རྗེ་མི་ལས།
བརྟོད་ཕུར་འདོན་པའི་ལྡངས་ལུགས་དང་གཅིག།
བྱ་ལ་འཇབ་པའི་འགྲོ་ལུགས་དང་གཉིས།།
ས་དོ་ཆད་པའི་སྡོད་ལུགས་དང་གསུམ།།
གསུམ་འདི་གསུམ་འཛོམས་པའི་དུས་ཚོད་ན།།
ཨ་ཕྱི་སྒྱུ་ལུས་རྒུད་པའི་ཡིད་ཕམ་མ།།
ཕྱི་པགས་པ་འདུས་པའི་གཉེར་མ་དང་གཅིག།
ནང་ཤ་ཁྲག་ཟད་པའི་འབུར་གོབ་དང་གཉིས།།
བར་གླེན་ལྐུགས་འོན་ལོང་ཐོམ་ཡོར་དང་གསུམ།།
གསུམ་འདི་གསུམ་འཛོམ་པའི་དུས་ཚོད་ན།།
ཨ་ཕྱི་མི་སྡུག་སྟོན་པའི་ཁྲོ་གཉེར་ཅན།།
ལྕི་ལ་ཧྲུལ་བའི་དུག་པོ་དང་གཅིག།
གྲང་ལ་ཉོག་པའི་བཟའ་བཏུང་དང་གཉིས།།
པགས་པོ་བཞི་སྦྱོར་གྱི་མལ་ས་དང་གསུམ།།
གསུམ་འདི་གསུམ་འཛོམ་པའི་དུས་ཚོད་ན།།
ཨ་ཕྱི་མིས་འགོམ་ཁྱིས་འགོམ་གྱི་རྟོགས་ལྡན་མ།།

米拉日巴尊者说：
拔出牧桩之起式，
悄捉小鸟之走式，
重物落地之坐式，
倘若具足此三时，
祖母身衰心意败；
外皮集聚诸皱纹，
内失血肉现凹凸，
痴哑盲聋境迷乱，
倘若具足此三时，
祖母示现忿怒母；
身着沉重褴褛衣，
口进冰冷浑浊食，
睡处四层皮垫褥，
倘若具足此三时，
人狗践踏似证士。

འབྲོམ་སྟོན་རྒྱལ་བའི་འབྱུང་གནས་ཀྱི་རྣམ་ཐར་མཐོང་བ་དོན་ལྡན།
མཉམ་མེད་ཇོ་བོ་རྗེའི་ཐུགས་སྲས་རྒྱལ་བ་འབྲོམ་སྟོན་པ་ནི་ཤིང་འབྲུག་༼སྤྱི་ལོ་༡༠༠༤༽ལོར་འདམ་གཞུང་རྫོང་གི་ཁོངས་གཏོགས་གཉན་ཆེན་ཐང་ལྷའི་ཞོལ་རྩྭ་སྒྱེ་མོ་ལུང་དུ་སྐུ་འཁྲུངས།སྐུ་ན་ཆུང་དུས་ནས་ཡུམ་དགོངས་པ་རྫོགས་རྐྱེན་མ་ཡར་གྱིས་རྒྱུན་དུ་སྡང་པོ་བྱས་པས་སྙེ་མོར་བྲོས་ཕེབས་གཡུང་ཆོས་མགོན་གྱི་མདུན་ནས་ཀློག་དང་། ཞང་སྣ་ནམ་རྡོ་རྗེའི་དྲུང་ནས་དགེ་བསྙེན་གྱི་སྡོམ་པ་བཞེས།ཁམས་སུ་ཕེབས་ཏེ་བླ་མ་སེ་བཙུན་གྱི་སར་བཞུགས་ནས་ཉིན་མོ་ནང་གཡོག་དང་མཚན་མོར་བླ་མའི་ཞིང་སྲུང་མཛད་དེ་བླ་མར་ཞབས་ཕྱི་དང་རང་ལ་སློབ་གཉེར་འཐུས་ཤོར་མེད་པའི་ཐོག་ཞོར་དུ་སློབ་དཔོན་སྨྲི་ཏིའི་དྲུང་ནས་སྒྲ་རིག་པ་དང་སཾ་སྐྲི་ཏའི་སྐད་བསླབས། དེ་ནས་ཇོ་བོ་རྗེ་མངའ་རིས་སུ་ཕེབས་པའི་གནས་ཚུལ་ཁམས་ལ་གོ་ཐོས་བྱུང་བས་ཞབས་ཐང་གིས་མངའ་རིས་སུ་ཕེབས་ཏེ་པུ་ཧྲེངས་སུ་ལྕགས་སྦྲུལ་སྤྱི་ལོ་༡༠༤༡ལོར་འབྲོམ་སྟོན་པས་ཇོ་བོ་ཐོག་མར་མཇལ།༡༠༤༢ལོར་འབྲོམ་སྟོན་པས་ཇོ་བོ་དབུས་གཙང་དུ་གདན་དྲངས་ཏེ་དབྱར་དགུན་སྟོན་དཔྱིད་སོགས་དུས་བཞི་ལ་དགོངས་པ་མ་རྫོགས་བར་ཞབས་ཕྱི་གཙོ་བོར་མཛད། སྤྱི་ལོ་༡༠༥༤ལོར་མཉེས་ཐང་དུ་ཇོ་བོ་སྐུ་མྱ་ངན་ལས་འདས་རྗེས་སྐུ་གདུང་གི་མཆོད་རྟེན་གསར་བཞེངས་དང་རྗེས་འཇུག་རྣམས་མཛད།སྤྱི་ལོ་༡༠༥༥ལོར་ཇོ་བོས་གསོ་སྐྱོང་གནང་བའི་སློབ་མ་རྣལ་འབྱོར་རྣམ་བཞི་བཅས་ཁྲིད་དེ་རྭ་སྒྲེང་དུ་ཕེབས།རབ་བྱུང་དང་པོའི་མེ་སྤྲེལ་སྤྱི་ལོ་༡༠༥༦ལོར་རྣལ་འབྱོར་རྣམ་བཞིའི་བཞུགས་གནས་དགོན་པ་གོང་དང་། ཀླུ་རྒྱལ་ནེའུ་ལུང་པའི་ཕོ་བྲང་གི་སྟེང་དུ་བཤེས་གཉེན་སྟོན་པ་རང་ཉིད་ཀྱི་གཟིམ་ཆུང་བཅས་བཀོད་པ་ཤིན་ཏུ་མཛེས་པར་བཞེངས།དེའི་ཕྱི་ལོ་མེ་བྱ་༼སྤྱི་ལོ་༡༠༥༧༽ལོར་ཞང་འཕྲང་ཁ་བེར་ཆུང་གིས་ཡོན་བདག་བྱས་ཏེ་རྟེན་གཙོ་བོ་ཇོ་བོ་འཇམ་དཔལ་རྡོ་རྗེའི་བཞུགས་གནས་དབུ་རྩེ་ཀ་གཉིས་མ་ཕྱག་བཏབ། དེ་ནས་དགོན་གྱི་བྱང་ངོས་སུ་རྒྱལ་བ་འབྲོམ་སྟོན་པས་མཉམ་མེད་ཇོ་བོ་རྗེའི་སྤུར་ཐལ་གྱི་སཙྪ་རེ་དང་རྒྱལ་བ་འབྲོམ་རང་གི་ཕྲེང་རྡོག་རེ་བཞུགས་སུ་གསོལ་ནས་མཆོད་རྟེན་བརྒྱ་རྩ་བརྒྱད་བཞེངས་ཏེ་རབ་ཏུ་གནས་པའི་ཆོ་ག་མཛད་པས་མཆོད་རྟེན་རེ་རེའི་སྟེང་མེ་ཏོག་པད་དཀར་རེ་ཟིལ་པ་ཁྲུམ་མེར་བཞད་པ་བཀའ་གདམས་ཆོས་འབྱུང་ལས་གསུངས། དེ་ནས་དགོན་གྱི་བྱང་ཤར་རི་ལྡེབས་སུ་ལོངས་སྤྱོད་ཕུན་སུམ་ཚོགས་པའི་ས་དཔྱད་ཡོད་པར་གཟིགས་ཏེ་དེར་འབྲོམ་རང་གི་བཞུགས་ཁྲི་འདོམ་གང་ཙམ་བརྩིགས་ཏེ། མདུན་དུ་ཆོས་ཞུ་བ་པོ་སློབ་མ་བརྒྱ་ཙམ་ཤོང་བའི་སར་རྣལ་འབྱོར་རྣམ་བཞི་དང་། སྐུ་མཆེད་གསུམ་ལ་སོགས་པའི་སྐལ་ལྡན་གྱི་བུ་སློབ་རྣམས་ལ་བཀའ་གདམས་ཐིག་ལེ་བཅུ་དྲུག་དང་། བྱང་ཆུབ་ལམ་སྒྲོན་སོགས་དམ་པའི་ཆོས་ཀྱི་ཆར་ཕབ།དེ་ལྟར་ཕྱག་བཏབ་ནས་མི་ལོ་བརྒྱད་ཀྱི་རིང་གནས་འདིར་སངས་རྒྱས་ཀྱི་བསྟན་པ་སྤྱི་དང་སྒོས་སུ་བཀའ་གདམས་ལྷ་ཆོས་བདུན་ལྡན་གྱི་གྲུབ་མཐའི་སྲོལ་ཡངས་པོར་ཕྱེས། སྐྱེས་བུ་གསུམ་གྱི་ལམ་གྱི་རིམ་པ་རྒྱུད་ལ་སྦྱོར་ཚུལ་ཤིན་ཏུ་གསལ་ཞིང་གོ་བདེ་བ་བློ་མཐོ་དམན་སུས་བལྟས་ཀྱང་རྒྱུད་འཁུལ་བ། རང་རྒྱུད་ལ་བསྐུལ་མ་འདེབས་པ་དད་པའི་ལྗོན་ཤིང་སོགས་གདམས་ངག་གི་ཡིག་འཇོག་ཀྱང་མང་དུ་མཛད། རྭ་སྒྲེང་གི་གནས་གཞི་བཙུགས་ཏེ་གཞུང་དོན་དང་ཉམས་ལེན་ཆིག་སྒྲིལ་དུ་མཛད་དེ་བསྟན་འཛིན་གྱི་སྐྱེས་བུ་དམ་པ་ཤ་སྟག་ཏུ་གྱུར་པའི་བུ་སློབ་མང་དུ་བསྐྱངས།དེ་རྗེས་སྐུ་མཆེད་གསུམ་ཆོས་ཀྱི་རྒྱལ་ཚབ་ཏུ་མངའ་གསོལ་ཏེ། གནས་ཀྱི་གདན་ས་རྣལ་འབྱོར་བ་ཆེན་པོ་ལ་གཏད། རྟེན་དགེ་བསྙེན་མཛད་ཀྱང་བསླབ་ཁྲིམས་བསྲུང་བ་ལ་དགེ་སློང་ལས་ཀྱང་ལྷག་པ་མཛད། མཐར་དགུང་ལོ་དྲུག་བཅུ་ཤིང་འབྲུག་སྤྱི་ལོ་༡༠༦༤ལོར་བོད་ཟླ་༥ཚེས༢༠ཉིན་རྭ་སྒྲེང་དུ་སྐུ་གཤེགས། https://t.cn/R2WxDfa

(ལྷ་ས་གྲོང་ཁྱེར་སྟོད་ལུང་བདེ་ཆེན་རྫོང་ཁོངས)རབ་བྱུང་དང་པོའི་ཆུ་གླང(༡༠༧༣)ལོར་ཇོ་བོ་རྗེ་ཨ་ཏི་ཤའི་དངོས་སློབ་རྔོག་ལོ་ཙཱ་བ་ལེགས་པའི་ཤེས་རབ་ཀྱིས་ཐོག་མར་བཏབ། དེ་ཡང་དགོན་པ་འདེབས་སའི་ས་གནས་འདི་ཇོ་བོ་རྗེ་ཨ་ཏི་ཤས་ལུང་བསྟན་པ་གནང་ཞིང་། དགོན་པ་མ་འདེབས་བར་དུ་གསང་བ་མཛད་པར་ཞུ་ཞེས་ཞུས་པར་བརྟེན་ནས་གསང་ཕུ་ཞེས་མིང་ཐོགས་པར་བཤད། ཐོག་མར་གྲྭ་པ་ལྔ་བརྒྱ་ཙམ་འདུས་པ་ལ་རྔོག་གིས་འཆད་ཉན་མཛད། ཕྱ་པ་ཆོས་ཀྱི་སེང་གེས་མཚན་ཉིད་ཀྱི་སྲོལ་གཏོད་ནས་དར་རྒྱས་ཆེ་བ་བྱུང་། སེ་འབྲས་མ་ཆགས་གོང་དབུས་ཀྱི་གདན་ས་དྲུག་གི་གྲས་ཡིན། དུས་རབས་བཅུ་བཞི་པའི་ནང་རྗེ་ཙོང་ཁ་པས་དེ་གའི་མཁན་པོ་སེང་གེ་རི་བོང་ལས་རྣམ་འགྲེལ་གསན་པ་དང་། བཀའ་བཞིའི་གྲལ་སྐོར་ཡང་མཛད། དེ་རྗེས་མཁན་པོ་གྲགས་པ་སེང་གེས་རྗེ་ཙོང་ཁ་པའི་ཞབས་ལ་གཏུགས། ཁོང་གི་བུ་སློབ་སོགས་ནས་བརྒྱུད་དེ་དགེ་ལུགས་དར་རྒྱས་ཆེ་སྟབས་གསང་ཕུར་ས་སྐྱ་དང་དགེ་ལུགས་ཀྱི་གྲྭ་ཚང་བཅུ་གཅིག་ཏུ་གྱེས་པ་སྟེ། ༡.སྤེལ་སེར། ༢.ཉི་མ་ཐང་། ༣.དྭགས་པོ་གྲྭ་ཚང་། ༤.རྣམ་རྒྱལ་གསེར་ཁང་། ༥.ཁུ་སྤེ་བཅས་གླིང་སྟོད་གྲྭ་ཚང་ལྔ་དང་། ༦.སྒྲོས་རྙིང་པ། ༧.གཞི་བ། ༨.ཉང་རོང་། ༩.གནས་སྒོ་བ། ༡༠.སྒྲོས་གསར་བ། ༡༡.རྭ་བ་སྟོད་སྨད་བཅས་གླིང་སྨད་གྲྭ་ཚང་དྲུག་སྟེ་བཅུ་གཅིག་ཡོད་ལ་ཕྱིས་གྲྭ་ཚང་རྣམས་གྲྭ་ས་གཞན་དང་བསྒྲིལ་བའམ། ས་ཆ་གཞན་དུ་གཞིས་ཕབ་སྟབས་གསང་ཕུ་དབྱར་ཆོས་ཙམ་མ་གཏོགས་རྒྱུན་གཏན་གྲྭ་གྲངས་སུམ་ཅུ་སྐོར་ལས་མེད། དབྱར་ཆོས་སྐབས་མཁན་པོ་དང་ཁྲིམས་གནོན་རྣམས་སྙེ་ཐང་རྭ་བ་སྟོད་པ་སོགས་བླ་ཁག་བཅུ་རེས་སྐོར་གྱིས་བྱེད་པ་དང་དགའ་ལྡན་ཤར་རྩེ་མཁན་པོས་གསང་ཕུ་གླིང་སྨད་ཞབས་དྲུང་གི་མིང་འཛིན་བྱེད་སྲོལ་ཡོད། ཞིབ་པར་གླིང་སྟོད་བློ་བཟང་རྒྱ་མཚོའི་སྤྲུལ་སྐུ་ཉིད་ཐང་ངག་དབང་གཞོན་ནུ་བསྟན་པའི་ཉི་མས་མཛད་པའི{{གསང་ཕུའི་གདན་རབས་དང་སྐྱེས་ཆེན་དམ་པའི་རྣམ་ཐར་བརྗོད་པ་པད་དཀར་ཆུན་པོ}}ཞེས་པ་དེར་གཟིགས།

དུང་དཀར་ཚིག་མཛོད། https://t.cn/R2WxDfa