དེ་རིང་ནི་༧ཀུན་གཟིགས་པཎ་ཆེན་སྣང་བ་མཐའ་ཡས་དགོངས་པ་གློ་བུར་དུ་གཤེགས་ནས་ལོ་འཁོར་སུམ་ཅུ་སོ་ལྔ་འཁོར་བའི་དུས་དྲན་ཡིན་པས་ཁོང་གི་དགོངས་པ་བཞིན་རང་གི་མི་རིགས་དང་སྐད་ཡིག་མ་བརྗེད།[蜡烛][鲜花]

࿐ང་ཨུ་ཡོན་ཀྲང་གི་གོ་གནས་ལ་བསྡད་མྱོང་ལ །
 ལོ་དགུ་དང་ཟླ་བ་བརྒྱད་ལ་མུན་ནག་གི་བཙོན་ཁང་འགྲིམས་ཏེ་ཉེས་མེད་ཀྱི་བཙོན་པ་ཡང་བྱས་མྱོང་།
འོན་ཀྱང་ཐོབ་ཤོར་དེ་ཙམ་ལ་ངས་སྣང་དོགས་བྱས་མ་མྱོང་།
ངས་སྣང་དོགས་བྱེད་ས་ནི་བོད་མི་རིགས་ཀྱི་སྐད་དང་ཡི་གེ།
ཆོས་དང་རིག་གཞུང་ཡུལ་སྲོལ་གོམས་གཤིས་སོགས་ལ་ང་རང་གི་འདོད་པ་ཚིམ་པའི་བྱ་བ་བསྒྲུབ་མ་ཐུབ་པ་དེ་ཡིན།
————— པཎ་ཆེན་རིན་པོ་ཆེ།

འཁོར་བའི་ལྟད་མོ།

ཟུངས་ཁྲག་དྭངས་མ།

ནམ་མཁའ་གཡུ་ཡི་སྔོ་བསངས་མར། །
ཆུ་འཛིན་ཕུང་པོ་བརྩེགས་པའི་འོག །
ས་ཆེན་བུ་མོའི་པང་སྟེང་ནས། །
སྲོག་ལྡན་ཀུན་ཀྱང་བང་ཁ་འགྲན། །

འཁོར་བ་འདམ་གྱི་བང་རིམ་དུ། །
བདེན་ཞེན་མེ་ཏོག་སྣ་ལྔ་བཞད། །
རེ་བའི་འདུན་པའི་རྗེས་ཤུལ་དུ། །
བློ་ཡིད་ཕམ་པའི་ཚེར་མ་སྐྱེ། །

བརྩེ་དུང་ཨ་རག་དམ་བུ་གང་། །
ན་ཆུང་སུ་ཡང་མྱང་འདོད་སྐྱེ། །
ཁ་གང་བརྔུབས་པའི་ལྕེ་རྩེ་རུ། །
མི་འདོད་སྐྱུར་དྲི་ཞེ་ལ་ཁ། །

ཨ་གསར་བསླུས་པའི་བརྩེ་དུང་ལ། །
འཁོན་པའི་གྱེས་ཕྱག་ལན་དགུ་བཙལ། །
ང་དང་ཁྱོད་ཀྱི་ངོ་གདོང་ལ། །
དཀར་ནག་ཁྲོམ་འཛུམ་གཉེར་མ་གང་། །

སེམས་འདི་ཧ་ཅང་སྙི་དྲགས་པས། །
གང་སར་འཐེན་ན་དེ་སར་ཡོར། །
རེ་བ་བསྙེག་པའི་གྱི་ལིང་དེ། །
གྱ་གྱུ་བར་ནས་རི་ལ་ཤོར། །

མི་ཚེ་ནུབ་ཁའི་ཉི་མ་ལ། །
འདོད་པ་རྒྱ་མཚོ་འཁྱིལ་ན་ཡང་། །
འཆི་བ་ནུབ་རིའི་གྲིབ་སོ་དེ། །
ང་དང་ཉེ་བ་སུ་ཡིས་རྟོགས། །

ངེས་འབྱུང་བློ་ཡི་མར་མེ་འདི། །
བསིལ་རླུང་འཇམ་པོས་གཟིམས་སོང་ན། །
ཁ་བ་བུ་ཡུག་རྣམ་རྟོག་ཁྲོད། །
ཏིང་འཛིན་མེ་ཕུང་ཅི་ལྟར་སྦར། །