ཚེ་སྲོག་ནི་དཔེ་ཆ་ཞིག་དང་འདྲ་བར།གླེན་པ་དག་གིས་བྲེལ་འཚུབ་ངང་ཀློག་ཅིང་།མཁས་པ་རྣམས་ཀྱིས་ཀྱང་འཇམ་ཐིང་ངེར་རོལ་བཞིན་ཡོད།
生命就像一本书，愚者忙忙碌碌地翻阅，智者则静静地品味。

༢༡.«མཆོད་པ་བརྒྱད་ཀྱི་སྲོལ་ཇི་ལྟར་དར་བ་དང་། འཇིགས་བྱེད་ཀྱི་མཆོད་པ་ལ་དྲི་ཆབ་མེ་ཏོག་གི་སྔོན་ལ་ཡོང་བའི་རྒྱུ་མཚན།»

དེ་ཡང་མཆོད་པ་བརྒྱད་དེ། མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་ཡིན་ལ། དེ་ཐོག་མར་གནའ་བོའི་རྒྱ་གར་འཕགས་པའི་ཡུལ་ན། རྒྱལ་པོ་ཕེབས་པ་ན། འབུལ་བྱའི་མཆོད་པའི་རིམ་པ་ཡིན། དེ་ཡང་ཚ་དྲོད་ཆེ་བའི་གནམ་གཤིས་ནང་དུ། རྒྱལ་པོ་ཕེབས་པ་ན། ཐོག་མར་སྐོམ་ཚད་སེལ་བའི་གསོལ་ཆུ་ཕུལ་ཅིང་། དེ་ནས་ལམ་བར་གྱི་རྡུལ་འདག་པ་ལ་ཞབས་གཉིས་བཀྲུ་སྤྱད་ཀྱི་ཆུ་ཕུལ། དེ་ནས་དགའ་བསུའི་མཚོན་བྱེད་དུ་མགུལ་ལ་མེ་ཏོག་གི་ཕྲེང་བ་བཀོན། དེ་ནས་རྒྱལ་པོ་བཞུགས་ས་ལ་གདན་འདྲེན་པའི་ལམ་བར་དུ། བདུག་སྤོས་ཀྱིས་སྣ་འདྲེན་ནས་གདན་འདྲེན་དགོས་པས། བདུག་སྤོས་ཕུལ། ཕོ་བྲང་དུ་སླེབས་པ་ན། ཕོ་བྲང་ནང་དུ་གསལ་བའི་ཆེད་མར་མེ་སྦར་བས། མར་མེ་ཕུལ། བཞུགས་ཁྲི་སྟེང་དུ་བཞུགས་པ་ན། ལུས་སེམས་ངལ་སོས་པའི་ཆེད་དུ། ཐུགས་ཀར་དྲི་ཞིམ་པོའི་དྲི་ཆབ་བྱུགས་པས། དྲི་ཆབ་ཕུལ། དེ་ནས་ཞལ་དུ་གསོལ་རྒྱུའི་བཞེས་པ་ཕུན་སུམ་ཚོགས་པ་རེ་རེ་བཞིན་ཕུལ་བ་ཡིན་པས། ཞལ་ཟས་ཕུལ། དེ་དང་མཉམ་དུ་དགའ་སྟོན་གླུ་གཞས་ཀྱི་ཟློས་གར་ཤིན་ཏུ་མཛེས་པ་འཁྲབ་པས། རོལ་མོ་ཕུལ་བ་ཡིན་ནོ། ། ཕྱིས་སུ་སངས་རྒྱས་ཕེབས་པ་ན་ཡང་། རྒྱལ་པོ་ལ་ཇི་ལྟར་མཆོད་པ་ལྟར་བྱས་ནས་སྤྱན་དྲངས་པས། རྗེས་སུ་སྲོལ་འདི་དར་བར་མངོན། འོན་ཀྱང་གཞུང་ཚད་ལྡན་དག་ལས་འདི་གསུངས་པ་མ་མཐོང་བས། མཐའ་གཅིག་ཏུ་བཤད་མ་སྤོབས། སྒྲིག་ན་དེ་ལྟར་དུ་འགྲིག་རྒྱུ་ཡོད་པར་སྣང་།

འཇིགས་བྱེད་ཀྱི་མཆོད་པའི་སྐབས་ལ། དྲི་ཆབ་མེ་ཏོག་གི་སྔོན་དུ་ཕུལ་བ་ནི། བཅོམ་ལྡན་རྡོ་རྗེ་འཇིགས་བྱེད་མཆོག་འཇམ་དབྱངས་དྲག་ཏུ་ཁྲོས་པ་ཡིན་ཞིང་། འཇམ་དབྱངས་ནི་ཤེས་རབ་ཀྱི་ལྷ་ཡིན་པས། ཐུགས་ཀ་ལ་འབུལ་རྒྱུའི་མཆོད་པ་མར་མེའི་སྔོན་དུ་ཕུལ་བ་ཡིན། མདོར་ན་ཤེས་རབ་ཀྱི་ལྷ་ཡིན་པ་མཚོན་པའི་ཆེད་དུའོ། །

སེམས་ཀྱི་སྣང་བརྙན་གཟུགས་སུ་གྲུབ་དགོས་ན།།
​འདི་ལས་ལོགས་སུ་དཔེ་མཚོན་ཡོད་མིན་པས།།
​ཁྱེད་རང་ང་ལ་ལྷག་ཏུ་མི་འཇིགས་སམ།།
​འགོ་བའི་ནད་བཞིན་རིང་དུ་མི་གཏོང་ངམ།།