སེར་བྱེས་དགེ་བཤེས་ལྷ་རམས་པ་ངག་གི་དབང་ཕྱུག་རིན་ཆེན་དངོས་གྲུབ།

རིན་ཐང་ཅན་གྱི་དེབ་ཀློག་པའི་མྱོང་ཚོར།
སེར་ཤུལ་དགེ་བཤེས་ངག་དབང་མཁས་གྲུབ་མཆོག་ནས་གཞུང་ཆེན་དབུ་ཕར་ཚད་གསུམ་གྱི་དཀའ་གནད་ལས་བརྩམས་ཏེ་རྣམ་དཔྱོད་ཀྱི་རལ་གྲི་རྣོ་ངར་ལྡན་པ་ཞིག་འཕྱར་གནང་འདུག །
དེ་ཡང་རྩོམ་ཡིག་འདི་མཇལ་བས་ཡིད་དབང་འཕྲོག་ནས་དེང་གི་རྩོམ་སྒྲིག་མང་པོ་གཟུགས་བརྙན་གྱི་གནས་ལ་གཡུགས་བཞག་པར་མཐོང་། གང་ཡིན་ཟེར་ན། རྩོམ་ཡིག་གསར་པ་ཡིན་ན་གཞན་དང་མ་འདྲ་བའི་ལེགས་བཤད་དམིགས་བསལ་མེད་ན་ཀློག་པ་པོའི་དུས་ཚོད་འཕྲོ་བརླག་ཏུ་གཏོང་བྱེད་རེད་ལ། དེར་གཞན་རྩོམ་རྣམས་ནས་པར་བཤུས་ཙམ་ལས་དཀའ་གནད་དང་གོ་བ་འདི་དམིགས་བསལ་འདུག་བསམ་པ་གང་ཡང་མེད་པར་དེབ་ཕྲེང་གཅིག་གཅིག་དང་གསུང་འབུམ་གཉིས་གཉིས་ཟེར་བ་ནི་དེང་སང་རྫ་རྡོ་ལས་མང་ཟེར་ནའང་འགྲིགས་ས་རེད།
གཞན་ཡང་ཕྱོགས་བསྒྲིགས་བཟོས་པ་ཙམ་ལ་རང་གི་རྩོམ་ཡིག་ཟེར་མཁན་མང་ཡང་རིགས་ལམ་གྱིས་ནང་འགལ་སྤོང་མི་ཤེས་པར་ཤ་ཟིན་སྤུ་ཟིན་གྱིས་འགལ་འདུ་བྱ་རྒོད་ཀྱི་ཚོང་ལྟར་སྤུངས་པའང་མང་། དེབ་འདིའི་ནང་གི་དཀའ་གནད་ཧ་ཅང་མང་པོ་གསལ་བཤད་བཟོ་ན་བདག་པོ་གཞན་གྱི་ལེགས་བཤད་ལ་ཧམ་པས་ལག་བཅངས་སུ་དོགས་པས། གལ་ཏེ་ཤེས་འདོད་དང་དྲང་སེམས་ཡོད་པ་དང་། ཁྱད་པར་དུ་ཚིག་གི་སྤམ་བཤད་ཙམ་གྱིས་ཡིད་མི་ཚིམ་པར་གཞུང་ཆེན་པོ་ལ་ལུང་རིགས་ཉམས་ལེན་གསུམ་གྱིས་འཇུག་མཁན་ཚོས་ངེས་པར་དུ་བལྟ་རིགས་པར་སེམས་སོ། །
དེས་ན་རྣམ་དཔྱོད་ཀྱི་རིག་པ་གློག་ལྟར་མྱུར་ཞིང་རིགས་ལམ་གྱི་རྣོ་ངར་མཚོན་ཆ་ལྟར་འཕྱར་མཁན་ཁོང་ལྟ་བུའི་རྩོམ་ཡིག་དུམ་ཚན་རེ་ཀློག་ནའང་ཡིད་ལ་དགའ་བདེ་རེ་མ་འབར་ན་རང་ཉིད་བླུན་པོའི་གོ་ས་ལ་སླེབས་ངེས་ཡིན་ཞེས་བརྗོད་རྒྱུ་ཡིན་ལ། ཁོང་ནི་དྲ་ཚོམས་ཁག་ཏུ་གནའ་དེང་གི་ཆོས་ཚན་གང་ཐད་ནས་གཞན་དང་མི་འདྲ་བའི་གཞོན་སྐྱེས་འགྲན་ཟླ་བྲལ་བ་ཞིག་ཡིན་པའང་ཚོར་བྱུང་ངོ་། །
རྩོམ་པ་པོ་ནས་གླེང་བརྗོད་ཅིག་འབྲི་ན་འགྲིག་གམ་གསུངས་པས་ན། རྣམ་དཔྱོད་ཅན་ཚོ་ལ་ནམ་ཡང་དགའ་མོས་ལྡན་པ་ངག་གི་དབང་ཕྱུག་ནས་ཡི་རང་ངང་བོད་རབ་གནས་ཆུ་ཡོས་བོད་ཟླ་དྲུག་པའི་ཡར་ཚེས་བཅུ་གཅིག་ས་གཉིས་འཕྲད་པའི་དགེ་བ་སྤྱི་ལོ་༢༠༢༣-༧-༢༩་ལ་བྲིས་སོ།

ནམ་མཁའི་བརྟུལ་ཞུགས་བླངས་པའི་བྱང་ཁོག་ནང་། །
​ཡོན་ཏན་སྤྲིན་གྱི་དུམ་བུ་འཐོར་བའི་རླུང་། །
​ཆེར་སྙེམས་དབུགས་རྒོད་རྩེག་ལ་མ་གོམས་པས། །
​ཐར་བའི་ཚེ་སྲོག་ཆད་དོན་ག་ལ་ཡོད། །

ཚིག་གཅིག་ཁོ་ནས་བློ་གྲོས་ནང་ཁྲོལ་ཀུན། །
གསལ་བྱེད་ངག་གི་མེ་ལོང་འཛིན་པའི་ཁས། །
ཆོས་ལ་རུ་ཤན་འབྱེད་པའི་སྤོབས་པ་ཡང་། །
ལྷ་དང་བདུད་ཀྱིས་གསར་དུ་སྟེར་མཁན་མེད། །

བོད་མཁས་པ་མི་ཕམ་དགེ་ལེགས་རྣམ་རྒྱལ་གྱི་སྙན་ངག་འདི་རིགས་བཀླགས་ཤིང་བཀླགས་ཤིང་དོན་གྱི་གོ་བ་དང་ཚིག་གི་རོ་ཁྱད་གང་ཆ་ནས་སྙིང་ལ་ཟད་དུ་མེད་པའི་བདེ་དགའ་དཔག་ཏུ་མེད་པ་ཞིག་སྦྱིན་འོང་།
​
​

ལོ་ཟླ་དང་མཉམ་དུ་ཞེ་འདྲིས་བྲིས་པ།

གའུ།

དགུན་གྱི་ཁ་བས་ས་གཞི་གཡོགས་ཏེ་སྡོང་བོ་དག་ཀྱང་སྒུར་ཏུ་བཅུག།
ཟླ་བ་དཀར་པོས་སྤྲིན་གྱི་གསེབ་ནས་ཞལ་རས་གསལ་ལ་མི་གསལ་སྟོན།།
བྱ་དང་བྱེའུ་ལྷང་འཇགས་གྱུར་ཀྱང་སྐར་མ་དེ་ཚོ་འོད་ཆེམ་ཆེམ།།
མཚན་མོའི་འཇིག་རྟེན་ཆུང་ཆུང་དེ་ཡང་འུ་གཉིས་འཕྲད་པའི་གནས་སྐབས་ཡིན།།

འུ་གཉིས་འཕྲད་པ་སྔོན་བསགས་རེད་ཅེས་མི་འགྱུར་མནའ་ཡང་སྐྱེལ་དགོས་ཞེས།།
དམ་བཅའ་མི་ལྡན་སུ་ཡིན་རུང་སྟེ་དེ་ལ་ཁྲེལ་མེད་འབོད་རྒྱུ་བྱས།།
མ་ཚད་མ་འོངས་རྨི་ལམ་ནང་དུ་གཞིས་ཁྱིམ་གཅིག་ཏུ་འཛོམས་རྒྱུ་བྱས།།
འུ་གཉིས་བཤད་པ་དེ་འདྲ་ཨེ་རེད་ངས་ནི་ད་དུང་བརྗེད་ཀྱིན་མེད།།

དེ་དུས་འུ་གཉིས་སློབ་མ་ཡིན་པས་གདོང་ཐུག་བྱུང་རྒྱུ་ཁག་ཙམ་གདའ།།
ཡུལ་ལ་ལོགས་སའི་ལམ་རྒྱུད་དེ་ཡི་བསིལ་གྲིབ་འཁོར་བའི་སྡོང་རྩ་རུ།།
སྔོན་ལ་འུ་གཉིས་སུ་ཞིག་ཐོན་ཀྱང་དེ་ནས་སྒུག་ཏེ་འདུག་རྒྱུ་བྱས།།
འུ་གཉིས་འཕྲད་པའི་ཁ་ཆད་བཏབ་ཏེ་ས་རྩ་རུབ་པ་ཨེ་དྲན་གི།།

སྙི་མོ་སེམས་ལ་རྨ་ཁ་མ་བཟོ་ཁོ་མོའི་སེམས་འདི་གཉོམ་ཆུང་ཡིན།།
འཇམ་པོ་ལག་པས་ལག་པར་འཁྱུད་ན་ཁྱོད་ཀྱི་ནམ་ཡང་མ་བཏང་རོགས།།
ཁ་བཤད་ཚིག་གི་ཟོར་ནས་འཚོལ་བའི་ཁྱོད་ཀྱི་སེམས་པ་དམར་རྗེན་མ།།
ཟླ་ཆུང་འཚེར་བའི་ཁྱོན་ན་གསལ་བའི་ཁྱོད་ཀྱི་དུངས་འབོད་ཁུ་ཡུག་མ།།

སྙིང་གཏམ་ཁྲུས་ཀྱི་རྫིང་བུས་བཀང་པའི་ཁ་རྒྱན་རྨ་བྱའི་བུམ་པ་ལ།།
རང་སེམས་བལ་གྱིས་ཕྱིལ་ཕྱིལ་བཏང་སྟེ་སྙིང་སྡུག་སྲོག་གི་གདུ་བུ་ལ།།
ཕུལ་བའི་ལོ་དེར་དུས་བཞིའི་ཚ་གྲངས་ཅི་ཡིན་འདི་ཡིན་མ་གོ་ཐལ།།
སྡེ་ཆེན་མྱི་ཁའི་རླུང་ནག་དེ་ཡང་ཅི་ལྟར་གཡུགས་པ་མ་ཤེས་ཐལ།།