༄༅།།བསྟན་པ་རིན་ཆེན་མཆོག་གིས་མ་ཁྱབ་པ། །
ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །
སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །
ཕན་བདེའི་གཏེར་དེ་གསལ་བར་བྱེད་པར་ཤོག །

བཀྲ་ཤིས་ཚེ་རིང་མཆེད་ལྔར་ཀ་ཕྲེང་གིས་བསྟོད་པ།
———དཔལ་རྒྱལ་བ་ཀརྨ་པ།
༄༅།། ཧྲི་༔ ཀ་དག་ཀློང་ནས་སྒྱུ་མའི་སྐུར་བཞེངས་ཤིང༌།།
ཁ་བ་ཅན་གྱི་ཞིང་སྐྱོང་བརྟན་མའི་གཙོ།།
ག་བུར་དྲི་ལྡན་ལྷ་མོའི་ཚོགས་རྣམས་ལ།།
ང་རྒྱལ་སྤངས་ཏེ་གུས་པས་བསྟོད་པར་བགྱི།།

ཅ་ཅོ་ཆེར་སྒྲོགས་མ་མོ་འབུམ་གྱི་དབུས།།
ཆ་ཤས་ཐམས་ཅད་རིན་ཆེན་གསེར་གཡུས་བརྒྱན།།
ཇ་སོགས་གྲུབ་པའི་འབྱོར་བ་རྣམ་བཞི་ཡིས།།
ཉ་རྒྱས་ཟླ་ལྟར་རྣལ་འབྱོར་རེ་བ་སྐོང༌།།

ཏ་ཐཱ་ག་ཏ་དུས་གསུམ་གཤེགས་པ་ཀུན།།
ཐ་དད་མ་ལུས་སྐྱེད་པའི་ཆོས་སྐུ་ཡུམ།།
ད་ལྟ་བཅོམ་ལྡན་ཐུབ་པའི་བསྟན་པ་ལ།།
ན་རྒ་བྲལ་བའི་སྲུང་མ་མཆེད་ལྔའི་ཚུལ།།

པ་སངས་ཟླ་བའི་མདངས་ལྡན་གཙོ་མོ་ནི།།
ཕ་རོལ་བདུད་དཔུང་འཇོམས་པའི་རྡོ་རྗེ་དང༌།།
བ་ལྟར་ཚེ་མཆོག་འཇོ་བའི་བུམ་བཟང་བཅས།།
མ་གཅིག་བཀྲ་ཤིས་དཔལ་འབར་ཁྱོད་ལ་བསྟོད།།
ཙཱ་རི་ཏྲ་སོགས་གསང་གསུམ་དཀྱིལ་འཁོར་དུ།།
ཚ་ངད་འབར་བ་བཀའ་ཉན་ཕོ་ཉའི་ཚོགས།།
ཛ་ཡ་འཁོར་ལོའི་འདུ་བར་རྟག་རོལ་ནས།།
ཝ་ལྟར་ཞིང་དང་ཉེ་བའི་ཞིང་ཀུན་ཉུལ།།

ཞྭ་བཞིན་བསྟེན་པ་རྩ་བརྒྱུད་བླ་མའི་ཚོགས།།
ཟ་ཧོར་མཁན་པོ་མཚོ་སྐྱེས་རྡོ་རྗེ་ནས།།
འ་ཅག་སྒྲུབ་བརྒྱུད་མེས་པོ་མི་ལ་རྗེའི།།
ཡ་མཚན་ལུང་དང་བཀའ་ཡི་ཕྱག་རྒྱ་ལྟར།།

ར་ལྟར་ལས་ཉོན་གཡང་ས་ཉམ་ང་བར།།
ལ་ལ་ཙམ་མིན་ཀུན་ཏུ་རྒྱུ་བ་དག།
ཤ་རུས་འབྲེལ་བའི་སྲིང་ལྟར་གདུང་བ་ཡིས།།
ས་ལམ་ཡང་དག་གནས་ལ་འགོད་པར་མཛོད།།

ཧ་ཅང་སྙིགས་མའི་རང་མདངས་ངོམ་པའི་དུས།།
རིང་ནས་མཛའ་བའི་ལྷ་མོ་ཁྱོད་འབོད་ན།།
ཨ་ཧོ་གློག་ལྟར་མྱུར་བའི་རྫུ་འཕྲུལ་གྱིས།།
མི་བཟད་རྒུད་པ་ཀུན་ལས་གྲོལ་བར་མཛོད།

བཀྲ་ཤིས་ཚེ་རིང་མཆེད་ལྔར་ཀ་ཕྲེང་གིས་བསྔགས་པར་བྱས་པ་འདི་ཡང༌། ཞྭ་མཐོན་མཐིང་གི་ཅོ་པན་འཛིན་པ་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་ཞེས་གཞོན་ནུའི་ན་ཚོད་དུ་སོན་ཀྱང༌། དགེ་བའི་རྩ་བ་རྒས་པར་གྱུར་པ་དེས། འཕགས་པའི་ཡུལ་ཁ་བའི་རི་དང་ལྡན་པའི་ངོགས་སུ་དྭང་བ་དང་ལྡན་པའི་ཡིད་ཀྱིས་བསྟོད་པའོ།།

༄༅།།སྐྱབས་རྗེ་གཡུ་ཁོག་བླ་མ་བྱ་བྲལ་ཆོས་དབྱིངས་རང་གྲོལ་གྱི་ཞལ་གདམས་སྤྱོད་ལམ་ལམ་འཁྱེར་གནད་བསྡུས་མ་བཞུགས། །
ཀྱེ་ལགས། མཚུངས་མེད་དྲིན་ཆེན་བླ་མ་རིན་པོ་ཆེ།། འདུག་པའི་དུས་སུ་སྤྱི་བོའི་གཙུག་ཏུ་བསྒོམ།། ཡང་ཡང་གསོལ་བ་ཐོབ་ལ་དབང་བཞི་ལོངས།། ཐུགས་ཡིད་དབྱེར་མེད་འདྲེས་པའི་དགོས་པ་ཡོད།། སྤྱོད་ལམ་སྐབས་སུ་གཟུགས་སྣང་བླ་མའི་སྐུ། སྒྲ་གྲགས་ཐམས་ཅད་གསུང་གི་རང་བཞིན་དང་། དྲན་རྟོག་བཟང་ངན་ཐུགས་སུ་འཁྱེར་ཤེས་ན།། སྣང་སྲིད་བླ་མར་འཆར་བའི་གདམས་ངག་ཡིན།། ཟ་བའི་དུས་སུ་མགྲིན་པའི་དབུས་སུ་བསྒོམ།། བཟའ་བཏུང་བདུད་རྩི་ཕུད་ཀྱིས་ལེགས་མཆོད་ན།། བཟའ་བཅའ་བཏུང་བའི་སྒྲིབ་པ་མི་འབྱུང་ཞིང་།། དགའ་སྟོན་ཚོགས་སུ་འགྱུར་བའི་དགོས་པ་ཡོད།། ཉལ་བའི་དུས་སུ་སྙིང་གི་དཀྱིལ་དུ་བསྒོམ།། སྐུ་ཡི་འོད་ཀྱིས་བརྟན་གཡོའི་སྣང་བ་ཀུན།། འོད་དུ་གྱུར་ནས་སླར་ཡང་རང་ལ་བསྡུས།། རྨི་ལམ་འོད་གསལ་འཆར་བའི་གདམས་ངག་ཡིན།། ནམ་ཞིག་མི་སྡོད་ཕྱི་མར་འགྲོ་བའི་ཚེ།། བློ་སྣ་ཚབ་ཚུབ་མང་པོ་མི་བྱེད་པར།། རང་རིག་བླ་མའི་ཐུགས་དང་དབྱེར་མེད་དུ།། འཇོག་པ་འཕོ་བ་ཀུན་གྱི་རྒྱལ་པོ་ཡིན།། ཁྱོད་དང་ང་གཉིས་མི་ཚེ་གང་བོ་རུ།། མཉམ་དུ་བསྡད་ཀྱང་འདི་ལས་ལྷག་པ་ཞིག། ཟབ་པའི་གདམས་ངག་བདག་ལ་འབུལ་རྒྱུ་མེད།། དེའི་ཕྱིར་སྙིང་གི་དབུས་སུ་འདི་ཟུངས་ཤིག། ཅེས་པ་འདི་ཉིད་སློབ་བུ་བསོད་ནམས་ཕུན་ཚོགས་ཀྱིས་བསྐུལ་ངོར་སྐྱབས་རྗེ་བླ་མ་ཆོས་དབྱིངས་རང་གྲོལ་གྱིས་བྲིས་པ་དགེའོ།།