མཁྱེན་ནོ་མཁྱེན་ནོ་དྲིན་ཅན་གྱི་བླ་མ། །
གཟིགས་ཤིག་གཟིགས་ཤིག་ཐུགས་རྗེ་ཡི་མངའ་བདག།
དག་པ་གཉིས་ལྡན་ཆོས་ཉིད་ཀྱི་ཀློང་ནས།།
ཡེ་ཤེས་སྒྱུ་མའི་རྣམ་རོལ་གྱིས་བཞེངས་ཤོག།

གསང་སྔགས་གདམས་པའི་མཛོད་འཛིན་གྲུབ་པའི་དབང་། །
སྙིང་ཐིག་བསྟན་པའི་གསལ་བྱེད་རྡོ་གྲུབ་པ། །
ཐུབ་བསྟན་འཕྲིན་ལས་དཔལ་བཟང་འགྲོ་བའི་མགྲོན། །
དང་བའི་ཡིད་ངོར་དྲན་པའི་མཆི་མ་བཀུ། །

དུས་འཁོར་རྩ་རྒྱུད་ལས། བླ་མ་འདས་པའི་ལོ་ཟླ་ཚེས་གྲངས་དག །ངེས་པར་བཟུང་སྟེ་མཆོད་པ་བྱས་གྱུར་ན། །བསྐལ་པར་བསགས་པའི་སྡིག་པ་རབ་བཅོམ་ནས། །ཤིན་ཏུ་མི་བཟད་གཤིན་རྗེའི་གྲོང་ལས་ཐར། །སྟོང་གསུམ་སྐྱེ་བོའི་མིག་བྲལ་སྲོག་ཉམས་ལ། །མིག་དང་སྲོག་སྦྱིན་པས་ཀྱང་དཔེར་མི་ཕོད། །ཅེས་གསུངས་སོ། །

ལྕགས་མོ་གླང་གི་ལོའི་བོད་ཟླ་ ༡༡ ཚེས་ ༢༣ རྒྱལ་ནང་དུས་ཚོད་ ༡༨ སྐར་མ་ ༤༥ སྟེང་རེ་ཞིག་གཟུགས་སྐུ་མཐོང་གྲོལ་ཆེན་པོའི་བཀོད་པ་ཆོས་དབྱིངས་མཉམ་པར་བརྡལ་བའི་ཀློང་དུ་བསྡུས་ཚུལ་བསྟན་པ་ལགས་སོ།།