སྣ་ཚོགས་གདུང་བའི་ཚང་ཚིང་རབ་དཀྲིགས་ཤིང་།།
ཡིད་ལ་རྣོ་བའི་གཅན་གཟན་སྒྲ་འབྱིན་པ།།
འཇིགས་རུང་འཁོར་བའི་ཚལ་ཞེས་དྲང་སྲོང་ངག།
ཐོས་འཛིན་རྒྱན་དུ་སེ་རལ་ཁ་ཡིས་འཆིང་།།

འོན་ཀྱང་ངེས་པར་འབྱུང་བ་བདུད་རྩིའི་རྫིང་།།
ཚུར་མཐོང་བློ་ཡི་རལ་པས་མ་ཆིངས་ཏེ།།
ཕྱིར་ཞིང་འཁོར་བ་ནགས་ཀྱི་ཀླུང་བརྒལ་ཏེ།།
ཅ་ཅོའི་གླུ་སྒྲ་སྲིད་པའི་ཕ་མཐར་སྦྲན།།

འཕྲོད་པ་བསྟེན་ཅིང་གནོད་པ་དོར། །བྱ་བའི་གོལ་འཆུག་མ་ནོར་བ། །
བདེ་ཐང་ཉིད་ཀྱི་རྒྱུ་ལགས་ཅེས། །དེང་རབ་བསླབ་བྱ་ལས་གསུང་པ། །
ཀུན་གྱིས་གཟིགས་ཤིག་གཟིགས་ཤིག་ཀྱེ། །

འཛམ་གླིང་འཕྲོད་བསྟེན་ཉིན་མོ་བསུ།༢༠༢༤-༤-༧
世界卫生日
2024.4.7
དེང་རབས་བསླབ་བྱ་ལས།
ཟས་གོས་སྨན་སོགས་འཕྲོད་པར་བསྟེན། །
མི་འཕྲོད་ཡོངས་སུ་སྤང་བར་བྱ། །
ནད་མེད་ལུས་འདི་མེད་གྱུར་ན། །
ཆོས་དང་འཇིག་རྟེན་གཉིས་ཀ་འཆོར།།
—མཁན་ཆེན་ཚུལ་ཁྲིམས་བློ་གྲོས་མཆོག་གིས།

ལན་ཅིག་ཐོབ་པའི་དལ་རྟེན་པདྨའི་ལྗོན།།
འདུ་འཁྲུགས་གྲང་རེག་རྩུབ་མོའི་ཁ་རླངས་ཀྱིས།།
རེག་པའི་ཉེན་ལས་རྣམ་པར་སྐྱོབ་པའི་ཕྱིར།།
འཕྲོད་བཞེས་ལྷ་ཡི་བདུད་རྩི་ཅིས་མི་བསྟེན།།  
——རྨེ་སྤྲུལ་བསྟན་འཛིན་རྒྱ་མཚོས།

ཆོས་སྲིད་ཉི་ཟླའི་དར་རྒུད་མི་ལ་ལྟོས།།
བདེ་སྐྱིད་འཚོ་བའི་དཔལ་ཡོན་མི་ཡིས་བསྐྲུན།།
མི་ཡི་ཤེས་བརྩོན་བདེ་ཐང་ལུས་ལ་བརྟེན།།
ཚེ་སྲོག་གསོན་ཤུགས་རྒྱས་ཕྱིར་འཕྲོད་བསྟེན་མཛོད།། 
——མཁན་མོ་རིག་འཛིན་ཆོས་སྒྲོན་གྱིས།།

འཕྲོད་བཞེས་དཔྱིད་ཀྱི་རྒྱལ་མོས་རིང་ནས་འགུག་པའི།།
བདེ་ཐང་ཆུ་སྐྱེས་བཞད་པའི་དབྱར་གྱི་དཔལ་ཡོན།།
མུ་མེད་ཚེ་སྲོག་བརྡལ་བའི་འཇིག་རྟེན་ཡངས་པོར།།
འདུ་འཁྲུགས་སད་ཀྱིས་མ་རེག་ཡུན་དུ་གནས་ཤོག།
    ༢༠༢༤/༤/༧མཁན་མོ་རིག་འཛིན་ཆོས་སྒྲོན་ནས། 

[音乐][蜡烛][咖啡][鲜花]