ཚེ་རབས་ཀྱི་ལན་ཆགས་དེའི་ཆེད་དུ་དགོད་སླ་ལ་ངུ་ཡང་སྐྱེན།

ཁ་ཅིག་ཡིད་ལ་གོམས་པས་བསྐྱུར་མ་འདོད།།
འགའ་ཞིག་ཡིད་ལ་འཐད་ཀྱང་སྨྲ་མ་ཕོད།།
གང་ཕྱིར་འགལ་མེད་གནད་དེ་མ་སྨྲས་ན།།
བློས་བྱས་ཅུང་ཟད་ཡོང་བ་མི་ཡི་གཤིས།།

ལོ་མང་དཀའ་བས་བསྐྲུན་པའི་ཡིག་འབྲུ་རེར།།
བལྟས་ན་སྡུག་པའི་བུ་བཞིན་སྙིང་ཉེ་བས།།
དོན་མེད་ཤོག་ཡིག་ངོས་སུ་མ་ལུས་པར།།
ཡངས་བའི་འཇིག་རྟེན་ཞིང་འདིར་ཁྲིད་ན་བསམ།།

མེད་ནས་ཆེད་དུ་གཉེར་བའི་ངལ་བ་དང་།།
ཡོད་ཀྱང་ཚིམ་པ་མེད་པའི་སྡུག་བསྔལ་གྱིས།།
མཐོ་དམན་སྐྱེ་བོ་མནར་བའི་ངང་ཚུལ་འདི།།
འཁོར་བའི་ཆོས་ལ་ཡིད་བརྟན་མེད་ལས་ཅི།།

ལྷན་འཛོམས་རེ་བས་སྒུག་པའི་གདུང་བ་དང་།།
གྱེས་བྲལ་ལས་ཀྱིས་བྲིས་པའི་སྐྱོ་སྣང་གིས།།
ཆེ་ཆུང་སྐྱེ་བོ་མནར་བའི་ངང་ཚུལ་འདི།།
གཅིག་ཏུ་ཡིད་གཏད་མེད་པའི་རྒྱུ་མཚན་ཡིན།།

མ་ཐོབ་ཐོབ་པར་འདོད་པའི་མྱ་ངན་དང་།།
ཐོབ་ཀྱང་ཤོར་བར་དོགས་པའི་དངངས་པ་ཡིས།།
མཁས་བླུན་སྐྱེ་བོ་མནར་བའི་ངང་ཚུལ་འདི།།
ཞེན་པའི་གཏད་སོ་མེད་པའི་གཏན་ཚིགས་ཡིན།།

༤༽ལྷིང་འཇགས་ཀྱི་སྒེའུ་ཁུང་ལས་རྨི་ལམ་གྱི་གསང་བ་ཁུར་བའི་ཕྱི་རོལ་གྱི་འཇིག་རྟེན་མཐོང་ཐེངས་རེར། བདག་གིས་ཚེ་སྲོག་གི་རྒྱུ་བ་ཧ་ཅང་མང་པོ་ཞིག་གི་སྐྱེ་འཇིག་ལ་བསམ་བློ་ཡང་ཡང་འཁོར། འདི་ནི་མི་ཕབ་ལ་ཞིག་གི་ནང་སེམས་ཀྱི་འཕོ་འགྱུར་ཙམ་ལས་ཅི་ཡང་མིན་སྲིད་ཀྱང་། ཧ་ཅང་མགྱོགས་དྲག་པའི་ལོ་ཟླའི་འཁོར་བསྐྱོད་ཁྲོད་ནས་ཚེ་སྲོག་གི་སྐྱེ་འཕོ་ནི་དེ་བས་ཀྱང་མགྱོགས་པ་ང་ཚོའི་གཞི་ནས་ཚོར་གྱིན་མེད་པ་འདྲ། གང་ལྟར་མུན་རུབ་ཐེངས་རེར་ཚེ་སྲོག་གི་འགྲུལ་བཞུད་ད་དུང་མཚམས་བཞག་པ་གསལ་བོར་མཐོང་བ་ནི་ཆོས་ཉིད་ཅིག་རེད།

ཟབ་པའི་རིག་གནས་ཁུང་དུ་སྦས་ཁུལ་གྱི།།
དཔྱོད་པའི་མདའ་མོའི་གཟུར་གནས་མངའ་ཚུལ་གྱི།།
ཆོས་མིན་ཐུབ་པའི་བསྟན་པ་སྤེལ་མཁན་གྱི།།
མགོ་རེག་བཤད་མཁས་ཅན་ཚོ་སྨྱོན་པ་རེད།།

གནས་ལུགས་ཕྲ་མོའི་རང་བཞིན་ཤེས་ཁུལ་གྱི།།
གཞུང་ལུགས་ཟབ་མོ་དགོངས་དོན་མ་རྟོགས་པར།།
རང་ཉིད་ཀུན་ལས་མཛངས་པའི་ང་རྒྱལ་གྱི།།
མཐོ་མཐོ་གནམ་ལྷ་ལྟ་མཁན་སྨྱོན་པ་རེད།།

མདོར་ན་རང་གཞན་དྲིན་ཤེས་རྨོངས་པ་ཡི།།
ཚུལ་མིན་གཞན་ནོར་ཧམ་གྱིས་སྤྱད་པ་སོགས།།
ཤེས་མེད་བླུན་པོའི་ཚོགས་རྣམས་འདི་ག་ནས།།
ང་ཉིད་སྨྱོན་པའི་གྲལ་གྱི་མགོ་མ་ཡིན།།