དད་མོས་བྱེད་པའི་རིག་གཞུང་འདི་ནི་ཁེ་མཚར་བ་ཞིག་ཡིན་ཏེ། ཁོ་བོས་ནམ་རྒྱུན་མི་ལ་མི་ལས་འདས་པའི་ཤེས་རིག་གི་དད་མོས་ཤིག་ངེས་པར་དུ་དགོས་སྙམ་ཞིང་། དེ་ནི་མི་ལས་འདས་པའི་ཤེས་རིག་དེ་དག་ལ་དབང་འབྱོར་བའི་ཕྱིར་དུ་ཟེར་ནའང་ཆོག་མོད། ཐབས་བདེ་བའི་བཤད་ན་མི་རང་ཉིད་ཀྱི་སྐྱོ་ངལ་སེལ་བའི་ཕྱིར་དུ་སྟེ། མདོར་ན་རང་སྟེང་དུ་བྱུང་དང་འབྱུང་ངེས་ཀྱི་སྡུག་བསྔལ་གང་ཞིག་སེལ་འདོད་དྲག་ཏུ་སྐྱེས་ཡོང་ཚེ་དེ་སེལ་མཁན་ཞིག་འཚོལ་བ་ཡིན་ལ། སེལ་མཁན་དེ་རང་དང་ཁ་ཐག་ཧ་ཅང་ཉེ་བའི་མིའི་རིགས་ལས་མ་རྙེད་ཚེ་ང་ཚོས་ངེས་པར་དུ་མི་ལས་འདས་པའི་ཤེས་རིག་ཅིག་འཚོལ་དགོས་པ་རེད། དེ་ནི་དཔེར་ན་མིའི་སེམས་སྟོང་གི་ནད“空心病”་སེལ་བ་ལ་དད་མོས་དང་སྟོང་ཉིད་ཀྱི་རིམ་གྲོ་མཆོག་ཏུ་བསྔགས་པ་དང་། མི་མཐའ་དག་གིས་རྡུང་སྡིགས་སྟོན་མཁན་ཞིག་གིས་ཁོ་རང་སྟོན་པ་མཆོག་གིས་བློས་མི་གཏོང་སྙམ་དུ་འདང་བཏང་སྟེ་བག་ཕབ་ཁུལ་བྱེད་པ་ལྟ་བུ་རེད། དེ་ནི་དངོས་འདས་ཤེས་རིག་བཙལ་བའི་གྲུབ་འབྲས་རེད་ལ། འདི་སྤྱིའི་ཆ་ནས་ལྷ་ལ་དད་པའི་རིག་གཞུང་གི་རྩ་བའི་རྒྱུ་རྐྱེན་ལའང་མཐུན་ལ་ང་ཚོའི་ཁ་ཉེ་ཐག་ཉེ་རུ་གནས་པའི་རྒྱུན་ལྡན་གྱི་བྱུང་བ་ལྟ་བུའང་རེད། དེས་ན་དངོས་ཡོད་དང་དངོས་ཡོད་ལས་འདས་པའི་ཤེས་རིག་ལ་དད་མོས་བྱེད་པ་ནི་བསོད་ནམས་སམ་བདེ་བ་ཆེན་པོ་དང་ལྡན་པའི་རྒྱུ་རྣམ་དག་ཅིག་རེད་སྙམ། ཞེས་པའང་གང་ཤར་རང་རློམ་གྱིས་སྨྲ་བའི་ཕྲན་ཀུན་ཁྱབ་ཡེ་ཤེས་ནས་སོ།།

དྲོད་འཇམ་ཉི་མ་ཤར་ནས་ཤར་དེ་ལྷོ་ཡི་རི་ལ་ནུབ། །
ཡུལ་སྐོར་འདྲ་བའི་མི་ཚེ་འདི་ཡང་ལ་ཁའི་ཉི་མ་འདྲ། །
རང་ལ་མོས་པའི་བྱ་བ་རེ་རེར་འབད་ནས་མི་ཚེའི་ལོ་ཟླ་སྐྱོང་། །
དཀྱུས་མའི་འཚོ་བ་རིང་མོའི་ཁྲོད་ནས་མི་ཚེ་བདེ་སྐྱིད་འཚོལ། །[并不简单]
​

ཁྱོད་ཀྱི་འགྱུར་བག

_གངས་གཞོན།_

ཕྲད་ན་འཛུམ་གྱི་ཐིག་ལེ་ཁྱོད་རང་ཡིན།།
གྱེས་ན་དྲན་གདུང་ལྕི་མོ་ཁྱོད་རང་ཡིན།།
དགའ་ན་སོ་དཀར་སྟོན་ས་ཁྱོད་རང་ཡིན།།
སྐྱོ་ན་མིག་ཆུས་བཞུར་ས་ཁྱོད་རང་ཡིན།།
གླེང་ན་གཏམ་རྒྱུད་རིང་མོ་ཁྱོད་རང་ཡིན།།
གསང་ན་སེམས་ཀྱི་ན་ཟུག་ཁྱོད་རང་ཡིན།།
འབྲི་ན་ཚིག་གི་དམ་བཅའ་ཁྱོད་རང་ཡིན།།
བཤད་ན་སྙིང་གཏམ་དྲོན་མོ་ཁྱོད་རང་ཡིན།།
དྲན་ན་འཛུམ་པའི་ཞལ་རས་ཁྱོད་རང་ཡིན།།
རྨིས་ན་ཡིད་ཀྱི་བག་ཆགས་ཁྱོད་རང་ཡིན།།
འོན་ཀྱང་ཁྱོད་ཀྱི་སེམས་པ་འགྱུར་སོང་དུས།།
བདག་གི་གཏན་གྱི་འདུན་མ་སུ་ལ་བཅངས།།