རང་བྱུང་ངག་གི་རོལ་མོ་མི་འཁྲོལ་ཞིང་། ། སྡེབ

首页发布

རང་བྱུང་ངག་གི་རོལ་མོ་མི་འཁྲོལ་ཞིང་། །
སྡེབ་ལེགས་ཚིག་གི་ལང་ཚོ་མི་རྫོགས་ཀྱང་། །
གུ་ཡངས་སོས་དལ་ནང་གི་ཉམས་གླུ་དག །
ཡང་ཡང་ལེན་པའི་སྣང་བ་འགོག་ཏུ་མེད། །

བྱམས་དང་སྙིང་རྗེ་བྱང་ཆུབ་སེམས་མཆོག་གིས། །
ཐུགས་རྒྱུད་ཡོངས་གཏམས་ཉམས་ལེན་སྙིང་པོ་ཡི། །
གདམས་པས་འགྲོ་རྣམས་འཁོར་བའི་གཡང་ས་ལས། །
སྐྱོབ་ལ་མཚུངས་བྲལ་རྟོགས་ལྡན་བླ་མ་མཁྱེན། །

བདག་ཅག་སྙིགས་འགྲོ་ཆོས་ལ་བློ་མིག་ཕྲ། །
ཕྱིན་ཅི་ལོག་ལ་རྣམ་དཔྱོད་བློ་གྲོས་འབར། །
སྡིག་སྤྱོད་ཀུན་ལ་ཞུམ་མེད་སྒྲུབ་ཕོད་ཅིང་། །
རང་རྒྱུད་མི་བརྟག་ཇི་མི་སྙམ་ལ་གཟིགས། །

ཁ་མིན་དོན་གྱི་ངེས་འབྱུང་སྙིང་ལ་སྐྱེས། །
བཟོད་དུ་མེད་པའི་སྙིང་རྗེས་གཞིར་བྱས་པའི། །
བྱང་ཆུབ་སེམས་ལས་ནམ་ཡང་མི་གཡེལ་བར། །
ཉམས་ལེན་རྣལ་མ་ནུས་པར་བྱིན་གྱིས་རློབས། །

ལས་ཉོན་མཚོན་ཆ་རྩུབ་མོས་གཟིར་བ་ཡི། །
རྣམ་སྨིན་སྒྱུ་མའི་ལུས་ཀྱིས་བཟོད་དཀའ་ཕྱིར། །
བྱིན་བརྒྱུད་དགོངས་པའི་རྩལ་ཆེན་རྫོགས་པ་ཡི། །
ནང་གི་བདེ་ཆེན་མྱུར་དུ་སྦར་བར་མཛོད། །

རི་མོ་པ། རྟ་ནག་བང་ཆེན། རི་མོ་པ་རྡོ་རྗེ་ཚེ་རིང་ངམ་རྟ་ནག་བང་ཆེན་ནི་སྤྱི་ལོ་༡༩༩༥ལོའི་ཟླ་༠༣་ཚེས་༠༨ལ་མཚོ་ལྷོ་ཁུལ་གསེར་ཆེན་རྫོང་རྟ་ནག་མ་ཡུལ་ཚོར་སྐྱེས། རང་ལོ་བརྒྱད་ཀྱི་སྟེང་རྟ་ནག་མ་བཅའ་སྡོད་སློབ་གྲྭར་ཞུགས། རང་ལོ་བཅུ་བཞི་ལ་སོན་པའི་སྐབས་སློབ་འབྲིང་ལ་མ་ཞུགས་པར་རི་མོ་འབྲི་བའི་ཕུགས་བསམ་ཁྱེར་ཏེ་རེབ་གོང་གསེར་མོ་ལྗོངས་ནས་བོད་ལུགས་སྲོལ་རྒྱུན་ཐང་གའི་རི་མོ་རྐྱང་རྐྱང་གི་ལམ་ཁར་བགྲངས་བྱ་བདུན་ཙམ་ལ་སྙེག རང་ལོ་ཉི་ཤུའི་སྟེང་རྒྱལ་ཁུངས་ཁཱ་ནཱ་ཏཱ་ནས་ཡིན་པའི་ཁྱིམ་རྒྱུད་ཀྱི་རི་མོ་བ་སྐད་གྲགས་ཅན་kristel ouwehandབོད་མིང་ལ་བསྟན་འཛིན་སྒྲོལ་མ་ཞུ་བ་དེའི་མདུན་སར་མི་ལོ་ལྔ་ཙམ་ལ་ནུབ་ལུགས་རི་མོར་སྦྱོང་བ་བྱས།