威力过于高强者，
此乃送命之前行， 
沙场之上死亡者，
多半皆为强力士。

萨迦格言
ཧ་ཅང་མཐུ་རྩལ་ཆེ་དྲགས་ན།།
ལྕེབ་པའི་སྟ་གོན་བྱེད་པ་ཡིན།།
གཡུལ་དུ་བསད་པ་ཕལ་མོ་ཆེ།།
མཐུ་རྩལ་ཅན་ལ་བྱུང་བ་མང་།།

ས་སྐྱ་ལེགས་བཤད།

གཞན་གྱིས་ཅི་ཟེར་དང་ཅི་བསམ་ལ་མ་ལྟོས་པར་རང་ཉིད་སྔར་བཞིན་ལྷག་བསམ་རྣམ་དག་གིས་འཚོ་ན། དེ་ཡང་རང་གཞན་གཉིས་ཕན་གྱི་འཚོ་སྟངས་ཤིག་ཏུ་སེམས། དུས་ནམ་གྱི་ཚེའང་ལྷག་བསམ་གཙང་མ་ཞིག་ནི་ཆེས་གལ་ཆེ་ཤོས་ཤིག་རེད་འདོད་ཀྱིན་ཡོད།

མི་རྣམས་རེ་བའི་ཀློང་དུ་འཚོ་བ་ནི་ཆེས་མཚར་སྡུག་གི་དུས་སྐབས་ཤིག་ལ་ངོས་བཟུང་ན་ཆོག་གམ་སྙམ།

ང་རང་ད་ལྟའི་དུས་ཚོད་འདིིའི་མཁའ་དབུགས་དང་བརླན་གཤེར།

སྐྱེ་དངོས་ཀྱི་ཚེ་སྲོག་ཕྲ་མོ།

ཉི་འོད་ཀྱི་ཟེར་དྲོད།

བསིལ་རླུང་འཇམ་པོ།

སོས་མདངས་རྒྱས་པའི་རི་ལུང་དང་ཆུ་བོ་སོགས་ན་ཚོད་སྨིན་འགྱུར་གྱི་སྐྱེ་དངོས་ཆོས་ཉིད་ཀྱི་བསྐྱེད་འཕེལ་གོ་རིམ་འདི་ཁོ་ན།

ལོ་རེའི་ནང་དུ་དུས་སྐབས་གཅིག་ལས་མི་འབྱུང་བས། ཚེ་སྲོག་གི་དཔལ་འབར་ཞིང་རེ་བཞག་གི་སྤོབས་པ་དང་ལྡན་པ་ཞིག་མ་ཡིན་ནམ།

ང་ཚོའི་ལུང་སྐད་དུ་མེ་ཏོག་“སྔ་འམ་འཕྱི་”ཡང་ན་“སྔ་ལམ་སྐྱེས་”ཟེར་མོད།

“སྔོན་ལ་སྐྱེས་”ཞེས་པ་སྒྲ་མ་དག་པར་ནོར་བ་རྒྱུན་འབྱམས་སུ་གྱུར་བ་ཡིན་ནམ་སྙམ།

མེ་ཏོག་འདི་སྐྱེ་དངོས་ཕྲ་མོའི་ཚེ་སྲོག་དང་མཉམ་དུ་སྐྱེས་ཤིང་ཧ་ཅང་བཞད་སྔ་བ་ཞིག་ཡིན་པས་སོ། །

ལམ་འགྲམ་དག་ཏུ་སྐྱེ་ཥེའི*་སྡོང་ཕྲན་དག་ལས་འཐུལ་ཡོང་བའི་བསུང་ཞིམ་དག་གིས་མི་སེམས་སུ་ཟད་མེད་ཀྱི་མྱོང་བ་གསར་པ་དང་མཛེས་རྟོག་གི་འཆར་སྒོ་ཡིད་དུ་འོང་པ་རེ་ངང་གིས་སྐྱེ། དེ་བས་དུས་ཚིགས་འདི་ནི་ཐོན་འགྱུར་གྱི་དབྱར་ཟླ་མགོ་མར་ཕེབས་བསུ་བྱེད་པར་རེ་བས་བརྟས་ཤིང་། ཡོད་ཚད་ལ་མཚར་སྡུག་གིས་ཕྱུག་པ་ཞིག་རེད་ཨང་།

ཕ་ཁྱིམ་དུ་འཐེན་པའི་རི་ལམ་ཀྱག་ཀྱོག་འདི་བརྒྱུད་དུས།

དྲན་པའི་སྣུམ་བག་གིས་ཟིན་པའི་བྱིས་དུས་ཀྱི་ལོ་དང་ཟླ་བ། ཞག་དང་རྨི་ལམ་སོགས་ཡིད་ལ་ལྷང་ངེར་འཁོར་བྱུང་། དུས་ཚོད་ཀྱི་བྱབས་ཁྲུས་ལ་ཞུགས་པའི་ཕ་ཡུལ་གྱི་ངོ་གདོང་ནི་སྔར་ལྟར་ཞི་ཞིང་འཇགས་ལ་སྙིང་དུ་སྡུག

འགྱུར་བག་རྒོད་པོའི་རླུང་གིས་འཁུར་གྱིན་པ་ནི་རང་ཉིད་དེ།

འཁྲུལ་སྣང་གི་རྫབ་རྫོབ་ལས་ཡོད་ཚད་དུས་ཚོད་ལ་ཤོར་སོང་བའི་ཕང་སེམས་ལྷག་མ་རེ་ཡང་སྐྱེ་མི་འོང་ངམ།

ཨ་མ་ལགས་ཀྱིས་སྲོས་པའི་གོ་ཁ་འདི་ཁོ་ན་ཚེ་སྲོག་གི་སྨུག་སྨུག་གོ། །

ཡུལ་འདིིའི་སྐྱེ་ཁམས་ཁོར་ཡུག་ནི་དབྱར་དགུན་གྱི་དུས་ཚིགས་མངོན་པར་གསལ་ལ།

མཚོ་འཕགས3100–3200ཡས་ཀྱི་མཚམས་སུ་གནས་ཡོད་པས་བོད་ཟླ་ལྔ་པ་དང་དྲུག་པ་ནི་ལོ་རེའི་ཆེས་རྫོགས་ལྡན་གྱི་དུས་ཚིགས་ཡིན།

མཁའ་དབུགས་གཙང་ཞིང་གྲོང་ཁྱེར་དང་བར་ཐག་གིས་ཆོད་པས།

འུར་ཟིང་དང་འབག་བཙོག་ལས་རིང་དུ་གྱེས་ཤིང་།

གནམ་སྔོན་ཐང་ལ་བརྡལ་ཞིང་གཡུ་ཞུན་བླུགས་འདྲའི་སྣོད་བཅུད་དཔལ་ཡོན་གྱི་རུ་མ་ལྟེམས་མེར་ལྡེམ། སྐྱེ་དངོས་ཁྲི་སྟོང་མང་པོའི་ཚེ་སྲོག་གི་འཚར་བསྐྱེད་དང་འཆམ་མཐུན་གྱི་འཚོ་བའི་ཞིང་ཁམས་སུ་བརྗོད་ན་ཐལ་མི་ཆེའོ། །

____ རེ་ཀི

____ * སྐྱེ་ཥེ་ནི་ང་ཚོའི་ཕ་ཡུལ་དུ་སྐྱེས་པའི་སྐྱེ་དངོས་ཤིག་སྟེ་ལོ་མ་ཕྲ་ལ་མེ་ཏོག་གློ་ཁྲ་དང་སྔོ་ཁྲ་ཡོད་པ་ཞིག