བླ་མ་རྗེ་བཙུན་སྒྲོལ་མའི་ལྷ་ཚོགས་ལ།།
ཕྱག་འཚལ་སྐྱབས་མཆི་བདག་ཅག་སྒོ་གསུམ་གྱིས།།
བྱ་བ་གང་བརྩམ་ཡིད་ལ་སྨོན་པ་ལྟར།།
ལྷུན་གྱིས་འགྲུབ་པའི་རླུང་རྟའི་དངོས་གྲུབ་སྩོལ།།
祝自己心想事成

བརྗེད་དུ་མེད་པའི་མི

------ ཨ་ལགས་ཆོབ་ཚེ།
དྲན་པའི་ལོ་ཟླ་གཉེར་མའི་རྐང་ལམ་དུ།།
​སུ་ཡི་མིག་ལ་རྒས་རྟགས་སྟོན་པ་ནི།།
རྣམ་དག་ནང་གི་ཁ་དོག་འགྱུར་མེད་ལས།།
སྒྱུ་མའི་མེ་ཏོག་སྐྱེས་སུ་འབུལ་བ་མིན།།

ཁྱེད་རང་གློ་བུར་གཤེགས་པའི་ཞོགས་པ་ནས།།
ཉི་འོད་ལས་ཡང་གྲང་རླུང་ལྡན་པ་དང་།།
ཕ་མ་ཡིན་ཡང་རྒྱུས་མེད་སོང་བ་སོགས།།
དུས་བཞི་དགུན་དུ་བྱུང་བའི་གཏམ་རྒྱུད་རིང་།།

ཨ་ཡས་ཟེར་ནས་ལོ་ངོ་ཉེར་ལྔར་འབོད།།
ཨ་མྱེ་ཟེར་ནས་ལོ་ངོ་བཅུ་བཞིར་འབོད།།
འབོད་པའི་སྐད་སང་གཉོམ་པོ་ཆུ་ལ་སྐུར།།
ཆུ་མིག་ཅ་ཅོའི་ངུ་སྐད་སྙིང་ལ་ཟུག།

དོ་ནུབ་ཟླ་འོད་གྲིབ་མས་མ་སྒྲིབ་ཅིང་།།
ཁྱི་ལྡོམ་ཟུག་སྐད་མཐོ་རུ་མ་སོང་མོད།།
ཡུན་རིང་སོང་བའི་སྙིང་ཁྲག་དྲོན་མོ་ཞིག།
ཁ་ནས་མི་སྐྱུགས་གཟེར་རྒོད་བཟོད་མ་བྱུང་།།

འདི་ཕྱི་གནམ་ས་གྱེས་པའི་གདུང་བའི་གཏམ།།
སུ་ལ་གསང་དུ་ཡོད་པ་གཅིག་མཚུངས་ཀྱང་།།
ང་ལ་ཕྱི་ནང་མེད་པས་དམར་རྗེན་དུ།།
ཁྲོམ་ལ་སྟོང་འབོད་ཤོར་བ་དགོངས་དག་ཞུ།།

བོད་རྒྱལ་ལོ་༢༡༥༡-༡-༡༩ཉིན་ཁང་རྙིང་དུ།
​

བླ་མ་སྐུ་ཁམས་བཟང་བར་གསོལ་བ་འདེབས། །
མཆོག་ཏུ་སྐུ་ཚེ་རིང་བར་གསོལ་བ་འདེབས། །
འཕྲིན་ལས་དར་ཞིང་རྒྱས་པར་གསོལ་བ་འདེབས། །
བླ་མ་དང་འབྲལ་བ་མེད་པར་བྱིན་གྱིས་རློབས། །[合十][合十][合十]