སྡུག་བསྔལ་འདམ་དུ་བྱིང་པ་མཐའ་མེད་ཀྱི་སེམས་ཅན། །
གཏན་བདེ་སྤང་ལ་འདོན་ཆེད་སུམ་རྩེན་གྱི་ཁྲི་ལས། །
ཁྱེད་སྐུ་གསེར་གྱི་ཉིན་བྱེད་མི་མཇེད་དུ་ཕེབས་པའི། །
དུས་ཀྱི་དགེ་མཚན་ཉམ་ཆུང་ཚེ་སྲོག་གི་གསོས་སྨན། །

མི་གཞན་གྱི་ཐོག་ཏུ་མི་འདོད་པའི་ན་ཚ་དང་རྐྱེན་ངན་རེ་བྱུང་བ་མཐོང་ཚེ། དཀོན་མཆོག་མཁྱེན་ལས་རྒྱུ་འབྲས་ཟེར་བ་དངོས་གནས་མི་བསླུ་བ་ཞིག་སྟེ། དེས་སྔོན་ཆད་མི་ལས་དགུ་ལས་འདི་དང་གན་འདྲ་མང་བོ་བྱས་མྱོང་བ་རེད། ད་དེ་འདྲ་སྨིན་རྒྱུ་ལོས་ཡོད་ཟེར་ནས་ལས་འབྲས་ལ་ཡིད་ཆེས་ཡོད་མདོག་ཁ་བོ་བསྟན་མོད། རང་གི་སྟེང་དུ་མི་འདོད་པའི་རྐྱེན་ངན་རེ་ལྷུང་དུས་སྔོན་ལྟར་ལས་འབྲས་ལ་འདང་མི་ཕོག་ཅིང་། གཞན་གྱིས་རང་ལ་མཐུ་གཏད་པའམ་དམོད་བོར་བ་རེད་སྙམ་ནས་མི་དྲན་དགུ་དྲན་བྱེད་པ་ནི་དོན་དུ་ལས་འབྲས་ལ་ཡིད་མི་ཆེས་ཤིང་རང་མཐོང་གི་ང་རྒྱལ་ཆེ་བའི་རྟགས་ཁོ་ནའོ།།

སྔར་བྱས་ཀྱི་སྡིག་ལྟུང་ལ་འགྱོད་སེམས་དྲག་པོས་བཤགས་པ་དང་། ཕྱིན་ཆད་སྲོག་ལ་བབས་ཀྱང་དེ་འདྲ་གཏན་ནས་མི་བྱེད་སྙམ་པའི་སྡོམ་སེམས་ནི་དུས་རྟག་པར་ཡིད་ལ་དྲན་དགོས་པའོ།།

ཞོགས་པ་བདེ་ལེགས།

~~ དགའ་མིང་བས།

ཟེའུ་འབྲུར་ལྷ་ཆབ་འཐོར་བས་འདར་ཤིག་ཤིག །
དྲི་མེད་ཆུ་སྐྱེས་གཞོན་ནུར་གཡུ་སྦྲང་འཁོར། །
ལྷད་མེད་འདང་བརྩེ་ཡོན་གྱིས་ཀུན་དགའ་སྟེར། །
སྨུག་ཞག་གཡས་འཁྱིལ་འོ་མཚོ་བཞིན་དུ་དཀར། །