དགེ་བཤེས་ཤིག་བཙོན་དུ་ཚུད་ནས་མཐའ་མ་སྲོག་ཐོག་གི་ཉེས་པ་བཏང་སྟེ་མེ་མདའ་རྒྱབ་ལ་ཉེ་བའི་སྐབས་སུ་ཁོང་གིས། དེས་ན་རྗེ་བཙུན་བླ་མ་ཐུགས་རྗེ་ཅན།། མར་གྱུར་འགྲོ་བའི་སྡིག་སྒྲིབ་སྡུག་བསྔལ་ཀུན།། མ་ལུས་ད་ལྟ་བདག་ལ་སྨིན་པ་དང་།། བདག་གི་བདེ་དགེ་གཞན་ལ་བཏང་བ་ཡིས།། འགྲོ་ཀུན་བདེ་དང་ལྡན་པར་བྱིན་གྱིས་རློབས།། ཞེས་པའི་བླ་མ་མཆོད་པའི་ཚིགས་བཅད་དེ་གསུངས་ནས། དེ་རྗེས་མེ་མདའ་བརྒྱབ་ནས་དཀྲོངས་པའི་ལོ་རྒྱུས་ཡོད། ལོ་རྒྱུས་དེ་འདྲ་བ་ཧ་ཅང་མང་པོ་རེད། ལོ་རྒྱུས་དེ་དག་ལ་བརྟེན་ནས་ང་ཚོས་ཅི་ཞིག་ཤེས་དགོས་ཤེ་ན། གནས་བབ་ཐབས་རྡུགས་ཅི་འདྲ་ཞིག་ཏུ་ལྷུང་རུང་། སེམས་ཅན་ཐམས་ཅད་བརྗེད་མི་ཉན་པ་ཞིག་ཡིན་པ་ཤེས་དགོས།

གསུམ་པ། ཟུར་ཚང་མཆོད་ཁང་།
三、苏尔吉佛堂
ཟུར་ཚང་མཆོད་ཁང་ནི་སྐུ་འབུམ་དགོན་པའི་ཉེ་འདབས་ཀྱི་གུང་ཧོ་གྲོང་རྡལ་གྱི་ཟུར་ཚང་སྡེ་བར་ཡོད། ངག་རྒྱུན་དུ། ཟུར་ཚང་ཞེས་བ་ནི་རྗེ་བླ་མའི་ཡབ་ཀླུ་འབུམ་དགེ་ཉིད་དཔོན་པའི་ལས་ཐོག་ལས་བབས་ཏེ་ཡུལ་འདིར་ཟུར་དུ་བཞུགས་པས་“ཟུར་ཚང་”ཞེས་མིང་ཐོགས། མཆོད་ཁང་འདི་རྗེ་བླ་མའི་ཨ་ཅེ་ཡི་ཁྱིམ་གཞིས་དང་རྗེ་བླ་མ་ཉིད་སྐུ་ན་གཞོན་དུས་འདིར་ཐེངས་མང་ཕེབས་པར་བཤད། དེང་གི་ལོ་འགའ་ཡི་སྔོན་གྱི་ངོ་སྤྲོད་རྡོ་རིང་དང་མཚམས་སྦྱོར་ལས་རྗེའི་མ་ཡུམ་གྱི་གཞེས་ཀ་ཡིན་པར་བྲིས་པ་ནི་གསར་བྱུང་གི་གཏམ་ཡིན། སྔོན་མཆོད་ཁང་འདིར་བཞུགས་པའི་མཆོད་རྟེན་རྙིང་བ་ཞིག་ཏུ་རྗེ་བླ་མས་ཡབ་ཀླུ་འབུམ་དགེ་ལ་དབུས་ནས་བསྐུར་བའི་རྗེ་ཚེ་འབུམ་མའི་ཞལ་ཐང་བྱིན་ཅན། རྒྱབ་ངོས་སུ་ཕྱག་ཞབས་ཀྱི་རྗེས་གསལ་བར་ཡོད་པ་ཞིགས་བཞུགས། ཕྱི་ལོ་༡༩༤༠ལོའི་ས་ག་ཟླ་བར་སྐུ་འབུམ་དགོན་གཞུང་ལ་ཕུལ་ཏེ་ད་ལྟ་རྗེ་གསེར་སྡོང་ཆེན་མོར་བཞུགས་སུ་གསོལ་བའོ།།

གཉིས་པ། ཆུ་དཀར་རི་ཁྲོད།
二、静房寺
ཆུ་དཀར་རི་ཁྲོད་ནི་སྐུ་འབུམ་དགོན་པའི་ལྷོ་ནུབ་ཕྱོགས་ཀྱི་སྤྱི་ལེ་ལྔའི་མཚམས་ཀྱི་ཆུ་དཀར་ཐང་ལུང་བའི་ཉིན་ངོས་སུ་ཆགས་ཡོད། སྔོན་ཆོས་རྗེ་དོན་གྲུབ་རིན་ཆེན་ཉིད་བླ་མས་ལུང་བསྟན་བཞིན། དབུས་གཙང་ནས་མདོ་སྨད་ཕྱོགས་སུ་ཕེབས་ཏེ་སྐུ་འབུམ་དང་ཐག་མི་རིང་བའི་གནས་ཆུ་དཀར་རི་ཁྲོད་འདིར་སྒྲུབ་པ་ཉམས་ལེན་ལ་བཞུགས་སྐབས། རྨི་ལམ་དུ་དཔལ་རྡོ་རྗེ་འཇིགས་བྱེད་དང་མཇལ་ཏེ་“རྒྱུན་དུ་ཞལ་ཡང་ཡང་བསྟན་དུ་གསོལ་”ཞེས་གསོལ་བ་བཏབ་པར། “སང་ཕོད་ད་ཙམ་ལ་ལུང་བ་འདིའི་མདའ་རུ་མཇལ་ཡོང་། དེ་བར་དུ་བདེ་བར་གྱིས་”ཞེས་གསུངས་པ་ལྟར། ལོ་རྗེས་མར་རྗེ་ཙོང་ཁ་བ་མཆོག་སྐུ་བལྟམས་པ་མངོན་ཤེས་ཀྱིས་གཟིགས་ཏེ་རྟེན་འབྲེལ་བསྒྲིག་པར་དགོངས་ནས། གསོལ་རས་དང་བདུད་རྩི་བསྲེས་པའི་རིལ་བུ། སྲུང་མདུད། རྡོ་རྗེ་འཇིགས་བྱེད་ཀྱི་བྲིས་སྐུ་བྱིན་རླབས་ཅན། བུ་ཆུང་སྐྱོང་ལུགས་ཀྱི་ཡི་གེ་བཅས་ཡབ་ཡུམ་གཉིས་ལ་བསྐུར། དགུང་ལོ་གསུམ་གྱི་ཚེ་ཡབ་ཡུམ་གཉིས་ཀྱིས་ཆོས་རྗེ་མཆོག་གདན་དྲངས་ནས་བསྙེན་བཀུར་མཛད་དེ་བུ་ཆུང་བླ་མ་ལ་ཕུལ། བཤད་རྒྱུན་ལ། ད་ལྟ་ཡང་སྒྲུབ་ཕུག་གི་ངོས་སུ་ཕྱག་རྗེས་ཤིག་ཡོད་པ་དེ། རྗེ་ཙོང་ཁ་པ་མཆོག་སྐུ་འཁྲུངས་དུས་ས་རྣམ་པ་དྲུག་ཏུ་གཡོས་ཏེ་སྒྲུབ་ཁང་ཡོམ་ཡོམ་དུ་འགུལ་བ་ན། ཆོས་རྗེ་དོན་གྲུབ་རིན་ཆེན་གྱིས་སྒྲུབ་ཁང་གི་བྲག་གྱེན་དུ་བཏེགས་པའི་ཕྱག་ཤུལ་ཡིན་པར་བཤད། ཕྱིས་སུ་དམ་པ་མང་པོ་བཞུགས་ཏེ་རིམ་གྱིས་སྒྲུབ་སྟེ་ཆགས་སོ།།