མི་ལ་རས་པ།

རྩོམ་འབྲི་པ།

རྒྱ་མཚོ།

སེམས་ཞེན་འཛིན་གྱི་རྣམ་རྟོག་རླུང་ལ་སྐུར་ཏེ། །
གནས་ངེས་མེད་ཀྱི་བཙན་ས་རི་ནས་གཟུང་དུས། །
གྲོགས་འདུ་འཛིན་གྱི་ཡོ་ལང་སྤྲིན་པ་བཞིན་དུ། །
དུས་སྐད་གཅིག་གིས་འགྱུར་བའི་རང་བཞིན་རྟོགས་ཡོད། །

ཟས་སྔོ་རྐྱང་གིས་ལུས་ལ་ཟུང་སྟོབས་རྒྱས་ཏེ། །
གོས་རས་རྐྱང་གི་ཁུད་ན་དྲོད་ཀྱིས་འཚོ་དུས། །
རྒྱུ་འབྱོར་བ་ཡི་ཟང་ཟིང་ཆུ་རིས་བཞིན་དུ། །
དོན་མི་རྟག་པའི་རང་བཞིན་ཁོང་དུ་ཆུད་ཡོད། །

དབྱིངས་སྐྱེ་མེད་ཀྱི་ངང་དུ་རོ་གཅིག་འདྲེས་པའི། །
ལམ་འཛིན་མེད་ཀྱི་རྟོག་པ་ཡིད་ལ་རྫོགས་དུས། །
བློ་རྣམ་རྟོག་གི་ཞེན་པ་རྙི་ཐག་བཞིན་དུ། །
ཐབས་ཤེས་རབ་ཀྱིས་ཁྲིགས་སེ་བཅད་པར་བྱེད་ཡོད། །

དོན་འགྱུར་མེད་ཀྱི་བླ་མའི་གདམ་ངག་རྩལ་ཏེ། །
བློ་ཞུམ་མེད་ཀྱིས་ཚེ་གཅིག་སངས་རྒྱས་སྒྲུབ་དུས། །
ཡིད་ལེ་ལོ་དང་ཕྱིར་བཤོལ་མཆིལ་མ་བཞིན་དུ། །
སེམས་ཏིང་འཛིན་གྱིས་རྒྱང་དུ་དོར་བར་བྱེད་ཡོད། །

ཆོས་ཟབ་གདམས་ཀྱི་མན་ངག་དབྱངས་ལ་སྲེས་ཏེ། །
བྲག་རྟ་སོ་ཡི་མགོ་ནས་ཁེར་བུས་མགུར་དུས། །
གནས་འཇིག་རྟེན་གྱི་འཁོར་བ་རྨི་ལམ་བཞིན་དུ། །
སེམས་རྣམ་རྟོག་གི་འཆར་ཚུལ་ཡིན་པ་རྟོགས་ཡོད། །

ཕ་དྲིན་ཆེན་གྱི་བླ་མའི་གདམ་ངག་བདུད་རྩི། །
ཐུགས་དྲི་མེད་ཀྱི་དཔལ་དུ་སིམ་པར་བྱེད་དུས། །
ཉམས་རྟོག་པ་ཡེ་ཤེས་ལྗང་བུ་བཞིན་དུ། །
སེམས་གཉུག་མ་ཡི་ཞིང་དུ་འཁྲུངས་པར་བྱེད་ཡོད། །

དགུན་ལྷགས་རླུང་གི་ཁྲོད་ནས་རྩལ་ཆེན་རྫོགས་ཏེ། །
མཐོ་དགུང་སྔོན་གྱི་དབྱིངས་སུ་བྱ་ལྟར་ལྡིངས་དུས། །
ལས་སྐྱིད་སྡུག་གི་རི་མོ་འཇའ་མཚོན་བཞིན་དུ། །
དུས་ངེས་མེད་ནས་ཡལ་རྒྱུ་ཡིན་པར་གོ་ཡོད། །

གླུ་བདེ་ཆེན་གྱི་ཉམས་མགུར་རང་གྲོལ་བླངས་ཤིང་། །
ཆོས་ཟབ་གསང་གི་ངན་ངག་གཅིག་ཆོག་སྒོམ་དུས། །
ཚེ་མི་རྟག་གི་འགྱུར་ལྡོག་འཇག་སྐྱ་བཞིན་དུ། །
ལས་རླུང་བུ་ཡིས་དེད་རྒྱུ་ཡིན་པར་མཁྱེན་ཡོད། །

མཐོ་གངས་དཀར་དང་རྫ་རིའི་སྤོ་ལ་འགྱིང་སྟེ། །
རླུང་གཏུམ་མོ་ཡིས་སེམས་ལ་བདེ་དྲོད་སྦར་དུས། །
ཚེ་འདི་སྣང་གི་དཔྱིད་འབྱོར་ཆུ་ཟླ་བཞིན་དུ། །
གཞི་འཁོར་བ་ཡིས་འཁྲུལ་སྣང་ཡིན་པར་རྟོགས་ཡོད། །

༄༅། །མར་པ་ཆོས་དབྱིངས་རྡོ་རྗེ་མཁྱེན་ནོ། །
༈རྩ་བའི་བླ་མ་རང་བྱུང་ཡེ་ཤེས་སྐུ། །སྙིང་ལ་དབྱེར་མེད་བཞུགས་པའི་འོད་ཟེར་གྱིས། །
བདག་གཞན་འཁྲུལ་བའི་མ་ལུས་པ། །མཉམ་ཉིད་བདེ་ཆེན་དབྱིངས་སུ་དག་པར་ཤོག །

བདག་གི་ཞལ་མཐོང་གསུང་ཐོས་དང་། །
凡见我面闻我语

རྣམ་ཐར་ཡིད་ལ་དྲན་པ་དང་། །
以及忆念我事迹

མཚན་ནམ་རྣམ་ཐར་ཐོས་ཚད་རྣམས། །
听闻我名或传记

མངོན་དགའི་ཞིང་དུ་མཇལ་བར་ཤོག །
现喜佛士愿相见

རྗེ་བཙུན་མི་ལ་རས་པས།
-米拉日巴尊者