༄༅།།འཕྲུལ་ཆས་སྤྱད་པའི་རྙེད་དོན་ཚན་རིག་དང་།།

ཏིང་འཛིན་ཤེས་རབ་འཁྱུག་པའི་མྱོང་བ་གཉིས།།

གཡས་གཡོན་གཤོག་པ་ཟུང་གི་འཕུར་རླབས་ཏེ།།

གཅིག་ཤོས་གཅིག་གིས་འགོག་པ་བློ་གྲོས་རྩིང་།།
༸སྐྱབས་རྗེ་མཁན་ཟུར་མཁས་དབང་ཨ་མཆོག་རིན་པོ་ཆེས།

༄༅། །ཤཱཀྱའི་རྒྱལ་བོའི་དམ་བཅའ་ཆེན་མོ།
སྟན་འདིར་བདག་གི་ལུས་འདི་བསྐམས་ཀྱང་རུང༌།།པགས་པ་རུས་པ་ཤ་རྣམས་ཞིག་ཀྱང་རུང༌།།བསྐལ་མང་རྙེད་དཀའི་བྱང་ཆུབ་མ་ཐོབ་པར།།སྟན་འདི་ལས་ནི་བསྐྱོད་པར་མི་བྱའོ།། https://t.cn/RhBZ82l

མི་མཐུན་གཡུལ་རྒྱལ།

༄༅། །མི་མཐུན་གཡུལ་རྒྱལ་ཞེས་པ་ནི། དགྲ་བཤེད་དུ་གྱུར་པའི་སྲོག་ཆགས་རིགས་གཉིས་རེ་གཟུགས་འདྲེས་མར་བྱས་པ་སྟེ། དེའི་མཚོན་དོན་ནི་མི་མཐུན་པ་ཐམས་ཅད་མཐུན་པར་བྱེད་ཅིང༌། ཡང་ན་མི་མཐུན་པའི་ཕྱོགས་ལས་རྣམ་པར་རྒྱལ་བའམ། མི་མཐུན་གཡུལ་ལས་རྣམ་པར་རྒྱལ་བའི་དོན་ཡིན། དེའི་རི་མོར། སེང་གེ་དང་བྱ་ཁྱུང་འདུས་པ་ལས་བྱུང་བའི་གངས་ཀྱི་སེང་གེ་ཁྱུང་གི་མགོ་དང་གཤོག་པ། ཁྱུང་རྭ་ནོར་བུ་འབར་བས་བརྒྱན་པ་ཅན། ཆུ་སྲིན་དང་དུང་འདུས་པ་ལས་བྱུང་བའི་ཆུ་སྲིན་དུང་གི་མཇུག་མ་ཅན་ནམ། ཆུ་སྲིན་དུང་ན་གནས་པའི་ཚུལ་ལ་མཇུག་མ་པ་ཏྲ་འཁྱིལ་བས་མཛེས་པ། ཉ་དང་སྲམ་འདུས་པ་ལས་སྲམ་གསེར་ཉའི་མགོ་ཅན་ལ་ཁ་སྤུ་དཀར་པོས་མཛེས་པ་བཅས་གསུམ་འབྲི་ཚུལ་ཁྱབ་ཆེ་ཞིང༌། ལ་ལས་དེའི་ཐོག་སྟག་དང་འབྲུག་འདུས་པ་ལས་རྒྱ་སྟག་ཁྲ་བོ་གཟིག་འདྲ་བ་ལ་འབྲུག་མགོ་ཅན་བྲིས་ཏེ་ ཕྱོགས་བཞིར་འགོད་སྲོལ་ཡོད་པའང་སྣང་ངོ༌།། །།