སྒྲིབ་གཉིས་དགྲ་ཚོགས་མ་ལུས་ཉེར་ཐུབ་ཅིང་།། མ་སྨད་བསྟན་པ་ལང་ཚོ་དར་དྲག་པའི།། སྡེ་བཞིའི་སྦྱིན་པ་རིས་མེད་འགྲོ་བ་ལ།། གཏོང་ཕྱིར་སྲིད་མཐའི་བར་དུ་བརྟན་པར་ཤོག།

རྨི་ལམ་ཞིང་གི་ལྗོན་པ།

ཚིག་རྩོམ་པ་པོ།

སྒོ་ཤེར།
སྤྲིན་པ་ལྷོ་རུ་ལྡང་བའི་ཕར་ངོགས་ན། །
རི་བོ་ནགས་ཀྱིས་དཀྲིས་པའི་གཙུག་ཏོར་ན། །
ལེགས་བྱས་འདབ་བརྒྱ་རྫོགས་པའི་ལྗོན་པ་ཞིག །
བདག་ཡིད་བྱེའུ་ཆུང་ངལ་གསོའི་འབབ་སྟེགས་ཉིད།།
ལྗོན་པའི་དབུ་རྩེ་ནམ་མཁའི་མཐོངས་སུ་སྐྱེས། །
ཡལ་འདབ་རེ་རེར་གཤོག་པ་ཐོགས་ཤིང་འཕུར། །
འཇའ་ཚོན་བཅིབས་ཤིང་ཆར་ཆུ་གཏོར་བ་ཡིས། །
ཚ་བའི་ཡུལ་གྲུ་དག་ཀྱང་བསིལ་ཞིང་ལྷོད། །
འགག་མེད་གསུང་གི་རོལ་མོ་སྤྲིན་ལ་འདྲེས། །
སྤྲིན་པའི་ཐིགས་པ་བདག་གི་རྣ་བར་ལྷུང་། །
ཉན་བཞིན་ཉན་བཞིན་རྨི་ལམ་གྲོང་དུ་ཤོར། །
གྲོང་དེའི་ཆུ་ཕྲན་མིག་ཟུང་མཐའ་རུ་བཞུར། །
བདག་ནི་ཆགས་སྡང་ཆེ་བའི་མི་ཞིག་ཡིན། །
བརྩེ་ཆེན་བཏང་སྙོམ་ཆེན་པོར་འཇུག་མི་ནུས། །
དགྲ་གྲོགས་ས་མཚམས་མ་འདྲེས་ཡིད་ལ་གསལ། །
དགའ་སྐྱོའི་རླུང་གིས་སྐད་ཅིག་སྐད་ཅིག་གཡོ། །
ཕྱི་རོལ་རྐྱེན་གྱི་རྫུ་བ་ཕྲ་མོས་ཀྱང་། །
ནང་གི་འཇིག་རྟེན་གཡོ་ཞིང་སྐྱོམ་པ་ཡི། །
མི་བརྟན་སེམས་ཀྱི་གྲོང་ཁྱེར་རྙིང་ཧྲུལ་འདི། །
ཁྱེད་ལ་ཁེན་པས་ཐོར་ཞིག་མ་སོང་ཙམ། །
ཁོ་བོ་གཞོན་དུས་ཁྱེད་ནི་བགྲེས་སོང་ཞིག །
ཁོ་བོ་རྒས་ཚེ་ཁྱེད་ནི་གཞོན་ནུ་ཞིག །
འཛུམ་པའི་དཀྱིལ་འཁོར་བྲི་གང་མེད་པ་ཡི། །
དཔག་བསམ་ལྗོན་བཟང་མཛེས་པ་ཀུན་གྱི་མཆོག །
སད་སེར་ཐན་པ་གང་གིས་མ་ཐུལ་བའི། །
ལྗོན་དབང་ཁྱེད་ནི་དོན་གྱི་ཐུབ་པ་སྟེ། །
མུན་པའི་དཔུང་གིས་ཡིད་སེམས་རྨས་པ་ང་། །
ཁྱེད་ལ་ལྷག་པར་མི་དུངས་རང་དབང་ཅི། །
རང་སེམས་སྒྱུ་མའི་བུ་མོ་ངོ་ཉིས་མ། །
སྐབས་རེར་རྡོ་ཡི་ཀ་བ་བཞིན་དུ་སྲ། །
རེས་འགར་སྙི་བ་སྟོན་ཁའི་འཇག་མ་སྟེ། །
རྐྱེན་ཆུང་ཕྲ་མོ་རེས་ཀྱང་འཆག་ལ་ཁད། །
ཁྱེད་ཐུགས་རི་བོ་བཞིན་དུ་བརྟན་པ་དང་། །
སྙིང་སྟོབས་རྒྱ་མཚོ་ལས་ཀྱང་ཟབ་པ་དང་། །
ཤེས་རབ་འོད་ཀྱི་ཕུང་པོ་ལྷུན་ཆགས་པ། །
དེ་ཡི་ངོ་མཚར་བསམ་ཞིང་བསམ་ན་གུས། །
ཤེས་བྱ་སྐམ་པོ་ཟོས་ཚེ་ལྷག་པར་ལྟོགས། །
གནས་ལུགས་ཐར་ཐོར་མཐོང་ཚེ་ཀུན་ཏུ་རྨོངས།།
ལྟོགས་པས་མནར་ཞིང་རྨོངས་པས་གདུང་བ་བདག།
ཁྱེད་ཀྱི་བསིལ་གྲིབ་ཉིད་དུ་དབུགས་དབྱུང་ཐོབ། །
ཁ་བའི་འཇིག་རྟེན་རྡུལ་གྱིས་མནན་པ་ཡི། །
མྱ་ངན་རླུང་གི་འཁོར་ལོའི་ཐུ་འོག་ན། །
སུ་དག་མི་ཤིགས་གོམ་སྟབས་མི་གཡོ་བ། །
དེ་ཀུན་དཔག་བསམ་ཁྱེད་ཀྱི་ཡལ་འདབ་ཉིད། །
རྐང་འཐུང་ཁྱེད་ནི་ལྷ་ཡི་ཕོ་ཉ་སྟེ། །
རེ་བའི་འབྲས་བཟང་སྟོང་གིས་རྣམ་པར་བརྒྱན། །
རྨི་ལམ་ཞིང་གི་མགྲོན་པོ་འཛུམ་ཅན་ཁྱེད། །
བདག་སེམས་འཁྲིལ་སའི་ཙནྡན་ཀ་བའོ། །

སྦྲ་དང་གུར་གྱི་དབྱེ་བ་གསལ་བའི་རི་མོ་འདི་ནི་དུར་ལམ་ནས་ཐོན་པའི་པུར་སྒམ་སྟེང་གི་རི་མོ་ཞིག་སྟེ། ད་ལྟ་ཨ་རི་བ་ཞིག་གིས་ཉར་ཚགས་བྱས་ཡོད་སྐད། དེ་ཡང་དེང་གི་ཞིབ་འཇུག་པ་ཚོས་སྦྲ་ནག་ནི་བོད་ས་རང་ནས་བྱུང་བ་དང་། གུར་ནི་བྱང་ཕྱོགས་མི་རིགས་ཁག་ནས་ཚུར་དར་ཚུལ་བརྗོད་ཀྱིན་ཡོད་ན་ཡང་། རེ་ལྡེ་འཐག་ཚུལ་འདི་དབང་མཛད་བཅུའི་དུས་ནས་བྱུང་ཚུལ་ཡིག་ཚང་ཁག་ཏུ་གསལ་ཞིང་། 《བཀའ་ཆེམས་ཀ་ཁོལ་མ་》ལས་རྗེ་གཉའ་ཁྲི་བཙན་པོའི་ཕོ་བྲང་ནི་ས་དང་རྡོ་ལ་མ་བརྩིགས། རི་དྭགས་ཤྭ་བ་དང་འབྲོང་། གཅན་གཟན་སྟག་གཟིག་གི་པགས་པ་ལ་གུར་དུ་ཕུབ་ཚུལ་བརྗོད་ཀྱིན་ཡོད་པ་ལྟར། ཐོག་མར་འབྲོང་གཡག་སོགས་གཅན་གཟན་གྱི་པགས་པ་ལ་གུར་དུ་ཕུབ་པ་དང་། དེ་ནས་རིམ་གྱིས་རེ་ལྡེ་འཐག་པའི་ལག་རྩལ་བྱུང་བར་བར་བརྗོད་ན་ལོ་རྒྱུས་ཀྱི་འཕེལ་རིམ་དང་མཐུན་པར་སྣང་།