རི་ལ་རི་ཡི་མཐོ་ཚད་དང་ཆུ་ལ་ཆུ་ཡི་ཟབ་ཚད་ཡོད་པ་བཞིན་ཕན་ཚུན་ལ་བསྡུར་དགོས་དོན་ཅི་ཡང་མེད་དེ་སོ་སོ་ལ་སོ་སོའི་ཡོན་ཏན་ཡོད་པས་སོ། །རླུང་ལ་རླུང་གི་རང་དབང་དང་སྤྲིན་ལ་སྤྲིན་གྱི་འཁོར་ཕྱོགས་ཡོད་པ་བཞིན་ཕན་ཚུན་ལ་ལད་ཟློས་དགོས་དོན་ཅི་ཡང་མེད་དེ་སོ་སོ་ལ་སོ་སོའི་རང་གཤིས་ཡོད་པས་སོ། །

སྤྱིར་མདོ་སྔགས་རིག་གནས་ཀུན་པོ་ཐབས་ཆག་ཅིག་བམ་རྫོགས་བྱས་ཏེ་ལག་ཁྱེར་རྫབ་རྫོབ་རེ་དང་ཐོབ་ཐང་ཙམ་པོ་རེའི་ཆོ་ལོ་ཅན་ཡུལ་གང་དུ་མོད་ཀྱང་། ནང་ཚན་བྱེ་བྲག་དམིགས་སུ་བཀར་ནས་རིགས་གཅིག་རྐང་འཛིན་དང་ཆེད་ལས་ཞིབ་འཇུག་པའི་གདན་ཐོབ་དམིགས་བསལ་བ་རེ་ཐོབ་མེད་ཚེ་ཤེས་རློམ་ཙམ་དུ་ཟད་དོ།། མི་སྣ་དེའི་རིགས་ཞེ་དྲག་སྤྱི་ཚོགས་ལ་མཁོ་གལ་མི་ཆེ། དེ་ཕྱིར་ཞིབ་འཇུག་པའི་མ་རྩ་ཡོད་པའི་མི་སྣ་འདིའི་རིགས་གཏོགས་ཀྱི་ཆེད་ལས་ལ་རྨད་བྱུང་གི་ཆེ་བ་མངའ་བས་མངོན་པར་བསྟོད། ཡར་འཕེལ།

ཞིབ་དཔྱོད་ཀྱི་སེམས་ཁམས་དང་གསེད་འགྲོལ་གྱི་རྣམ་དཔྱོད་མེད་པའི་ང་ཚོའི་སློབ་གསོ་སྒྲུབ་ཐབས་དང་སློབ་གཉེར་བྱེད་སྟངས་འདིས་མི་ཉིད་ལྐུག་པ༼གླེན་པ༽ཨུ་ཚུགས་ཅན་དང་ཞེན་ཆགས་ཅན། བྲན་གཤིས་ཅན། ཧོལ་རྒྱུགས་ཅན་ཞིག་ཏུ་གཏོང་པ་ལས་སྒེར་ཚུགས་ཀྱི་བསམ་བློ་ཅན་དང་རང་ཚུགས་ཐུབ་པའི་མི་ཞིག་ཏུ་གཏོང་མི་ཐུབ།
ལྟ་རྒྱ་འཛམ་གླིང་ལ་ཕྱོགས་ཏེ་སེམས་རྒྱ་ནམ་མཁའ་ལས་ཡངས་པར་བྱ།
ཐོས་རྒྱ་འཛམ་གླིང་ལ་ཕྱོགས་ཏེ་བློ་རྒྱ་ས་གཞི་ལས་ཡངས་པར་བྱ།