#微博[超话]# ༄༅།།མདོ་ལས་གསུངས་པའི་ཨ་མའི་དྲིན་ལན་འཇལ་སྟངས་སྐོར།
 ཤཱ་རིའི་བུས་སྟོན་པ་ལ། ད་ལྟ་ངའི་ཨ་མ་རྒས་ཤིང་ནད་ཀྱིས་མནར་ནས་ཉལ་སར་རུ་ལྷུང་ཡོད་པས་ཁྱེད་ཀྱིས་ང་དགེ་འདུན་གྱི་ཚོགས་ནས་གནང་བ་ཞིག་སྟེར་རོགས། ངས་ཨ་མའི་ཞབས་གཡོག་བྱེད་དགོས། མོ་ལ་ང་མ་གཏོགས་བྱིས་པ་མེད་ཞེས་ཞུས།  སྟོན་པའི་ཞལ་ནས། ཤཱ་རིའི་བུ། རང་གི་དྲིན་ཆེ་བའི་ཨ་མའི་ཞབས་གཡོག་བཟོ་བ་ནི་ངའི་ཆོས་དང་ཡང་མཐུན་པ་ཞིག་ཡིན་པས་ཁྱེད་ཀྱིས་གནང་བ་མ་ཞུས་ཀྱང་ཆོག་ཞེས་བཀའ་བསྩལ་ཏོ།། 
   ཡང་ཤཱ་རིའི་བུས། ངས་ཨ་མའི་དྲིན་ལན་ཇི་ལྟར་བྱས་ན་མཇལ་ཐུབ་ཅེས་ཞུས་པས།  སྟོན་པའི་ཞལ་ནས། ཚེ་འདིར་ཁྱེད་ཀྱིས་ཨ་མའི་དྲིན་ལན་ངོ་མ་ཞིག་འཇལ་འདོད་ཚེ། ཨ་མའི་ཐུགས་དགྱེས་ཐུབ་པའང་ཨ་མ་དགའ་ཐབས་བྱོས། ད་དུང་ཁྱེད་རང་དགེ་སློང་དང་དགེ་འདུན་མང་པོའི་ཚོགས་ནས་དགེ་རྩ་ཅི་ཞིག་བསྒྲུབ་པ་ཐམས་ཅད་མར་གྱུར་པའི་སེམས་ཅན་ཀུན་གྱི་ཆེད་དུ་བསྔོ་བ་དང་སྨོན་ལམ་ཡག་པོ་གྱིས་དང་། དྲིན་ཆེ་བའི་ཨ་མ་གསོན་པོ་ཡིན་ན་ཚེ་རིང་ཞིང་ནད་མེད་པ་ལ་ཕན་ཐོགས་ཆེན་པོ་ཡོད། གལ་ཏེ་ཨ་མ་ཚེ་ལས་འདས་ཟིན་ཡང་ཕྱི་མའི་འཕྲུལ་སྣང་གི་འཇིགས་སྐྲག་ཞི་བ་ལ་ཕན་ངེས་ཡིན། དེ་ལས་ཨ་མ་སེམས་ཕམ་ཚར་རྗེས། ཟས་གོས་དང་སྟོབས་འབྱོར་སོགས་གང་གིས་ཀྱང་ཨ་མའི་དྲིན་ལན་འཇལ་ཐབས་མེད། ཅེས་གསུངས་སོ།།

༄༅། །དག་ཡིག་གསར་བསྒྲིགས་ཀྱི་རྩོམ་པ་བོ་ཤེས་བཞིན་བསམ་གཏན་རྒྱ་མཚོའི་ལོ་རྒྱུས་མདོར་བསྡུས།

དེ་ཡང་བཙན་པོའི་རྒྱལ་རབས་སྐབས་ཀྱི་མཐའ་སྲུང་དམག་མིའི་རིགས་རྒྱུད་ལས་མཆེད་པར་གྲགས་པའི་དཔའ་བོ་ལུང་བའི་ཡུལ་གྲུ་འདིར་གནའ་སྔ་མོའི་དུས་ནས་མཁས་པའི་དབང་བོ་རྒྱུ་སྐར་གྱི་གྲངས་ལ་འགྲན་པ་བྱུང་མྱོང་ཞིང་དེ་དག་གི་ཁྲོད་ན་མངོན་པར་མཛེས་པའི་བོད་ཀྱི་བརྡ་དག་མཁན་པོ་དག་ཡིག་གསར་བསྒྲིགས་རྩོམ་པ་བོ་ཤེས་བཞིན་བསམ་གཏན་རྒྱ་མཚོ་ལགས་ནི།
མཚོ་སྔོན་ཞིང་ཆེན་དཔའ་ལུང་རྫོང་ད་ལྟའི་མཚེའུ་མགུར་གྲོང་བརྡལ་དུ་འབོད་པའི་ཤེས་བཞིན་སྡེ་བ་རུ།སྤྱི་ལོ༡༩༢༡ལོར་སྐུ་འཁྲུངས།དགུང་ལོ་བཅུ་བར་མདོ་སྨད་ངྷི་ཚ་དགོན་པའི་ཆོས་སྒོར་ཞུགས་ཤིང་ངུར་སྨྲིག་གི་རྒྱལ་མཚན་སྐུ་ལ་གསོལ།དེ་ནས་ཡི་གེ་འབྲི་ཀློག་དང་གསོ་བ་རིག་པའི་གཞུང་སོགས་གཞུང་ཆེན་པོད་ཏི་ལྔ་ལ་སྦྱངས་བ་མི་དམན་པ་ཐོབ་སྟེ་དགུང་ལོ་སུམ་ཅུ་བར་དགེ་བཤེས་ཀྱི་མིང་བཏགས་བཞེས།
སྤྱི་ལོ་༡༩༥༣ལོར་དགོས་དབང་གིས་དགོན་པ་དང་ཁ་གྱེས་ཏེ་མཚོ་སྔོན་ཞིང་ཆེན་སློབ་གསོ་སྡེ་ཁག་ཏུ་ཕེབས་ཏེ་ཕྱག་ལས་གནང་།
སྤྱི་ལོ༡༩༥༧ལོར་མཚོ་སྔོན་ཞིང་ཆེན་སློབ་གསོ་སྡེ་ཁག་མི་རིགས་སློབ་གསོའི་སྡེ་ཁག་གི་མགོ་གཙོ་གཞོན་པའི་འགན་བཞེས།
སྤྱི་ལོ༡༩༦༢ལོར་མཚོ་སྔོན་ཞིང་ཆེན་མི་རིགས་དཔེ་སྐྲུན་ཁང་དུ་ལས་གནས་སྤོར་ཏེ་མགོ་གཙོ་གཞོན་པའི་འགན་བཞེས་ཤིང་བོད་ཡིག་རྩོམ་སྒྱུར་ཁང་གི་གཙོ་བདག་གི་འགན་ཞོར་དུ་ཁུར།
སྤྱི་ལོ༡༩༧༣ལོ་ནས་བཟུང་སྟེ་དག་ཡིག་གསར་བསྒྲིགས་རྩོམ་སྒྲིག་གི་མགོ་བརྩམས་ཏེ་ལོ་ངོ་དྲུག་ལ་འབད་བརྩོན་བྱས་མཐར་སྤྱི་ལོ་༡༩༧༩་ལོའི་ལོ་སྟོད་དུ་དཔར་དུ་བསྐྲུན་ཞིང་ད་ལྟའི་ཆར་དགོན་པ་དང་སློབ་གྲྭ་ཆེ་ཆུང་གང་ན་ཡང་ལྟ་ཀློག་བྱེད་དང་བྱེད་བཞིན་པ་འདི་ཀ་ལགས་སོ།
གཞན་ཁོང་གིས་མཚོ་སྔོན་ཞིང་ཆེན་གྱི་སློབ་གྲྭ་ཆུང་འབྲིང་གི་བོད་ཡིག་སློབ་དེབ་སྐོར་ཐེངས་དང་པོ་རྩོམ་སྒྲིག་ལོ་ཙཱ་བྱས།༼ཝང་རོའི་ཧྥེ་བཙོན་ཁང་དུ་ཡོད་པ༽ཞེས་བ་ལོ་ཙཱ་པར་སྐྲུན་གནང་བར་མ་ཟད་མའོ་ཙེ་ཏུང་གི་གསུང་བཏུས་དེབ་ལྔ་བའི་ཞུས་ཆེན་པ་མཛད།ཁྱད་པར་དུ་ཀུན་ལ་རླུང་ལྟར་གྲགས་པའི་མི་རོ་རྩེ་སྒྲུང་ཞེས་བའི་གཏམ་རྒྱུད་སྙན་མོ་དེ་འཚོལ་སྡུད་ལེགས་སྒྲིག་གནང་།སྤྱི་ལོ༡༩༧༩ལོའི་ལོ་སྨད་དུ་ཞི་བར་གཤེགས།མེས་པོ་དམ་པ་ཁོང་ནི་དཀའ་སྡུག་གི་འགག་འཕྲང་དོག་པོར་ཡང་ཡང་བརྒྱུད་ནས་བོད་ཀྱི་རིག་གནས་ཀྱི་བླ་སྲོག་ཆད་ལ་ཉེ་བའི་སྐབས་དེར།བོད་ཀྱི་སྐད་ཡིག་སློབ་གསོ་འཕེལ་རྒྱས་ལས་དོན་གྱི་ཕྱོགས་ལ་ཁ་ལག་སེམས་གསུམ་གྱིས་ཐུགས་འཁུར་དང་རྒྱབ་སྐྱོར་བླ་ལྷག་གནང་བ་ལ་ང་ཚོ་ཕྱི་རབས་པ་རྣམས་ཀྱིས་རྗེས་སུ་ཡི་རང་དང་སྙིང་དབུས་ནས་ནམ་ཡང་མི་བརྗེད་པར་ཡང་ཡང་གླེང་དགོས་སྙམ་མོ།།

༄༅། །ལར་གྱི་ན་བ་སློབ་ཆེན་འགྲིམ་པའི་སྐབས།སྒོ་ཤེར་མཆོག་གི་དེབ་འདིར་ཞིབ་ཀློག་ཅིག་བྱས་མྱོང་ཡོད་ཀྱང་།ལོ་དང་ཟླ་བའི་བརྡབ་གསིག་དབང་གིས་ནཱ་ལེནྡྲཱ་དང་འབྲེལ་བའི་ཤེས་བྱ་རགས་རིམ་ཙམ་ལས་ནང་དོན་མང་ཤོས་འཇའ་ཚོན་ཡལ་བ་ལྟར་གར་སོང་ཆ་མེད་དུ་གྱུར་ཟིན་པའི་སྣང་ཚུལ་ཞིག་ངང་གིས་འཆར་སོང་།གཟའ་འཁོར་སྔོན་མའི་གཟའ་མཇུག་ཏུ་དཔེ་ཁང་དུ་འགྲོ་ཞོར་གྱིས་དཔེ་དེབ་འདི་དང་མིག་ཟུར་འཕེན་རེས་ཀྱི་བསྐལ་བ་ཞིག་རག་སོང་སྟབས།སློབ་ཆེན་དུ་ཕྱིར་དྲན་གྱི་དབང་གིས་དང་ཡང་ན་ནང་དོན་ཤེས་འདོད་ཀྱི་དབང་གིས་ཡིན་པ་མ་ཤེས་ཀྱང་།མདོར་ན་དཔེ་ཁང་ནས་བླུས་ཏེ་གཟའ་འཁོར་གཅིག་ཡུན་གྱི་རིང་ལ་མགོ་མཇུག་བར་གསུམ་དུ་བམ་ཀློག་ཚར་གཅིག་བྱས་པ་ཡིན།དོ་ནུབ་རོལ་དབྱངས་ཀྱི་འགྱུར་ཁུགས་དང་བསྟུན་ཏེ་ལོ་རྒྱུས་དང་དུས་རབས་ཀྱི་དཀྱོགས་མཚམས་འདི་ནས་ཆོས་སྲིད་ཟུང་འབྲེལ་དང་ཆོས་སྲིད་ཐ་དད།བསམ་བློ་སྒོམ་དཀྱེལ།ལྟ་བ་དཀྱེལ་ཡངས།འཇིག་རྟེན་པ།ཆོས་ལུགས་པ་བཅས་ཐ་སྙད་རྫིག་པོ་འདི་དག་ལ་དཀྱུས་གཅིག་ཏུ་བསམ་གཞིགས་ཤིག་བྱེད་པའི་གྲོག་རོང་ཞིག་ཏུ་དབང་མེད་སྒོས་ལྷུང་སོང་། །