ང་ཚོ་བརྩེ་བའི་ཆེད་དུ་སྐྱེས་པ་མིན་ཡང་། བརྩེ་བའི་ཆེད་དུ་གསོན་ཆོག་ཅིང་བརྩེ་བའི་ཆེད་དུ་འཆི་ཡང་ཆོག་པས། དེ་ནི་ཅི་འདྲའི་བདེ་སྐྱིད་ཅིག་དང་། ཅི་འདྲའི་དོན་སྙིང་ལྡན་པའི་མི་ཚེའི་འགྲུལ་བཞུད་ཅིག་རེད་ཨང་།

རྟག་བརྟན་མེད་པའི་འཚོ་བ།

མཛེས་སྡུག་སྤང་རྒྱན་མེ་ཏོག །
སྟོན་ཀའི་སྤང་ལ་གཞད་ཀྱང་།
བ་མོར་སྙིང་རྗེ་མེད་པས། །
སྟོན་མཇུག་སད་ཀྱིས་འཁྱེར་སོང་།

དཔྱིད་ཀྱི་ཕོ་ཉའི་གསུང་སྐད། །
ལྕང་གླིང་ནང་དུ་སྒྲོག་ཀྱང་།
དགུན་གྱི་གྲང་ངར་ཆེ་བས། །
མོན་གྱི་ཡུལ་དུ་དེད་སོང་།

རི་མགོ་མཐོན་པོའི་དར་ལྕོག །
ཁེར་རྐྱང་གཡུག་འདོད་མེད་ཀྱང་། །
རླུང་བུར་མི་སེམས་མེད་པས། །
རང་དབང་མེད་པར་གཡུག་འགྲོ། །

གཡུ་སྦྲང་གདུང་སེམས་ཅན་ལ། །
མེ་ཏོག་དགོད་འདོད་ཆེ་ཡང་།
དུས་ཀྱི་འགྱུར་བ་ཡོང་དུས། །
མི་འགྲོ་རང་དབང་མི་འདུག །

གསེར་བྱ་ངང་བའི་བརྩེ་དུང་།
གཡུ་མཚོ་སྔོན་མོར་ཆགས་ཀྱང་།
ནམ་དུས་དུང་སེམས་མེད་པས། །
མཚོ་མོར་དར་ཁ་འགྲིག་སོང་།

རྟེན་འབྲེལ་འཁོར་བའི་ཆོས་ཉིད། །
སླར་ཡང་འཁོར་རྒྱུ་ཡོད་ན། །
འདས་པའི་འཁོར་བའི་མི་དེ། །
སླར་ཡང་འཁོར་བར་སྨོན་ཆོག །

———-ཤངས་སྲས་ནས།

2024·2·17

ལོ་ཟླ་ནི་ཆ་མེད་ཅིག་ཡིན་པས།།
ཁྱོད་ཀྱང་ཆ་མེད་ཀྱི་མི་ཞིག་ཡིན།།
གཙང་བོ་ལ་ཁ་བ་ཧ་ཅང་བབས་པའི་དེ་རིང་།།
དོན་དུ་མི་ཞིག་ལ་མེ་ཏོག་འབུལ་ཚུལ་མ་ཡིན་ནམ།།❄️❄️❄️