ཇོ་ནང་དོལ་པོ་ཤེས་རབ་རྒྱལ་མཚན་དཔལ་བཟང་པོའི་སྐྱེ་རབས་ནི། ཇོ་ནང་ཀུན་མཁྱེན་དོལ་པོ་པའི་དངོས་སློབ་ཉ་དབོན་ཀུན་དགའ་དཔལ་ཀྱི་ཞལ་སྔ་ནས། རྒྱལ་བའི་མདུན་ན་རྒྱལ་སྲས་ལི་ཙ་བཱི། །ཀ་ལཱ་པ་རི་རིགས་ལྡན་པདྨ་དཀར། །དཔལ་གྱི་རི་ལ་ཀླུ་སྒྲུབ་ཆེན་པོར་གྲགས། །འགྲོ་མགོན་ཇོ་ནང་པ་ལ་གསོལ་བ་འདེབས། །སྤོས་ངད་ལྡན་ན་ཆོས་འཕགས་སེམས་དཔའ་ཆེ། །ལྷ་ལྡན་གྲོང་དུ་སྲོང་བཙན་སྒམ་པོ་སྟེ། །རྔ་ཡབ་གླིང་ན་པདྨ་འབྱུང་གནས་དཔལ། །ཤེས་རབ་རྒྱལ་མཚན་ཞབས་ལ་ཕྱག་འཚལ་ལོ། །ཞེས་དང་། བཻ་རོའི་རྣམ་ཐར་འདྲ་འབག་ཆེན་མོ་ལས། བདག་གི་སྤྲུལ་བ་ཀུན་མཁྱེན་ཇོ་ནང་ཞེས། ། བོད་ཁམས་འདི་ན་མཁས་ཤིང་གྲུབ་མརྙེས་པའི། ། བསྟན་པའི་སྲོག་འཛིན་མདོ་སྔགས་བདག་པོར་འགྱུར། ། ཞེས་གསུངས་པ་ལྟར་ ࿐ཉག་བླ་གཏེར་ཆེན་༧ལས་རབ་གླིང་པས།

རྩ་གསུམ་ཁྱབ་བདག་པད་འབྱུང་འཕྲིན་ལས་གར། །
 

གང་འདུལ་སྣང་ངོར་བཻ་རོའི་རྣམ་པར་འཕྲུལ། །
 

མཁས་གྲུབ་ཡོངས་ཀྱི་གཙུག་རྒྱན་ཆོས་ཀྱི་རྗེ། །
༧ཤེས༵་རབ༵་རྒྱལ༵་མཚ༵ན་ཞབས་ལ་གསོལ་བ་འདེབས། །ཞེས་གསུངས་སོ།།

࿐མཐོ་གངས་རིས་ཡོངས་བསྐོར་བསིལ་ལྡན་གྱི་ལྗོངས་སུ། །
ཆོས་འཚེ་མེད་རྟེན་འབྱུང་ཉི་ཟླ་ཡི་འོད་སྣང་། །
ཕྱོགས་ཀུན་ནས་འོད་རླབས་ལྷན་ནེར་རུ་འཕྲོ་བའི། །
བོད་ཆོས་ལྡན་ཞིང་ཁམས་བདག་ཅག་གི་ཕ་ས། །

࿐ལོ་རྒྱུས་ནི་ནམ་ཡང་མི་ཡི་ལོ་རྒྱུས་ཏེ། མི་ཡི་རྣམ་པར་དཔྱོད་པའི་བློ་གྲོས་དང་ཞུམ་པ་མེད་པའི་སྙིང་སྟོབས་ཁོ་ནས་ལོ་རྒྱུས་ཀྱི་འཁོར་ཕྱོགས་ལ་ཁ་ལོ་བསྒྱུར་ཅིང་སྒྱུར་བའི་ཆོས་ཉིད་ལ་སུས་ཀྱང་བསྙོན་དུ་ག་ལ་ཡོད། དེང་གི་ཉམ་ཐག་པའི་འུ་ཅག་གི་ངོས་ནས་བལྟས་ན་ཡང་། འདས་པའི་ཆག་འཇིག་གི་རྩ་བ་རང་ཐོག་ནས་སྨིན་པ་ཡིན་ལ། མ་འོངས་པར་རྒྱལ་ཕམ་གྱི་རྩ་བ་ཡང་རང་ཉིད་ལ་རག་ཡོད་པ་རེད། གལ་ཏེ་ཡུལ་གང་ཅན་པའི་སྐྱེ་བོ་རེ་རེས་ཆོས་ཉིད་དེ་རྟོགས་ཤིང་གནས་ལུགས་དེ་མཁྱེན་ནས་རང་འཁྲིའི་ལས་འགན་རེ་རེ་ཕྲག་ཏུ་བླངས་པ་ཡིན་ན། དེ་ལ་ལེགས་བཟང་དགེ་གསུམ་གྱི་འབྲས་བུ་ཉག་གཅིག་སྨིན་པར་སུ་ཞིག་ཚོམ་ཨང་།

—— ངྷརྨ་ཙིནྟས་ཟིན་བྲིས།