ཕ་ཡུལ་ལ་ལོག་ཐེངས་རེ་རེ།
སྨན་བླ་སྐྱབས།(ལྷ་ས)
ཕ་ཡུལ་ལ་ལོག་ཐེངས་རེ་རེར། ཁྱོད་ཀྱིས་ཕ་ཡུལ་གྱི་སྐོར་ལ་བསམ་གཞིག་ཁ་ཤས་མི་གཏོང་ཀ་མེད་ཡིན། སྤྱིར་ལོ་ན་དང་བློ་དཀྱེལ་མཉམ་དུ་སྨིན་པ་དང་བསྟུན་ནས། ཕ་ཡུལ་གྱི་གདགས་གཞི་ལའང་གོ་དོན་རེ་གཉིས་འབྱུང་སྲིད། ཕ་ཡུལ་ནི་སྤྱན་རས་གཟིགས་ཀྱི་གདུལ་ཞིང་སྟེ་གངས་ཀྱི་ར་བས་བསྐོར་ཅིང་ཆུ་ཡི་སྐ་རགས་འཆིང་བའི་དཀར་ལྗང་སྔོ་སྨུག་གིས་གྲུབ་པའི་རྡུལ་ཚོན་གྱི་དཀྱིལ་འཁོར་ཆེན་པོ་ཞིག་ཡིན་ཆོག་ལ། ཕ་ཡུལ་ནི་རང་ཉིད་སྐྱེ་ས་མཆེད་ཡུལ་གྱི་ཡུལ་གྲུ་བྱེ་བྲག་པ་དེའི་རུ་སྡེ་གང་གི་རང་གི་ཕ་རྒན་དང་རང་གི་བུ་ཕྲུག་དག་གི་ཕ་རྒན་སྐྱེ་སའི་ཡུལ་ལ་བྱ་ཆོག་གམ་སྙམ། ཕ་ཡུལ་ལ་ལོག་ཐེངས་རེ་རེར། ཆེ་ཆུང་གཉིས་སུ་བཀྲལ་ཆོག་པའི་ཐ་སྙད་དེས་ཁྱོད་ཀྱི་ལུས་སེམས་ལྷོད་པར་བྱེད་ལ་མིག་ཟུང་གདུང་བར་ཡང་འགྱུར་གྱི་ཡོད།
ཕ་ཡུལ་ལ་ལོག་ཐེངས་རེ་རེར། ཕ་ཡུལ་གྱི་འཕེལ་རྒྱས་སུ་བཏགས་པའི་འགྱུར་བ་སྣ་ཚོགས་པ་ཞིག་མིག་མཐོང་གཟུགས་གྲུབ་རེད་ལ་འགྱུར་བ་དེའི་གོམ་སྟབས་ཀྱི་མགྱོགས་འགྲོས་ནི་ཧ་ལས་ཧང་སང་བ་དང་སྐབས་རེར་བློ་འཚབ་སྐྱེ་དགོས་པ་ཞིག་ཀྱང་རེད་འདུག གཞུང་ལམ་དང་འཁོར་ལོ་འདྲ་མིན་གྱིས་མི་རྣམས་ཀྱི་འགྲོ་སྐྱོད་ལ་སྟབས་བདེ་པོ་ཁྱེར་འོང་གི་འདུག གཞུང་ལམ་དང་འཁོར་ལོ་འདྲ་མིན་གྱིས་མི་རྣམས་ཀྱི་བཅའ་ཀ་དང་གྲོད་ཁོག་ལ་ཕྱགས་དར་འདྲ་མིན་དབོར་འོང་གི་འདུག མཐོང་མ་མྱོང་བའི་ཉེར་སྤྱད་དང་གོ་མ་མྱོང་བའི་རིམས་གསར་སྣ་ཚོགས་དྲུད་འོང་གི་འདུག ཆ་འཕྲིན་གྱི་གོས་ལྭ་གྱོན་པའི་སྨྱོན་པའི་ལག་ལ་རལ་གྲི་དཔེ་གསར་དག་དར་འོང་གི་འདུག གཞུང་སྒེར་གང་རུང་གི་གོ་མཚོན་ཏུ་གྱུར་པའི་ལག་ཐབས་དེ་དག་གིས་རིགས་རྒྱུད་ཀྱི་ལྕེ་ལ་རྒོལ་གྱིན་འདུག རིག་གནས་ཀྱི་སྲོག་ལ་རྒོལ་གྱིན་འདུག མི་ཐོག་མིས་བརྗེས་ཏེ་མི་སེམས་ཧམ་པས་སྦོས་ཡོང་གི་འདུག བརྣབ་སེམས་ཇེ་ཆེ་དང་སྙོམས་ལས་ཇེ་ལྕིར་འགྲོ་གི་འདུག ཁ་ཆག་སྣ་རལ་དུ་འགྱུར་བཞིན་པའི་ཁོར་ཡུག་དང་ཁོར་ཡུག་གི་འགྱུར་ཕྱོགས་ཀྱིས་མི་ལུས་ཀྱི་ཆ་བྱད་དང་ཕྱི་རབས་པའི་སྐྱེ་འབྲས་ཀྱང་འགྱུར་འགྲོ་གི་འདུག ནང་གི་བྱེད་པ་དང་ཕྱི་ཡི་ངོ་འཛུམ་ཡང་ཡལ་འགྲོ་གི་འདུག ཕྱི་རབས་པའི་བཞིན་ལ་གར་ཡོང་ཆ་མི་འཚལ་བའི་སྡང་མིག་དང་སྡང་མིག་གི་ཟུར་མདའ་ལ་སྐུང་བའི་རྩུབ་སྤྱོད་ཅིག་ཀྱང་འགོས་ཤིང་མངོན་ཡོང་གིན་འདུག ཕ་ཡུལ་ལ་ལོག་ཐེངས་རེ་རེར། རིན་ཐང་མེད་པ་དང་རིན་ཐང་མེད་པ་གཉིས་ཀྱི་རིན་ཐང་ཕྱིན་ཅི་ལོག་པའི་སྣང་ཚུལ་མང་པོ་ཞིག་མཐོང་ཡོང་།
ཕ་ཡུལ་ལ་ལོག་ཐེངས་རེ་རེར། ཕ་ཡུལ་གྱི་སྐོར་ལ་ཡང་བསྐྱར་མནོ་བསམ་ཞིབ་ཏུ་གཏང་དགོས་འབྱུང་། ཞིབ་ཏུ་བསམ་ཞིང་གཞིགས་པའི་ཚེ། ས་སྒང་སྔོ་རིལ་འདི་པ་ཇེ་ཆུང་ནས་ཇེ་ཆུང་དང་བརྟན་གཡོ་ཐམས་ཅད་རྫོགས་ལྡན་དུ་འབོད་པའི་ཧམ་རྩོད་ཀྱི་དུས་རབས་ཤིག་ལ་སླེབས་ཚར་ན། དར་ལྕོག་རླུང་བསྐྱོད་ཀྱི་ཡུལ་ལུང་ཞིག་གིས་དུས་ཀྱི་བརྡབ་ཞོགས་ཆེན་མོའི་རླབས་ཤུགས་ཀྱི་ཨར་བརྟེན་གྱི་མ་རེད་དེ། རང་ཉིད་དང་བཅས་པའི་དུས་ཀྱི་དར་སོའི་དབང་དུ་ཤོར་བ་དག་བསམ་པའི་བཀོད་པ་དམིགས་བསལ་པའི་སྟོབས་ཀྱིས་ཧམ་འདོད་ངོམས་མེད་ཅིག་ཀྱང་ཡིན་མི་སྲིད་དེ་ག་ལ་ཡིན། ཨ་གསར་སྤེན་མའི་མེ་ལྕེ་དེ། འབར་སྐབས་དྲོ་རུང་འབར་ཡུན་ཐུང༌བ་ལོས་ཀྱང་ཤེས། ད་དུང་ཡང་། བརྟན་པ་སྣོད་ཀྱི་འཇིག་རྟེན་མ་རུ་བསྒོམས་ཡོད་ལ། གཡོ་བ་བཅུད་ཀྱི་སེམས་ཅན་སྤུན་དུ་སེམས་འདུག་པ་མ་ཡིན་ནམ། མ་ཡིན་ནམ། བྱ་དངོས་གསར་འདྲིས་ལ་དགའ་ཚོར་སྐྱེན་པའི་ཕ་ཡུལ་ལའང་ཚུགས་ཐུབ་ཀྱི་རང་གཤིས་ཙམ་རེ་ཡོད་དང་ཡོད། ཕ་ཡུལ་ལ་ལོག་ཐེངས་རེ་རེར། ངས་ཕ་ཡུལ་ཉིད་སྙིང་ཁར་སྦྱར་ནས་རང་གིས་རང་ལ་སེམས་གསོ་བྱ་དགོས་འབྱུང་།
ཕ་ཡུལ་ལ་ལོག་ཐེངས་རེ་རེར། ནམ་ཟླའི་ས་བཅུད་ཡལ་ནས་ཆར་ཆུ་དུས་ཐོག་མིན་ན་ཡང་། ནམ་མཁའ་སྔོ་ལ་ཡུག་དེ་དང་སྤྲིན་དཀར་ཞོ་གསར་འདྲ་བ་དེ་ནམ་ཡང་བརྟན་ཅིང་རྟག་པ་འདྲ་ལ། རི་རྩེའམ་སྤང་གཤོང་གང་རུང་ནས་རྫི་མོའི་གླུ་ཆུང་རེ་བསིལ་རླུང་དང་འགྲོགས་ནས་འགྲོ་བ་ཐོས་རྒྱུ་འདུག གངས་ལ་རྨིག་རྗེས་མེད་ཀྱང་དཀར་ཆུ་ལོངས་སུ་སྤྱོད་པ་མཐོང་རྒྱུ་འདུག མགོ་ནག་མི་རེ་ངོ་རེས་གསེར་གྱི་འཁོར་ལོ་བརྒྱ་དང་བརྒྱད་རེ་སྐོར་བཞིན་འདུག འགྲོ་བ་རིགས་དྲུག་ཟེར་ཞིང་ཡིག་དྲུག་ཟློ་ལ་སེམས་ཅན་མ་རུ་རློམ་གྱིན་འདུག སློབ་གྲྭ་པ་དང་དགེ་འདུན་འདུས་སྡེ་ཆེན་པོས་དབྱངས་གསལ་ངག་ལ་སྐྱོར་གྱིན་འདུག དངོས་གནས། དེ་དག་ཁྱོད་ཀྱི་སེམས་གསོ་མ་ཡིན་ནམ།①ཕ་ཡུལ་ལ་ལོག་ཐེངས་རེ་རེར། གྲོགས་པོས་སྙན་ངག་གི་ལམ་ནས་བསླབ་བྱ་གནངས་པ་དེ་ཡང་དྲན་ཡོང་ངོ་།།
ཕ་ཡུལ་ལ་ལོག་ཐེངས་རེ་རེར། ཕ་ཡུལ་ལ་བཅངས་པའི་བརྩེ་སེམས་དེ་ལ་རྙིང་རྒྱུ་མེད་ཅིང་། ཕ་ཡུལ་གྱིས་གནང་བའི་མཉེས་གཤིན་དེ་ཡང་བརྗེད་རྒྱུ་མེད། ད་ལྟ། དྲིན་གྱིས་བསྐྱངས་པའི་ཕ་མའི་སྐུ་ཚེ་རྫོགས་ཤིང་རྒན་རབས་རྣམས་ཀྱང་མཐོང་རེ་སྐན། རང་ལུས་རྒ་བས་ནོན་ཞིང་མི་འདོད་ནད་ཀྱིས་བཏབ་སྟེ་ལུས་སེམས་ཨ་ཐང་མ་ཆད་ཙམ་གྱི་དུས་ལ་ཡང་། ངལ་བས་དུབ་པའི་ལུས་པོ་འདི་ཉིད་ཕ་སའི་པང་ལ་བསྙེ་ཆོག་ཀྱང་། རྨ་ཁས་གང་བའི་སེམས་པ་འདི་ཉིད་འཇོག་སའི་གནས་ཤིག་གང་ན་ཡོད།②དེ་ལྟ་ན་ཡང་། བར་སྣང་ཁམས་ནས་གངས་ཀྱི་རྡུལ་མང་བརྩེགས་པའི་དཀྱིལ་འཁོར་དེ་ལ་ཕྱི་མིག་ལྟ་ཐེངས་རེ་རེ་དང་། གོམ་པའི་འདེགས་འཇོག་བྱིས་པའི་དུས་ཀྱི་ལམ་ཕྲན་དེ་ལ་བསྒྱུར་ཐེངས་རེ་རེ་ལ། མི་རྟག་འཇིག་རྟེན་ཁམས་དང་མི་ཚེའི་བཤུལ་ལམ་རིང་མོའི་དཀའ་སྡུག་འཛུམ་གྱིས་བསུ་བའི་དམ་བཅའ་བརྟན་པོ་སྙིང་ན་གསལ། གཅེས་པའི་བུ་ཕྲུག་དག་གི་ལུས་པོ་བདེ་ཞིང་བྱ་བ་ལམ་འགྲོ་ཕ་སྐད་ཕ་ས་ཡིད་ལ་བརྣགས་ཏེ་ཕ་ཤུལ་བུ་ཚས་ཟིན་ཙམ་བྱུང་ན་ཚེ་འདིའི་རྙེད་གྲགས་སྟོང་པར་ཆགས་དོན་ཅི། དབྱངས་གསལ་སོ་བཞིའི་ཟས་རིན་བསབ་པའི་སྐྱེས་བུ་མང་དུ་མེད་ན་ཤུལ་དུ་ཅི་ཞིག་གཞག་པར་འདོད་པ་དེ་ཡང་ཧམ་པ་ཞིག་ཀྱང་མིན་ནམ་སྙམ། མདོར་ན། ཕ་ཡུལ་ཞེས་པའི་བརྡ་དོན་དེ་ནི་རང་གི་ལུས་སྲོག་ཇི་བཞིན་སྣོད་བཅུད་གཉིས་ཆར་ཚེ་འདིར་ལས་འབྲེལ་བྱུང་བའི་སྦྲེལ་ཐག་སྟེ། ཤར་མི་ཉག་གི་འགྲོ་བྲོའི་གཞས་ཚིག་ཅིག་ཏུ། སང་འགྲོ་གནངས་འགྲོ་འགྲོ་ཐལ་མ་བསམ་རོགས།། རྐང་པའི་རི་མོ་མི་ཡུལ་ལུང་ལ་བཞག །རང་སེམས་བསམ་པ་རང་ཡུལ་ཕྱོགས་ལ་བཞག།③ཅེས་པ་ལྟར་རོ།། ཕ་ཡུལ་ལ་ལོག་ཐེངས་རེ་རེར། ཕ་ཡུལ་གྱིས་བྱིན་པའི་བསམ་གཞིག་ཐན་ཐུན་རྒྱུན་ཆད་མེད།
མཆན།
① གྲོགས་ལྗང་བུ་ལགས་ཀྱིས་ཁོ་བོར་བྲིས་པའི་སྙན་ངག«བསམ་བློ་ཡག་པོ་གཏོང་དགོས»ཞེས་པའི་ནང་གི་ཚིག་གཡར་བ།
② རང་རྩོམ«རྩྭ་ཐང»གི་གཞས་ཚིག་ལས་ཁོལ་དུ་ཕྱུང་བ།
③ གྲོགས་གངས་དབང་གི་དྲ་རྩོམ«ཤར་མི་ཉག་རིང་མོར་དལ་གྱིས་བསྐྱོད»ཅེས་པ་ལས་དྲངས།
ཕྱི་ལོ༢༠༡༩ཟླ༢ཚེས༢༥རེས་གཟའ་ཟླ་བའི་དགོང་དྲོར་ཕ་ཡུལ་དུ་གྲུབ་པར་བྱས།
༢༠༡༩ལོའི་《གངས་རྒྱན་མེ་ཏོག》དེབ༤བ་ལས་བདམས།
སྨན་བླ་སྐྱབས།(ལྷ་ས)
ཕ་ཡུལ་ལ་ལོག་ཐེངས་རེ་རེར། ཁྱོད་ཀྱིས་ཕ་ཡུལ་གྱི་སྐོར་ལ་བསམ་གཞིག་ཁ་ཤས་མི་གཏོང་ཀ་མེད་ཡིན། སྤྱིར་ལོ་ན་དང་བློ་དཀྱེལ་མཉམ་དུ་སྨིན་པ་དང་བསྟུན་ནས། ཕ་ཡུལ་གྱི་གདགས་གཞི་ལའང་གོ་དོན་རེ་གཉིས་འབྱུང་སྲིད། ཕ་ཡུལ་ནི་སྤྱན་རས་གཟིགས་ཀྱི་གདུལ་ཞིང་སྟེ་གངས་ཀྱི་ར་བས་བསྐོར་ཅིང་ཆུ་ཡི་སྐ་རགས་འཆིང་བའི་དཀར་ལྗང་སྔོ་སྨུག་གིས་གྲུབ་པའི་རྡུལ་ཚོན་གྱི་དཀྱིལ་འཁོར་ཆེན་པོ་ཞིག་ཡིན་ཆོག་ལ། ཕ་ཡུལ་ནི་རང་ཉིད་སྐྱེ་ས་མཆེད་ཡུལ་གྱི་ཡུལ་གྲུ་བྱེ་བྲག་པ་དེའི་རུ་སྡེ་གང་གི་རང་གི་ཕ་རྒན་དང་རང་གི་བུ་ཕྲུག་དག་གི་ཕ་རྒན་སྐྱེ་སའི་ཡུལ་ལ་བྱ་ཆོག་གམ་སྙམ། ཕ་ཡུལ་ལ་ལོག་ཐེངས་རེ་རེར། ཆེ་ཆུང་གཉིས་སུ་བཀྲལ་ཆོག་པའི་ཐ་སྙད་དེས་ཁྱོད་ཀྱི་ལུས་སེམས་ལྷོད་པར་བྱེད་ལ་མིག་ཟུང་གདུང་བར་ཡང་འགྱུར་གྱི་ཡོད།
ཕ་ཡུལ་ལ་ལོག་ཐེངས་རེ་རེར། ཕ་ཡུལ་གྱི་འཕེལ་རྒྱས་སུ་བཏགས་པའི་འགྱུར་བ་སྣ་ཚོགས་པ་ཞིག་མིག་མཐོང་གཟུགས་གྲུབ་རེད་ལ་འགྱུར་བ་དེའི་གོམ་སྟབས་ཀྱི་མགྱོགས་འགྲོས་ནི་ཧ་ལས་ཧང་སང་བ་དང་སྐབས་རེར་བློ་འཚབ་སྐྱེ་དགོས་པ་ཞིག་ཀྱང་རེད་འདུག གཞུང་ལམ་དང་འཁོར་ལོ་འདྲ་མིན་གྱིས་མི་རྣམས་ཀྱི་འགྲོ་སྐྱོད་ལ་སྟབས་བདེ་པོ་ཁྱེར་འོང་གི་འདུག གཞུང་ལམ་དང་འཁོར་ལོ་འདྲ་མིན་གྱིས་མི་རྣམས་ཀྱི་བཅའ་ཀ་དང་གྲོད་ཁོག་ལ་ཕྱགས་དར་འདྲ་མིན་དབོར་འོང་གི་འདུག མཐོང་མ་མྱོང་བའི་ཉེར་སྤྱད་དང་གོ་མ་མྱོང་བའི་རིམས་གསར་སྣ་ཚོགས་དྲུད་འོང་གི་འདུག ཆ་འཕྲིན་གྱི་གོས་ལྭ་གྱོན་པའི་སྨྱོན་པའི་ལག་ལ་རལ་གྲི་དཔེ་གསར་དག་དར་འོང་གི་འདུག གཞུང་སྒེར་གང་རུང་གི་གོ་མཚོན་ཏུ་གྱུར་པའི་ལག་ཐབས་དེ་དག་གིས་རིགས་རྒྱུད་ཀྱི་ལྕེ་ལ་རྒོལ་གྱིན་འདུག རིག་གནས་ཀྱི་སྲོག་ལ་རྒོལ་གྱིན་འདུག མི་ཐོག་མིས་བརྗེས་ཏེ་མི་སེམས་ཧམ་པས་སྦོས་ཡོང་གི་འདུག བརྣབ་སེམས་ཇེ་ཆེ་དང་སྙོམས་ལས་ཇེ་ལྕིར་འགྲོ་གི་འདུག ཁ་ཆག་སྣ་རལ་དུ་འགྱུར་བཞིན་པའི་ཁོར་ཡུག་དང་ཁོར་ཡུག་གི་འགྱུར་ཕྱོགས་ཀྱིས་མི་ལུས་ཀྱི་ཆ་བྱད་དང་ཕྱི་རབས་པའི་སྐྱེ་འབྲས་ཀྱང་འགྱུར་འགྲོ་གི་འདུག ནང་གི་བྱེད་པ་དང་ཕྱི་ཡི་ངོ་འཛུམ་ཡང་ཡལ་འགྲོ་གི་འདུག ཕྱི་རབས་པའི་བཞིན་ལ་གར་ཡོང་ཆ་མི་འཚལ་བའི་སྡང་མིག་དང་སྡང་མིག་གི་ཟུར་མདའ་ལ་སྐུང་བའི་རྩུབ་སྤྱོད་ཅིག་ཀྱང་འགོས་ཤིང་མངོན་ཡོང་གིན་འདུག ཕ་ཡུལ་ལ་ལོག་ཐེངས་རེ་རེར། རིན་ཐང་མེད་པ་དང་རིན་ཐང་མེད་པ་གཉིས་ཀྱི་རིན་ཐང་ཕྱིན་ཅི་ལོག་པའི་སྣང་ཚུལ་མང་པོ་ཞིག་མཐོང་ཡོང་།
ཕ་ཡུལ་ལ་ལོག་ཐེངས་རེ་རེར། ཕ་ཡུལ་གྱི་སྐོར་ལ་ཡང་བསྐྱར་མནོ་བསམ་ཞིབ་ཏུ་གཏང་དགོས་འབྱུང་། ཞིབ་ཏུ་བསམ་ཞིང་གཞིགས་པའི་ཚེ། ས་སྒང་སྔོ་རིལ་འདི་པ་ཇེ་ཆུང་ནས་ཇེ་ཆུང་དང་བརྟན་གཡོ་ཐམས་ཅད་རྫོགས་ལྡན་དུ་འབོད་པའི་ཧམ་རྩོད་ཀྱི་དུས་རབས་ཤིག་ལ་སླེབས་ཚར་ན། དར་ལྕོག་རླུང་བསྐྱོད་ཀྱི་ཡུལ་ལུང་ཞིག་གིས་དུས་ཀྱི་བརྡབ་ཞོགས་ཆེན་མོའི་རླབས་ཤུགས་ཀྱི་ཨར་བརྟེན་གྱི་མ་རེད་དེ། རང་ཉིད་དང་བཅས་པའི་དུས་ཀྱི་དར་སོའི་དབང་དུ་ཤོར་བ་དག་བསམ་པའི་བཀོད་པ་དམིགས་བསལ་པའི་སྟོབས་ཀྱིས་ཧམ་འདོད་ངོམས་མེད་ཅིག་ཀྱང་ཡིན་མི་སྲིད་དེ་ག་ལ་ཡིན། ཨ་གསར་སྤེན་མའི་མེ་ལྕེ་དེ། འབར་སྐབས་དྲོ་རུང་འབར་ཡུན་ཐུང༌བ་ལོས་ཀྱང་ཤེས། ད་དུང་ཡང་། བརྟན་པ་སྣོད་ཀྱི་འཇིག་རྟེན་མ་རུ་བསྒོམས་ཡོད་ལ། གཡོ་བ་བཅུད་ཀྱི་སེམས་ཅན་སྤུན་དུ་སེམས་འདུག་པ་མ་ཡིན་ནམ། མ་ཡིན་ནམ། བྱ་དངོས་གསར་འདྲིས་ལ་དགའ་ཚོར་སྐྱེན་པའི་ཕ་ཡུལ་ལའང་ཚུགས་ཐུབ་ཀྱི་རང་གཤིས་ཙམ་རེ་ཡོད་དང་ཡོད། ཕ་ཡུལ་ལ་ལོག་ཐེངས་རེ་རེར། ངས་ཕ་ཡུལ་ཉིད་སྙིང་ཁར་སྦྱར་ནས་རང་གིས་རང་ལ་སེམས་གསོ་བྱ་དགོས་འབྱུང་།
ཕ་ཡུལ་ལ་ལོག་ཐེངས་རེ་རེར། ནམ་ཟླའི་ས་བཅུད་ཡལ་ནས་ཆར་ཆུ་དུས་ཐོག་མིན་ན་ཡང་། ནམ་མཁའ་སྔོ་ལ་ཡུག་དེ་དང་སྤྲིན་དཀར་ཞོ་གསར་འདྲ་བ་དེ་ནམ་ཡང་བརྟན་ཅིང་རྟག་པ་འདྲ་ལ། རི་རྩེའམ་སྤང་གཤོང་གང་རུང་ནས་རྫི་མོའི་གླུ་ཆུང་རེ་བསིལ་རླུང་དང་འགྲོགས་ནས་འགྲོ་བ་ཐོས་རྒྱུ་འདུག གངས་ལ་རྨིག་རྗེས་མེད་ཀྱང་དཀར་ཆུ་ལོངས་སུ་སྤྱོད་པ་མཐོང་རྒྱུ་འདུག མགོ་ནག་མི་རེ་ངོ་རེས་གསེར་གྱི་འཁོར་ལོ་བརྒྱ་དང་བརྒྱད་རེ་སྐོར་བཞིན་འདུག འགྲོ་བ་རིགས་དྲུག་ཟེར་ཞིང་ཡིག་དྲུག་ཟློ་ལ་སེམས་ཅན་མ་རུ་རློམ་གྱིན་འདུག སློབ་གྲྭ་པ་དང་དགེ་འདུན་འདུས་སྡེ་ཆེན་པོས་དབྱངས་གསལ་ངག་ལ་སྐྱོར་གྱིན་འདུག དངོས་གནས། དེ་དག་ཁྱོད་ཀྱི་སེམས་གསོ་མ་ཡིན་ནམ།①ཕ་ཡུལ་ལ་ལོག་ཐེངས་རེ་རེར། གྲོགས་པོས་སྙན་ངག་གི་ལམ་ནས་བསླབ་བྱ་གནངས་པ་དེ་ཡང་དྲན་ཡོང་ངོ་།།
ཕ་ཡུལ་ལ་ལོག་ཐེངས་རེ་རེར། ཕ་ཡུལ་ལ་བཅངས་པའི་བརྩེ་སེམས་དེ་ལ་རྙིང་རྒྱུ་མེད་ཅིང་། ཕ་ཡུལ་གྱིས་གནང་བའི་མཉེས་གཤིན་དེ་ཡང་བརྗེད་རྒྱུ་མེད། ད་ལྟ། དྲིན་གྱིས་བསྐྱངས་པའི་ཕ་མའི་སྐུ་ཚེ་རྫོགས་ཤིང་རྒན་རབས་རྣམས་ཀྱང་མཐོང་རེ་སྐན། རང་ལུས་རྒ་བས་ནོན་ཞིང་མི་འདོད་ནད་ཀྱིས་བཏབ་སྟེ་ལུས་སེམས་ཨ་ཐང་མ་ཆད་ཙམ་གྱི་དུས་ལ་ཡང་། ངལ་བས་དུབ་པའི་ལུས་པོ་འདི་ཉིད་ཕ་སའི་པང་ལ་བསྙེ་ཆོག་ཀྱང་། རྨ་ཁས་གང་བའི་སེམས་པ་འདི་ཉིད་འཇོག་སའི་གནས་ཤིག་གང་ན་ཡོད།②དེ་ལྟ་ན་ཡང་། བར་སྣང་ཁམས་ནས་གངས་ཀྱི་རྡུལ་མང་བརྩེགས་པའི་དཀྱིལ་འཁོར་དེ་ལ་ཕྱི་མིག་ལྟ་ཐེངས་རེ་རེ་དང་། གོམ་པའི་འདེགས་འཇོག་བྱིས་པའི་དུས་ཀྱི་ལམ་ཕྲན་དེ་ལ་བསྒྱུར་ཐེངས་རེ་རེ་ལ། མི་རྟག་འཇིག་རྟེན་ཁམས་དང་མི་ཚེའི་བཤུལ་ལམ་རིང་མོའི་དཀའ་སྡུག་འཛུམ་གྱིས་བསུ་བའི་དམ་བཅའ་བརྟན་པོ་སྙིང་ན་གསལ། གཅེས་པའི་བུ་ཕྲུག་དག་གི་ལུས་པོ་བདེ་ཞིང་བྱ་བ་ལམ་འགྲོ་ཕ་སྐད་ཕ་ས་ཡིད་ལ་བརྣགས་ཏེ་ཕ་ཤུལ་བུ་ཚས་ཟིན་ཙམ་བྱུང་ན་ཚེ་འདིའི་རྙེད་གྲགས་སྟོང་པར་ཆགས་དོན་ཅི། དབྱངས་གསལ་སོ་བཞིའི་ཟས་རིན་བསབ་པའི་སྐྱེས་བུ་མང་དུ་མེད་ན་ཤུལ་དུ་ཅི་ཞིག་གཞག་པར་འདོད་པ་དེ་ཡང་ཧམ་པ་ཞིག་ཀྱང་མིན་ནམ་སྙམ། མདོར་ན། ཕ་ཡུལ་ཞེས་པའི་བརྡ་དོན་དེ་ནི་རང་གི་ལུས་སྲོག་ཇི་བཞིན་སྣོད་བཅུད་གཉིས་ཆར་ཚེ་འདིར་ལས་འབྲེལ་བྱུང་བའི་སྦྲེལ་ཐག་སྟེ། ཤར་མི་ཉག་གི་འགྲོ་བྲོའི་གཞས་ཚིག་ཅིག་ཏུ། སང་འགྲོ་གནངས་འགྲོ་འགྲོ་ཐལ་མ་བསམ་རོགས།། རྐང་པའི་རི་མོ་མི་ཡུལ་ལུང་ལ་བཞག །རང་སེམས་བསམ་པ་རང་ཡུལ་ཕྱོགས་ལ་བཞག།③ཅེས་པ་ལྟར་རོ།། ཕ་ཡུལ་ལ་ལོག་ཐེངས་རེ་རེར། ཕ་ཡུལ་གྱིས་བྱིན་པའི་བསམ་གཞིག་ཐན་ཐུན་རྒྱུན་ཆད་མེད།
མཆན།
① གྲོགས་ལྗང་བུ་ལགས་ཀྱིས་ཁོ་བོར་བྲིས་པའི་སྙན་ངག«བསམ་བློ་ཡག་པོ་གཏོང་དགོས»ཞེས་པའི་ནང་གི་ཚིག་གཡར་བ།
② རང་རྩོམ«རྩྭ་ཐང»གི་གཞས་ཚིག་ལས་ཁོལ་དུ་ཕྱུང་བ།
③ གྲོགས་གངས་དབང་གི་དྲ་རྩོམ«ཤར་མི་ཉག་རིང་མོར་དལ་གྱིས་བསྐྱོད»ཅེས་པ་ལས་དྲངས།
ཕྱི་ལོ༢༠༡༩ཟླ༢ཚེས༢༥རེས་གཟའ་ཟླ་བའི་དགོང་དྲོར་ཕ་ཡུལ་དུ་གྲུབ་པར་བྱས།
༢༠༡༩ལོའི་《གངས་རྒྱན་མེ་ཏོག》དེབ༤བ་ལས་བདམས།
ཐ་ན་རྨི་ལམ་གཉིད་དུ་ཡོལ་ན་ཡང་།།
བླ་མའི་བྱིན་རླབས་མཆོག་གི་སྣང་བ་དང་།།
ནམ་ཡང་འབྲལ་བ་མེད་པས་རྗེས་བཟུང་ནས།།
རྟག་ཏུ་མགོན་ཁྱོད་དགྱེས་པར་བྱེད་གྱུར་ཅིག།
བླ་མའི་བྱིན་རླབས་མཆོག་གི་སྣང་བ་དང་།།
ནམ་ཡང་འབྲལ་བ་མེད་པས་རྗེས་བཟུང་ནས།།
རྟག་ཏུ་མགོན་ཁྱོད་དགྱེས་པར་བྱེད་གྱུར་ཅིག།
སྙིང་དབུས་ཟངས་མདོག་དཔལ་རིའི་ཕོ་བྲང་གི་དབུས་ན།།
རང་བྱུང་པདྨ་རྒྱལ་པོ་སྟོན་འཁོར་གྱི་ལྷ་ཚོགས།།
དབྱིངས་ཡེ་འདུ་འབྲལ་མེད་པའི་དཀྱིལ་འཁོར་དུ་བཞུགས་པར།།
མ་བཅོས་ཡེ་བབས་སོ་མས་གསོལ་བ་རང་འདེབས་ན།།
ཟག་བཅས་འོད་སྐུར་གྲོལ་བའི་དངོས་གྲུབ་ཅིག་མ་གཡེལ།།
གུ་རུ་ཉི་མས། 2021 11 14
རང་བྱུང་པདྨ་རྒྱལ་པོ་སྟོན་འཁོར་གྱི་ལྷ་ཚོགས།།
དབྱིངས་ཡེ་འདུ་འབྲལ་མེད་པའི་དཀྱིལ་འཁོར་དུ་བཞུགས་པར།།
མ་བཅོས་ཡེ་བབས་སོ་མས་གསོལ་བ་རང་འདེབས་ན།།
ཟག་བཅས་འོད་སྐུར་གྲོལ་བའི་དངོས་གྲུབ་ཅིག་མ་གཡེལ།།
གུ་རུ་ཉི་མས། 2021 11 14
✋热门推荐