གཞུང་ལུགས་ཀུན་པོ་ཐབས་ཆག་ཅིག་བམ་རྫོགས་བྱས་ཏེ་ལག་ཁྱེར་རྫབ་རྫོབ་རེ་དང་ཐོབ་ཐང་ཙམ་པོ་རེའི་བྲན་དུ་སོང་བའི་མི་བུ་ཆོ་ལོ་ཅན་ཡུལ་གང་དུ་མོད་ཀྱང་། ནང་ཚན་བྱེ་བྲག་དམིགས་སུ་བཀར་ནས་རིགས་གཅིག་རྐང་འཛིན་དང་ཆེད་སྦྱོང་ཞིབ་འཇུག་པའི་གདན་ཐོབ་དམིགས་བསལ་བ་རེ་རག་མེད་ཚེ་དེ་ནི་ཤེས་རློམ་པའི་རྐུབ་སྟེགས་ཙམ་དུ་ཟད་དོ།། ཡར་འཕེལ། ☕️

འཇིག་རྟེན་པ་རྣམས་གཟའ་ཡིས་ཟིན་ཞེས་ཟེར།།
སྐར་རྩིས་པ་དག་སྒྲན་ཅན་སྒྲུབ་ཅེས་བཤད། །
ཚན་རིག་པ་རྣམས་གྲིབ་ནག་ཕོག་ཅེས་སྨྲ། །
དོན་དུ་གཟའ་སྐར་འགྲོས་ཀྱི་ཆོས་ཉིད་དོ། །
སྤྱི་ཟླ་4ཚེས་8ཀྱི་ཉིན་འཛིན་ནི་ལོ་བརྒྱའི་མཐོང་དཀོན་པའི་ཉི་འཛིན་རེད་ཟེར།

         

 རང་བཞིན།
                 
                                ཡོན་བཟང་།
                                 

         དད་སོགས་དཀོར་ཟས་རྣམས་ལ་བག་མེད་དུ་སྤྱོད་ཀྱིན།།
        ཅི་ཡང་མི་ཤེས་གང་ཡང་མི་ནུས་པའི་རང་ཉིད།།
        ལས་འབྲས་བསླུ་མེད་ཡིན་པ་ཡིད་རྟོན་ཞིག་མེད་ལ།།
        ཕྱི་མར་མཁོ་བའི་ཆོས་ཤིག་དེ་ལས་ཀྱང་མི་འདུག།
        
        རྟག་འཛིན་རྨོངས་བློ་སྟུག་པོའི་ཟོལ་བཅོས་ཀྱིས་བསླུས་ཤིང་།།u
        དམན་པ་ཉམ་ཐག་མཐོང་ན་སྙིང་རྗེ་ནི་མི་འདུག།
        བ་གླང་རྒན་པོ་ཞིག་གི་ངང་ཚུལ་དང་ཟླ་བཞིན།།
        སྐྱོ་སྡུག་རུམ་དུ་བཅུག་ནས་ཆཊ་སྲེད་ཀྱིས་མྱོས་སོང་།།

        མཐུན་ཕྱོགས་གཉེན་དང་གཞན་ཕྱོགས་དགྲ་ལྟར་བརྩིས་ནས།།
        དོན་མེད་བྱ་སྤྱོད་མཐའ་དག་དང་དུ་རང་བླངས་ཤིང་།།
        དོན་ལྡན་མི་ཚེའི་ལམ་བུ་རྣམ་གཡེང་གིས་བསྐྱལ་ནས།།
        བགྲེས་རྒན་བདག་གི་ཚེ་སྟོད་རྨི་ལམ་བཞིན་ཡལ་སོང་།།

        ཕ་ལོའི་རེ་འདུན་དྭངས་གཙང་དྲག་རླུང་ལ་བསྐུར་ནས།།
        མ་ལོའི་བརྩེ་སེམས་དཀར་པོ་རྒྱང་རིང་དུ་བོར་ཞིང་།།
        ཐམས་ཅད་རྒྱབ་ཏུ་ཕྱོཊ་པའི་ཐོས་མེད་ཀྱི་སྨྱོན་པ།།
        མ་ངེས་རི་ལུང་ཉུལ་བའི་ཕུགས་མེད་ཀྱི་རི་དྭགས།།

        བསམ་ན་ཆོས་ཀྱི་དྲེད་པོ་རང་འདྲ་ལས་གཞན་མེད།།
        གཞལ་ན་ཡོན་ཏན་གྱི་ལྕི་ཚད་སྲང་གང་མེད་ལ།།
        བལྟས་ན་ཡིན་མདོག་ཉམས་ཀྱིས་ཕྱི་སོར་མཛེས་པ།།
        མྱོང་ན་ཡང་སྙིང་མེད་པའི་སྒྲོ་སྟོང་གི་དཔེ་རེད།།
   
   
        ཉེས་ཅན་ཁེར་རྐྱང་གི་སེམས་པ་དགུན་ཁའི་འཇག་སྐྱ།།
        དགྲ་གཉེན་མ་ངེས་ལས་རླུང་གིས་མགྲོན་ལ་བོས་ཚེ།།
        སྒེག་ལྡན་དུས་ཀྱི་རོལ་དབྱངས་ལ་ཆག་སྐྱོན་ཤོར་ནས།།
        སྐྱོ་བ་ཞེ་ལ་འདྲེས་པའི་མཚན་གཞུང་ཞིག་འཆར་ཡོང་།།
        

        མི་རྟག་དཔྱིད་དཔལ་རྒྱལ་མོའི་རང་མདངས་ཤིག་མངོན་ཏེ།།
        དབང་མེད་ལུས་ཀྱི་སྡོང་ལོ་གཡང་ས་རུ་བསྙིལ་ཞིང་།།
        ཆ་མེད་ཡུལ་གཞན་འགྲིམས་པའི་སྐྱོ་ཉམས་ལ་བསམ་ན།།
        རེ་བཅོལ་སེམས་ཀྱི་ཁེན་ས་གང་ཡོད་ཅིག་མི་ཤེས།།
        
        
        གཡོ་འཕྲུལ་སྣང་བ་ཁྲ་མོ་རི་མགུལ་དུ་ཡན་དུས།།
        ཟོལ་བཅོས་སྨུག་པ་རྫོབ་པོ་ཕྱོཊ་མེད་དུ་འཕྱུར་འདུག།
        ཞེ་སེམས་གང་ལ་འཁྲེང་ཡང་སྡུག་བསྔལ་རང་མོད་ན།།
        བཤེས་བྲལ་གཞོན་ནུའི་ལུས་ཀྱི་དུར་ས་དེ་བདེ་འམ།།

        ཞེན་ཆཊ་སྲིད་པ་རྒན་པོས་འཇབ་རྒོལ་ཞིག་བྱས་རྗེས།།
        དུག་ལྔའི་མེ་ལྕེ་མཆེད་ས་འཇིགས་རུང་གི་ལུང་མདོར།།
        བན་ལོག་གཡུལ་ལ་ཆས་པ་བདེན་གཏམ་ཞིག་ཡིན་ན།།
        དགྲ་ལན་མ་ཐུབ་རང་ཉིད་དུག་ཆུ་ཡིས་མྱོས་ཟེར།།

2020ལོར།