ལྷ་སའི་ནོར་གླིང་གི་ལོ་རྒྱུས་དང་ཕྱི་ལོ་༡༩༢༠

首页发布

ལྷ་སའི་ནོར་གླིང་གི་ལོ་རྒྱུས་དང་ཕྱི་ལོ་༡༩༢༠ལོ་ཙམ་ནས་ནོར་བུ་གླིང་ཁ་ལ་ཡོད་པའི་སྲོག་ཆགས་འགའ་ཡི་འདྲ་པར་འོས་སྦྱོར།

༧རྒྱལ་དབང་སྐུ་ཕྲེང་ལྔ་པ་ཆེན་པོས་དབྱར་དུས་སུ་ད་ལྟའི་ནོར་གླིང་གི་གནས་སུ་དབུ་གུར་ཕུབ་ནས་ཆབ་ཞུགས་སྤྲོ་གསེང་ལ་བྱོན་མྱོང་བ་དང་། དེ་རྗེས་༧རྒྱལ་དབང་སྐུ་ཕྲེང་བདུན་པས་གནས་དེར་ཆབ་ཞུགས་འཕྲོད་བཞེས་གནང་ཞིང་། རབ་བྱུང་བཅུ་གསུམ་པའི་ཤིང་ཕག་ཕྱི་ལོ་༡༧༥༥ལོར་ཆབ་ཞུགས་གནང་ཡུལ་གྱི་ཤར་ངོས་སུ་ཕོ་བྲང་ཐོག་ཚད་ཉིས་བརྩེགས་ཤིག་གསར་སྐྲུན་མཛད་པ་དེ་ནི་ནོར་གླིང་དུ་ཕོ་བྲང་བསྐྲུན་པའི་ཐོག་མ་ཡིན་ཞིང་། རྒྱལ་བའི་མཚན་དེ་ཕོ་བྲང་ལ་ཐོགས་ནས་བསྐལ་བཟང་ཕོ་བྲང་དུ་གྲགས། དུས་དེ་ནས་བཟུང་དབེན་ཞིང་ཉམས་དགའི་ནོར་གླིང་དེ་ཉིད་༧རྒྱལ་དབང་སྐུ་ཕྲེང་རིམ་བྱོན་སྐུ་ན་ཆུང་དུས་གསན་བསམ་མཛད་ཡུལ་དང་སྲིད་དབང་བཞེས་རྗེས་ཀྱི་དབྱར་དུས་བཞུགས་གནས་སུ་གྱུར། ༧རྒྱལ་དབང་སྐུ་ཕྲེང་བརྒྱད་པ་འཇམ་དཔལ་རྒྱ་མཚོའི་སྐུ་དུས་བསྐལ་བཟང་ཕོ་བྲང་བྱང་ངོས་ཀྱི་ཆོས་ར་དང་། མཚོ་དཀྱིལ་ཕོ་བྲང་ཀླུ་ཁང་དང་བཅས་པ། ནུབ་ངོས་ཀྱི་གྲུ་འཛིན་ཕོ་བྲང་། ཕོ་བྲང་དེ་དག་གི་མཐའ་སྐོར་ལྕགས་རི་སེར་པོ་བཅས་གསར་སྐྲུན་གནང་། ༧རྒྱལ་དབང་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོའི་སྐུ་དུས་ནོར་གླིང་དུ་གཞི་ཁྱོན་ཆེ་བའི་བཟོ་སྐྲུན་རྒྱ་སྐྱེད་གནང་སྟེ་སྤྱན་གསལ་ཕོ་བྲང་སོགས་གསར་སྐྲུན་མཛད་པར་མ་ཟད། ལྕགས་རི་ཆེན་མོ་ཡང་ལེགས་པར་བསྐྲུན་པས་ནོར་གླིང་གི་གཞི་ཁྱོན་སྔར་བས་ཆེ་བ་དང་ཕུན་སུམ་ཚོགས་པར་གྱུར། ༧རྒྱལ་དབང་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོའི་སྐུ་དུས་ཐོག་མར་སྔོན་གྱི་རྨང་གཞིའི་ཐོག་ཕོ་བྲང་ཁམས་གསུམ་ཟིལ་གནོན་རྒྱས་སྐྲུན་གནང་བ་དང་། རབ་བྱུང་བཅུ་དྲུག་པའི་ཤིང་རྟ་ཕྱི་ལོ་༡༩༤༥ལོ་ནས་མེ་སྤྲེལ་ཕྱི་ལོ་༡༩༥༦བར་དུ་རྟག་བརྟན་མི་འགྱུར་ཕོ་བྲང་མ་ལག་དང་བཅས་པ་གསར་སྐྲུན་མཛད་པ་དེ་ནི་ཡང་རྩེར་སོན་པའི་བོད་ཀྱི་བཟོ་བཀོད་ཀྱི་ཉིང་བཅུད་གཅིག་ཏུ་བསྡུས་ནས་གྲུབ་པ་ཞིག་ཡོད། ཕོ་བྲང་དེ་དག་གི་ནང་དུ་༧རྒྱལ་དབང་སྐུ་ཕྲེང་རིམ་བྱོན་གྱི་བཞུགས་གནས་དང་། སྐུའི་ཉེར་ཆས། ཆོས་སྲིད་ཀྱི་མཛད་སྒོ་གནང་ཡུལ་སོགས་ཆ་ཚང་པོ་ཡོད་པར་མ་ཟད། ལོ་རྒྱུས་ཀྱི་དུས་སྐབས་སོ་སོར་བསྐྲུན་པའི་ནང་རྟེན་གྱི་རིགས་དང་། ལོ་རྒྱུས་དང་ཆོས་ལུགས་ཀྱི་ནང་དོན་མཚོན་པའི་ལྡེབས་རིས་སོགས་མཇལ་སྤྲོ་ལ་དང་བ་འདྲེན་པ་ཡོ་ད། མདོར་ན་ནོར་གླིང་འདི་ཉིད་ཐོག་མར་༧རྒྱལ་དབང་སྐུ་ཕྲེང་བདུན་པའི་སྐུ་དུས་སུ་གསར་བཞེངས་གནང་འགོ་ཚུགས་པ་ནས་མཐར་སྐུ་ཕྲེང་བཅུ་བཞི་པ་ཆེན་པོས་རྟག་བརྟན་མི་འགྱུར་ཕོ་བྲང་གསར་སྐྲུན་ལེགས་གྲུབ་ཟིན་པའི་བར་དུས་ཡུན་མི་ལོ་ཉིས་བརྒྱ་ཙམ་སོང་རིང་༧རྒྱལ་དབང་སྐུ་ཕྲེང་རིམ་བྱོན་གྱིས་ཉམས་གསོ་དང་རྒྱ་སྐྱེད་བར་མ་ཆད་པར་མཛད་ནས་ད་ལྟའི་གཞི་ཁྱོན་ཆེན་པོ་འདི་གྲུབ་པ་རེད།

ཆོས་ཀྱི་བློ་གྲོས་ལ་གདམས་པ་ཟབ་དོན་རབ་གསལ།
དཀའ་ངལ་གང་ཡང་མེད་པར་གཅན་གཟན་ཤ་ཁྲག་ལ་རོལ་བ་ལྟ་བུའི་འདོད་ཡོན་ངོམས་མེད་ཀྱི་ངང་ནས་ཉིན་རེ་ཞག་རེས་ཚོམ་བུ་ཚོམ་བུར་གྲོལ་བར་འགྱུར་བའི་མྱུར་ལམ་དེ་འདྲ་ཡོད་ཚེ་རང་རེ་ཚང་མ་བྱ་བ་ཐམས་ཅད་གིས་དེ་ལ་འཇུག་པར་འགྱུར་བ་ཡིན་ཏེ། དམ་ཚིག་དང་སྡོམ་པ་ཚུལ་བཞིན་མ་བསྲུངས་པར་འདོད་རྒུར་འཚང་རྒྱ་བའི་ཐབས་ཟབ་ཅིག་མདོ་སྔགས་གང་ནས་ཀྱང་མ་རྙེད་དོ། །

སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས།

བླ་མ་བཤེས་གཉེན་དམ་པ་ཁྱོད། །
བདག་ཅག་རྣམས་ཀྱི་ཕ་ལགས་སོ། །
བླ་མ་བཤེས་གཉེན་དམ་པ་ཁྱོད། །
བདག་ཅག་རྣམས་ཀྱི་མ་ལགས་སོ། །

བླ་མ་བཤེས་གཉེན་དམ་པ་ཁྱོད། །
བདག་ཅག་རྣམས་ཀྱི་མགོན་ལགས་སོ། །
མི་ཤེས་རྨོངས་པའི་བློ་གྲོས་མཁན། །
ལམ་སྟོར་རྣམས་ཀྱི་ས་མཁན་ལགས། །

མུན་ཁུང་འཁྱམས་པའི་སྒྲོན་མ་ལགས། །
གདུང་བ་སེལ་བའི་རིན་པོ་ཆེ། །
ཉི་མའི་ཞལ་ལ་ཕྱག་འཚལ་འདུད། །
ནམ་མཁའི་ཐུགས་ལ་ཕྱག་འཚལ་འདུད། །

ཟླ་བའི་སྐུ་ལ་ཕྱག་འཚལ་འདུད། །
པདྨའི་ཞབས་ལ་ཕྱག་འཚལ་འདུད། །
འདི་ལྟར་དགའ་དང་གུས་པ་ཡིས། །
སྔགས་དང་འདུན་པས་ཕྱག་མཛད་དོ། །ཞེས་གསུངས་སོ། །#佛教#