རྒ་བ་ནི་རིམ་གྱིས་འོང་པས་ལོ་ཟླ་ཁད་ཀྱིས་རྫོགས་ཀྱང་བག་མེད་པའི་སེམས་ཀྱིས་ཚོར་སྣང་ཡོང་བ་དཀའ་བར་འདུག་མོད། ཕ་ཡུལ་དུ་ལོག་ཐེངས་རེར་གཅུང་དང་ཚ་བུ་དག་གིས་གསར་བུ་གསར་མོའི་ཚུགས་ཀ་ངོམ་ནས་ཡོང་ལ། རང་རང་སྣང་བའི་མཐུན་ཕྱོགས་ཀྱི་མི་ལ་གདོང་གི་དཀར་ནག་ཀྱང་འཚོ་ཤེས་ཀྱི་འདུག་པས། ན་ཆུང་གི་ང་རྒྱལ་ཁུར་ཞིང་སྣང་བ་རང་ཡན་པའི་རང་ཉིད་ཀྱང་རྒ་བར་ཕྱོགས་ཀྱི་མེད་པ་ག་ལ་སྲིད་སྙམ་སྟེ་སེམས་ཚེགས་ཀྱི་རླུང་ཡན་ཞིག་ཡ་ཁོག་ནས་འཚུབ་སྐོར་བྱེད་དོ།།

མར་གྱི་ཡང་སྙིང་འབྲོག་ཞོ་མངར་པོའི་བཅུད། །སྣ་ཚོགས་ཟས་རིགས་ཞིམ་པོའི་ཁ་རྒྱན་ཅན། །དགའ་སྣང་སྟེར་ལ་བྲོ་བའི་མཆོག་འཁྱིལ་བ། །ཕོ་བའི་བདེ་དྲོད་འཕེལ་བའི་གསོས་སུ་བསྟེན། ། [月亮]

༣༽ང་རང་རྒྱུན་པར་འགྲོ་སའི་ལམ་འགྲམ་དེར་སྐྱེ་འཇིག་ཧ་ཅང་མྱུར་བའི་མེ་ཏོག་མང་པོ་ཞིག་བཞད་ཡོད། མེ་ཏོག་འདི་དག་གི་སྐྱེ་འཇིག་མཐོང་ཐེངས་རེར། ངའི་སེམས་ངོར་སྐྱེ་འཆི་ཞེས་པའི་ཐ་སྙད་དེ་ཡང་ཡང་འཁོར་དགོས་བྱུང་། འོན་ཀྱང་ད་ལྟ་ད་དུང་ངས་སྐྱེ་འཆི་ཞེས་པའི་ཐ་སྙད་དེེར་གོ་བ་གཏིང་ཟབ་ཅིག་རྙེད་མེད་པ་གཞི་ནས་ཚོར་ཡོང་། ང་ཚོ་ཚང་མའི་སྐྱེ་འཆི་གྲངས་མེད་ཅིག་བརྒྱུད་མྱོང་བ་ནི་སྨོས་མེད་ཡིན་མོད། སྐྱེ་འཆི་གཉིས་ལས་བརྒལ་ཞིང་ངོ་མཚར་བའི་འཇིག་རྟེན་གཞན་གྱི་གསང་ལམ་ཕྲ་མོ་དག་རྟོགས་མྱོང་མཁན་ག་ཚོད་ཡོད་སྲིད། ངའི་ནམ་རྒྱུན་རེ་སྙེག་གི་འདུན་མ་འཁོར་སའང་འདི་ཉིད་ལས་གཞན་གང་ཡང་མེད་མོད། དོན་དེ་ནི་ང་དང་ད་དུང་རྒྱང་ཐག་ཧ་ཅང་རིང་བའི་གནས་སུ་སྟོང་འདང་གི་རྨི་ལམ་འཁོར་བ་ལས་གཞན་ཅི་ཡང་མིན།#叶西达瓦[超话]#