སྐྱོ་སྐྱོ་དྲན་པའི་གཏམ་རྒྱུད་མངར་མོ།།
སྙི་མོ་དམར་ཆུང་སེམས་པའི་དཀྱིལ་ལ།།
བརྩེ་བའི་མྱུ་གུ་བསྐྱེད་པའི་གཞི་མ།།
ན་ཟུག་འཁྱིལ་བའི་ཐོ་བ་ཁྱེད་ཡིན།།

ཟླ་འོད་འོག་གི་རླུང་བུ་འཇམ་པོ།།
རྨི་ལམ་དཀྲོག་པའི་བདེན་འཛིན་རི་མོ།།
འཇགས་པ་མེད་དྲན་གདུང་རིང་མོ།།
འགྲེལ་བཤད་དཀའ་བ་ལྷ་མོ་ཁྱེད་ཡིན།།

སྐྱ་རེངས་བསུ་བའི་རྟ་བདུན་དབང་པོ།།
ཞོགས་སྤྲིན་གྱོན་པའི་ནགས་ཚལ་སྟུག་པོ །
མྱ་ངན་འཁྱིལ་བའི་དཔྱིད་མགོ་འདི་ལ།།
བདག་སེམས་སྐྱ་མོའི་སྐྱོ་རོགས་ཁྱེད་ཡིན།།

ལྷོད་ཀྱི་བཞུར་བའི་རྭ་ཆུ་སྔོན་མོ།།
དྲན་པ་མང་བའི་བདག་སེམས་ཁྲ་ཁྲ།།
གཏམ་འཆལ་རྒོད་པོ་རླུང་ལ་བསྐུར་ནས།།
བཤུལ་རིང་ལམ་གྱི་སྐོམ་ཆུ་ཁྱེད་ཡིན།།

བརྩེ་བའི་རི་མོ་ཚགས་ཀྱི་རྒུམ་ཏེ།།
སྨྲེང་བའི་གཏམ་རྒྱུད་ཁོག་དུ་སྦས་ནས།།
དྲན་པ་འབུས་པའི་ལོ་ཟླ་རིང་མོ།།
མི་ཚེ་སྐྱིད་སྡུག་རི་མོ་ཁྱེད་ཡིན།།

༢༠༢༤-༣-༢ཉིན་ཐང་གཤོག་ཐོགས་གིས

གཟུགས་དང་སྒྲ་དང་དྲི་དང་རོ། །རེག་དང་ཆོས་རྣམས་འབའ་ཞིག་ལ། །ལྷ་མིར་བཅས་པའི་འཇིག་རྟེན་རྣམས། །འདོད་དང་སྡུག་དང་ཡིད་འོང་དང་། །ཇི་སྲིད་ཡོད་པ་ཞེས་བརྗོད་ཅིང་། །དེ་ལ་བདེ་བ་ཉིད་དུ་རིག །གང་ཕྱིར་འདོད་ཆགས་བྲལ་འགགས་ན། །དེ་དག་སྡུག་བསྔལ་ཉིད་དུ་རིག །འཇིག་ཚོགས་ལྟ་བ་འགགས་པ་ནི། །གཞན་གྱིས་བདེ་བ་མཐོང་བ་ཡིན། །རྐྱེན་ལས་འདི་དག་བྱུང་བ་དང་། །འཇིག་རྟེན་ཀུན་གྱིས་མཐོང་མ་ཡིན། །འཕགས་པས་བདེ་བར་གང་གསུངས་པ། །དེ་ནི་སྡུག་བསྔལ་གཞན་གྱིས་རིག །གཞན་གྱིས་སྡུག་བསྔལ་གང་སྨྲས་པ། །དེ་ནི་འཕགས་པས་བདེ་བར་མཁྱེན། །མདོ་ལས།

གསོན་ཚེ་དབྱར་གྱི་མེ་ཏོག་འདྲ་བར་རྣམ་པར་མཛེས་ཀྱང་།
འཆི་དུས་སྟོན་གྱི་ལོ་མ་བཞིན་དུ་སོ་སོར་ཐོར་འགྲོ།
དེའི་མིང་ལ་མི་རྟག་པ་ཞེས་བརྗོད་དོ།།

生如夏花之绚烂，
死如秋叶之静美，
这就是无常。