རང་ཆས་རང་ལ་མོད་ཀྱང་རྟོགས་ཐབས་མེད།།
རྟོག་འགྱུའི་རི་མོ་ཆུ་ཡི་གཟུགས་རིས་འདྲ།།
མཐོང་དུ་སྲིད་ཀྱང་ཡུལ་གྱི་སྣང་བརྙན་ཙམ།།
མཁས་པར་རློམ་ཡང་འཁོར་བའི་བྱིས་པ་ཞིག།

མདོ་སྔགས་བསྟན་འཛིན[月亮]

ཉིན་གཉིས་ཀྱི་མེ་འཁོར་ནང་ཡུལ་སྐོར་བ་གཉིས་ཐུག།
དམའ་འབྲིང་ནས་བཟུང་སློབ་མཚམས་བཞག་པའི་ཁོ་ཚོ་ནི་འཚོ་བའི་ཁུར་ཆེན་གྱིས་མནར་བས་ལོ་བཅུ་དྲག་གྱི་སྤོབས་པ་ཆེར་བསྐྱེད་མི་མཐོང་ལ་དེ་བས་མང་བ་ནི་ནར་སོན་དང་བརྟན་བརླིང། དེ་ཡིན་ཀྱང་བོད་ཀྱི་ཡུལ་སྐོར་ལ་རེ་སྒུག་ཚད་མེད་བྱེད་བཞིན་ཡུལ་སྐོར་འདིའི་ཕྱེད་དུ་ཟླ་བ་ཁ་ཤས་དངུལ་གསག་ནས་གྲ་སྒྲིག་བྱེད་པ་ཡིན་ཟེར།
ང་ཚོས་མེ་ལིས་ཧོའོ་ཡིས་སྐྱོ་གདུང་གི་མཇུག་སྒྲིལ་བའི་ཚེ་སྲོག་གླིང་ཞིང། ཡང་དེ་ལྟར་དོན་དངོས་ཀྱི་ཡིད་སྐྱོ་བའི་གནས་བབ་མང་དག་ལ་དབུགས་རིང་འབྱིན།
ལམ་བར་དུ་སྟབས་ལེགས་པ་ཞིག་ཉི་འོད་གསེར་རིར་འཕྲོས་པའི་མཛེས་ལྗོངས་མཐོང་བྱུང། ངས་མཛེས་ལྗོངས་དེ་ངོ་སྤྲོད་བྱེད་བཞིན་དུ་ཁྱོད་ཚོ་བྱ་བ་ལམ་འགྲོ་ཡོང་ངེས་རེད་བཅས་ལབ་འདོད་ཀྱང་ཁ་ནས་མ་འདོན།
རེད་ལགས། འཚོ་བར་གཏན་ཆགས་མེད་ཀྱང་རྒྱང་རིང་ལ་བསྐྱོད་པའི་སྤོབས་སེམས་ང་ཚོར་ཡང་ཡོད་པར་སྨོན།

ནགས་ཚམ་མདུན་གྱི་སྡོང་རྒན།

ཕྱི་རོལ་ནས་ལྡང་ཡོང་བའི་བསེར་བུས
ངའི་རྣམ་ཤེས་སྐར་ཁུང་གི་ཕྱི་རོལ་ཏུ་བཀུག
ཕྱི་རོལ་ན་ཅི་འདྲའི་འཁྱག་ཨང
ངས་མཐོང་ཡོང་བ་ནི་ཐག་མི་རིང་བའི་ནགས་ཚལ་རེད
དེ་ལས་ཀྱང་གསལ་ཡོང་བ་ནི་ནགས་ཚལ་མདུན་གྱི་སྡོང་རྒན་དེ་རེད
སྡོང་རྒན་དེ་རྒས་དྲགས་པས་དམར་ཧྲེང་ཧྲེང་དུ་འདུག
ཡིན་ཡང་ཁོ་ནི་དབུ་ཁྲིད་ཅིག་དང་ཅི་འདྲའི་མཚུངས

ཅུང་ཙམ་ནས་བྱིས་པ་གཅེར་བུ་འགའ་ཐོན་བྱུང
ཐག་རིང་ནས་བལྟས་ན་སྡོང་རྒན་དེས་འཛུམ་གྱིས་བསུ་བ་དང་འདྲ
བྱིས་པ་གཅེར་བུ་ཚོས་རང་རང་ལ་འཚམ་པའི་ཡལ་ག་རེ་བཙལ་ནས
ཉིན་གང་བོར་རྩེད་མོ་སྣ་ཚོགས་ཚོགས་ལ་འཇུག་པར་བརྩམ
ངས་བྱིས་པ་འདི་དག་གཅེར་བུར་ཕུད་མཁན་དེ་སུ་ཞིག་ཡིན་ཨང་སྙམ

རླུང་འཚུབ་དང་ཐལ་རྡུལ་ཁྲོད་དུ་བྱིས་པ་ཚོ་རྩེད་མོ་སྣ་ཚོགས་ལ་རོལ
ལ་ལའི་སྣབས་ཁ་ནང་བར་དྲིད་ཅིང ལ་ལའི་མིག་ཀོང་མཆི་མ་དང་ས་རྡུལ་གྱི་བཀང
ཤ་ཚ་ཞིག་ཤོར་ཡང་ཁོ་ཚོ་ད་དུང་དགའ་དགའ་སྤྲོ་སྤྲོ་ངང་སྡོད
སྡོང་རྒན་དེའི་ཡལ་ག་རེ་ཟུང་གངས་རུས་ལྟར་དཀར་ཞིང
དེ་ནི་བྱིས་པ་པྲ་ཚགས་འདི་ཚོས་ལོ་ལོ་བཞིན་བཞོན་པ་རྟ་དང་གཡག
གནམ་གྲི་དང་འཕྲུལ་རྟ་སོགས་སུ་བྱས་རྐྱེན་གྱིས་ལོས་ཡིན་མོད
སྡོང་རྒན་འདིའི་མཐོ་སའི་ཡལ་དག་བྱིས་པ་ཚོར་ལན་པ་མེད

སྡོང་རྒན་དེའི་རྒྱབ་རོལ་ན་ནགས་ཚལ་ཡོད
ནགས་ཚལ་ནི་དགུན་ཁའང་སྔོ་ལྡེམ་ལྡེམ་དུ་འདུག
ཁ་བ་འབབ་ཐེངས་རེར་རྣམ་པ་གཞན་ཞིག་གིས་ཡིད་སེམས་འཕྲོག་སྲིད་མོད
དེ་རིང་ཁ་བ་སྡོགས་གཅིག་ཀྱང་མི་འབབ་པའི་གྲང་ཤུར་ཤུར་གྱི་ཉིན་མོ་ཞིག་རེད
ངེད་ཚང་གི་ལྕགས་ཐབ་དམར་པོ་མེ་ཟླུམ་འདྲ་ཞིག་ཡོད་མོད
ཕྱི་རོལ་གྱི་གྲང་ངར་འགོག་མི་ཐུབ་པས་ངས་ཕྱི་རོལ་ལ་ཡང་ཡང་བལྟས

2023-12---སྨྲ་གྲོལ།