
ཕུལ་བྱུང་རིགས་པའི་རྣམ་དཔྱོད་བགྲང་ཡས་ཀྱིས།།
སྔོན་བྱོན་མཁས་པར་གྲགས་ཚོས་མ་ཕྱེས་པའི།།
ཕྲ་མོས་ཞིབ་འགྲེལ་མཛད་པ་ཁྱེད་ལ་འདུད།།

ཤིང་རྟ་ཆེན་པོའི་སྲོལ་འཛིན་ཁྱེད་མིན་སུ།།
རིགས་པ་སྨྲ་བའི་ཁྱུ་མཆོག་ཁྱེད་མིན་སུ།།
ཡང་དག་ལུང་རིགས་སྤྲོ་མཁན་ཁྱེད་མིན་སུ།།
ཟླ་མེད་བློ་མཆོག་མངའ་བ་ཁྱེད་མིན་སུ།།

ཚད་མར་གྲགས་ཤིང་མཁས་པར་རློམས་རྣམས་ཀྱང་།།
ཁྱེད་ཀྱི་ཚུལ་ཆེན་བླ་མེད་རིགས་པའི་ཁྱད།།
མཐོང་དང་ཐོས་པས་ཆེར་སྙེམས་དྲུང་ནས་འགྱེལ།།
སྨྲ་བའི་ཉི་མ་ཁྱེད་ལ་ལྷག་པར་དད།།

ཕྲ་ལ་ཤེས་དཀའ་དྲང་སྲོང་ཆེན་པོའི་ལམ།།
དུས་གསུམ་རྒྱལ་བའི་གཤེགས་ཤུལ་དེ་ཁོ་ན།།
ཡང་དག་ཕུལ་བྱུང་གཏམ་བཅུད་དེ་ཁོ་ན།།
འདི་ཉིད་རྩལ་འདོན་མཛད་པོའང་ཁྱེད་ཁོ་ན།།

ཁྱེད་ཀྱི་སྐུ་དྲིན་ཕ་མཐས་གཞལ་དཀའ་ཡང་།།
ཁྱེད་ཐུགས་ཟག་མེད་དགོངས་པ་རྫོགས་ཕྱིར་དུ།།
ཟབ་དང་ཕྲ་བའི་དམ་ཆོས་མི་ཟད་ལ།།
ཐོས་བསམ་བསྒྲུབ་པས་ནན་ཏན་བརྩོན་གྱུར་ཅིག།

སྙིགས་མའི་སྐྱེས་བུ་ཆོས་རྗེ་བླ་ཆེན་སོགས།།
ཁ་ན་མ་ཐོ་ཆོས་འགལ་སྡིག་ཏོའི་ལས།།
ཆོས་ལྟར་བཅོས་པའི་རྗེས་སུ་མ་སོང་བར།།
རྣམ་དག་དམ་ཆོས་ངོ་ལྐོག་ཐུབ་པར་ཤོག།

ཆོས་རྗེ་ཁྱེད་ལྟར་ཡོན་ཏན་བྱེ་བའི་མཛོད།།
ལྟ་སྒོམ་སྤྱོད་པ་གདམས་པར་འཁྱེར་བ་ཡིས།།
རླབས་ཆེན་ཐུགས་དམ་མཐིལ་དུ་བསྣུན་མཛད་པའི།།
བཀའ་གདམས་རྣམ་ཐར་གཙང་མའི་རྗེས་སློབས་ཤོག།

ཆོས་ལས་སྐྱེས་ཤིང་ཆོས་ཀྱིས་འཚོ་བ་ཡི།།
ཉམ་ཐག་བདག་ཀྱང་འདི་ནས་བྱང་ཆུབ་བར།།
བཀའ་བཞིན་ཉམས་སུ་ལེན་པས་ཁྱེད་མཉེས་ནས།།
ཐུགས་རྗེའི་འཇུག་པས་བུ་བཞིན་སྐྱོངས་ཅིག་གུ།།

མདོར་ན་འདི་བཟུང་སྐྱེ་དང་ཚེ་རབས་ཀུན།།
དམ་པའི་རྗེས་འགྲོ་ཞིང་མཆོག་མཉེས་རྒྱུར་བརྩོན།།
ཁྱད་པར་སྙིང་རྗེ་བྱང་སེམས་ཡང་དག་ལྟ།།
འབྲལ་མེད་བསྟེན་ཅིང་ས་ལམ་མྱུར་བགྲོད་ཤོག།
ཅེས་པ་འདིའང་གུས་སངས་རྒྱས་མཉན་པའི་མཚན་ཙམ་གོས་པ་དེས། དེ་རིང་༧རྗེ་བླ་མ་མཆོག་གི་འདས་མཆོད་ཉིན་མོར་གསོལ་འདེབས་དྲག་པོས་སྦྱར་ཅིང་སྨོན་པའོ།། https://t.cn/A6Ab0t9I

ས་ཡི་སྙིང་པོའི་མདོ་ལས།
࿑ ལས་ཀྱི་ནུས་པ་ནི་ཤིན་ཏུ་ཆེ་བའི་ཕྱིར་རི་རབ་ལས་ཀྱང་དཔངས་མཐོ་བ་དང་། རྒྱ་མཚོ་ལས་ཀྱང་གཏིང་ཟབ་པ་དང་། འཕགས་པའི་ལམ་རྣམས་ཀྱང་སྒྲིབ་པར་བྱས་པས་ན། སེམས་ཅན་རྣམས་ཀྱིས་ལས་ཆུང་ངུས་ཀྱང་མི་གནོད་སྙམ་དུ་སེམས་པར་མི་བྱ་སྟེ། ཤི་བའི་རྗེས་སུ་སྐྲ་ཉག་མ་ཙམ་ཡང་ཆུད་ཟོས་མེད་པར་ལས་ཀྱི་རྣམ་པར་སྨིན་པ་ཉམས་སུ་མྱོང་བར་འགྱུར་རོ།།
《地藏经》：

业力甚大，能敌须弥，能深巨海，能障圣道。是故众生莫轻小恶，以为无罪，死后有报，纤毫受之。

༄༅། །ཟེ་ཆེན་པ་ ༸ ཀུན་བཟང་རྣམ་པར་རྒྱལ་བའི་སྡེ་ལ་བསྟོད་པ།

࿑ གྲངས་མེད་བསྐལ་པར་ཚོགས་བསགས་སྒྲིབ་སྦྱངས་མཐུས། །

བདེ་གཤེགས་མྱ་ངན་མེད་དུ་བྱང་ཆུབ་མཁར། །

སྤྲུལ་པ་ཉིན་མཚན་མགོན་པོའི་སྒྱུ་འཕྲུལ་གར། །

འགྲོ་ལ་མངོན་སུམ་སྣང་དེར་བསམ་གྱིན་དད། །

གང་ལ་བརྟེན་ན་སྐྱེས་བུ་གསུམ་རིམ་བཞིན། །

འབྲས་འཟང་དུས་ལས་ཡོལ་མིན་འགྲོ་ཀུ༷ན་གཉེན། །

ལམ་བཟ༷ང་ཐེག་རྩེར་དཀྲི་མཁས་རྣ༷མ་འདྲེན་མཆོག །

པདྨའི་རྒྱ༷ལ་ཚབ་གཏན་གྱི་སྐྱབས་སུ་བརྟེན། །

རྡོ་གྲུབ་ཆེན་ ༸ ཀུན་བཟང་གཞན་ཕན་གྱིས་སོ། །