གཞི་རང་བྱུང་གི་རིག་པ་གཏན་ལ་ཕབ།།
ལམ་ཉམས་ལེན་ལ་ཡེ་གྲོལ་ཕྱག་རྒྱས་བཏབ།།
མཐར་འབྲས་བུ་ཡི་སྐུ་གསུམ་རྩོལ་མེད་གྲུབ།།
ཡབ་དྲིན་ཆེན་གྱི་བླ་མ་སྙིང་ནས་དྲན།།

རྗེ་ཀློང་ཆེན་དང་འཇིགས་གླིང་ཡབ་སྲས་ཀྱི།།
ལམ་ཟབ་གསང་གི་མན་ངག་གཏེར་འཛོད་ཀུན།།
འཁོར་སློབ་ཚོགས་ལ་འདོད་རྒུར་འཇོ་བའི་ཉིན།།
དུས་ད་ལྟ་རང་དྲན་ན་ལོ་རྒྱུས་ཙམ།།

གནས་འཁོར་བ་ཡི་གཡང་སར་འགྲིམ་པའི་ཚེ།།
ལས་སྐྱིད་སྡུག་གི་སྣང་བ་གང་ཤར་ཡང་།།
མགོན་ཁྱེད་ཉིད་ལས་རེ་ས་གཞན་མེད་པས།།
ཐུགས་མཁྱེན་བརྩེ་ཡིས་མ་དོར་ཡབ་ཆེན་རྗེ།།
བོད་ཟླ༤-༢ཉིན་གྱི་ཞོགས་པར་རྨ་མདུད་གྲོལ་གྱིས།

༢༠༠༢ལོའི་བོད་ཟླ་༤ཚེས་༢ ཉིན་གྱི་ཐོ་རེངས་སྟག་གི་དུས་སུ་གཟུགས་སྐུའི་བཀོད་པ་ཆོས་དབྱིངས་སུ་བསྡུས།

#. ☁️

གཉིད་དང་འདུ་འཛི་ལྟོ་གོས་གཏམ་ལ་ཆགས།།
ད་དུང་སྣང་བ་མི་མངོན་དབྱིངས་སུ་གཟིམས།།
བསམ་ཞིང་བསམས་ན་སྐྱེ་ཕོ་ང་འདྲ་བའི།།
དོན་ཞིག་འགྲུབ་ན་ལས་འབྲས་ཆོས་ཉིད་བརྒལ།།

རི་བོ་གནམ་ལྕགས་འབར་བ་གསུམ་དང་། རི་བོ་མ་ལ་ཡ་གཉིས།

ཀོང་པོ་ཡུལ་གྱི་རི་བོ་གནམ་ལྕགས་འབར་བ་ནི་ཧི་མ་ལ་ཡའི་རྒྱུད་ཀྱི་ཆེས་ཤར་སྣེའི་རི་བོ་མཐོ་ཤོས་དེ་ཡིན་ལ། རྟ་མཆོག་ཁ་འབབ་བམ་ཡར་ཀླུང་གཙང་པོས་གཡས་བསྐོར་དུ་བསྐོར་ཏེ་ནུབ་ལ་འབབ་ཀྱི་ཡོད། སྦལ་ཏི་ཡུལ་གྱི་རི་བོ་གནམ་ལྕགས་འབར་བ་ནི་ཧི་མ་ལ་ཡའི་རི་རྒྱུད་ཀྱི་ཆེས་ནུབ་སྣེའི་རི་བོ་མཐོ་ཤོས་དེ་ཡིན་ལ་སེང་གེ་ཁ་འབབ་བམ་སིན་དྷུ་གཙང་པོས་གཡོན་བསྐོར་དུ་བསྐོར་ཏེ་ལྷོ་ལ་འབབ་ཀྱི་ཡོད།

སིང་ག་གླིང་གི་རི་བོ་མ་ལ་ཡ་གནམ་ལྕགས་འབར་བ་ནི་རྙིང་རྒྱུད་ལྟར་ན་གསང་སྔགས་བསྟན་པའི་འབྱུང་གནས་ཀྱི་རི་བོ་མ་ལ་ཡ་ཡིན། རྒྱ་གར་ལྷོ་ཕྱོགས་ཀྱི་རི་བོ་མ་ལ་ཡ་ནི་རིན་པོ་ཆེའི་ལྗོན་ཤིང་ཙན་དན་ཚལ་གྱི་རི་བོ་གྲགས་ཆེན་དེ་ཡིན་ནོ།།